Mandamuna ku nkonko yenu

▪ Mbimpe kukuma bikashi padi muntu yonso ujikija mudimu wende mu Kalasa ka Mudimu wa Nzambi ne mu Tshisangilu tshia Mudimu anyi?

Pakafuka Yehowa buloba, ‘mitoto ya nkesha yakimba misambu diatshimue, ne bana balume bonso ba Nzambi bakela mbila yabu bua disanka diabu.’ (Yobo 38:7) Bana balume ba Nzambi aba anyi banjelu bakatumbisha Yehowa bua bintu bia kukema bivuaye mufuke. Bintu abi bivua bileja mudiye kabidi ne meji ne buimpe ne bukole.

Mbimpe tuetu kuleja bana betu dianyisha ne muoyo mujima bua mudibu baditatshishe ne bua mudimu udibu benza. Tshilejilu, tutu tututa bikashi patu muyuki wonso anyi dinaya dia tshilejilu dionso dijika mu bisangilu bia pa buabi bu mudi mu mpuilu ne mpungilu. Midimu yonso itubu benza mu bisangilu bia nunku itu ilomba dîba ne didienzeja dia pa mutu. Nunku tutu tukuma bikashi bua kuleja dianyisha bua mudimu mukole udi muntu muenze, bua malu adi Yehowa utulongesha ne diambuluisha dia Dîyi diende ne bulongolodi buende.​—Yesh. 48:17; Mat. 24:45-47.

Kadi netuambe tshinyi bua bikashi mu Kalasa ka Mudimu wa Nzambi ne Tshisangilu tshia Mudimu? Kakutu mukenji utu ukandika bikashi bitu bidiluila nkayabi, nangananga padi muntu wenza mudimu bua musangu wa kumpala mu kalasa. Kadi bikashi bidi mua kulua tshibidilu tshia patupu ne kujimija mushinga wabi. Ke bualu kayi katuena mua kututa bikashi padi mudimu wonso ujika to.

Kadi nansha mutudi katuyi mua kututa bikashi bua midimu ya bungi ya mu Kalasa ka Mudimu wa Nzambi ne Tshisangilu tshia Mudimu, kudi mishindu mikuabu itudi tuetu bonso mua kuleja dianyisha bua midimu eyi ne bua bantu badi baditatshishe bua kuyenza. Tshilejilu, tudi mua kuteleja bantu badi bayenza bimpe menemene. Tudi kabidi mua kuya kubela tuasakidila padi bisangilu bijika.​—Ef. 1:15, 16.