Utuku wenza mudimu ne mukanda wa Comment raisonner anyi?
1. Mupostolo Paulo ne Yezu bavua balongesha mushindu kayi?
1 Mupostolo Paulo uvua uditatshisha bua kuelangana meji ne bantu ne Mukanda wa Nzambi. (Bien. 17:2, 3; 18:19) Pavuaye wenza nanku, uvua widikija Yezu, bualu Yezu uvua utamba kutela mêyi a mu Mukanda wa Nzambi, ufila bilejilu bua bantu kumvua bimpe tshivua Nzambi ubalomba. (Mat. 12:1-12) Mukanda wetu wa Comment raisonner mbawenze bua kipatshila aka.
2. Leja mutudi mua kulongolola mbuelelu mimpe ne mukanda wa Comment raisonner.
2 Ulongolole bimpe mbuelelu yebe: Mukanda wa Comment raisonner udi ne mbuelelu ya miyuki idi ijula bantu nzala ya kumanya malu a bungi mu dibeji dia 9-15. Wewe mulonge mbuelelu eyi, wenza kabidi nayi mudimu nangananga mu teritware uutu wenzela mudimu bikole, newikale ne mbuelelu mishilashilangane, newikale ushintulula mbuelelu bilondeshile nsombelu uudi usangana nende muntu. Paudi uyishila ku telefone wa kuebe anyi wa ku tshiibi tshia muntu, udi mua kubala mêyi ebe mu mukanda eu.
3. Amba malu malenga adi mu dibeji dia 16-24 dia mukanda wa Comment raisonner.
3 Tshia kuenza padi muntu usua kubenga: Kuenaku mua kuanji kuvuluka tshidi bantu ba mu teritware wenu bamba bua kubenga kunuteleja, pashishe kuela dîsu mu dibeji dia 16-21 bua kumanya mua kubandamuna anyi? Bamue bantu ba mu teritware mbena Buddha, Hindu, bena Yuda anyi ba Mizilma anyi? Apu, tangila mu dibeji dia 21-24.
4. Leja mutudi mua kuenza mudimu ne mukanda wa Comment raisonner bua kuandamuna lukonko anyi tshiena-bualu tshitu tshijula bilumbu.
4 Mua kuandamuna nkonko: Mukanda wa Comment raisonner udi kabidi mua kutuambuluisha padibu bajula lukonko anyi tshiena-bualu tshitu tshikebesha matandu. Ambila muntu ne: udi usua kumuleja diandamuna dimpe; mpindieu patula mukanda wa Comment raisonner. Keba tshiena-bualu tshidi tshikumbanyine (mbalonge biena-bualu kumbukila ku dileta dia A too ne ku dia Z). Tapa dîsu lukasa ku nkonko idibu bafunde ne maleta mafiikisha bikole. Wewe kuyi mumone ne lukasa tshiudi ukeba, ndaku lukasa ku tshikebelu tshia miaku (anyi “Index”) lua ku ndekelu kua mukanda. Paudi upeta tshiudi ukeba, utshibale diakamue anu mu mukanda amu. Nuenu nuakula bua mvese kampanda, apu udi mua kuela dîsu mu dibeji dia 445 mu kazubu kadi kamba ne: “Textes souvent mal compris” (Mvese itu bantu batamba kumvua bibi).
5. Tela mishindu mikuabu mimpe idi mukanda wa Comment raisonner mua kutuambuluisha.
5 Mikuabu mishindu ya kuenza nawu mudimu: Bamue batu ne mukanda umue wa Comment raisonner ku mudimu anyi mu kalasa bua kuandamuna nkonko bu mudi: ‘Kanutu nuenza fete bua tshinyi?’ Biena-bualu bia “Création” ne “Évolution” bitu biambuluisha balongi ba bungi mu mateta a kudifundila bualu. Udi usua kuya kutangila muntu udi usama anyi udi mufuishe anyi? Tshiena-bualu tshia “Encouragement” netshikuambuluishe bua kumusamba ne mvese. Mukanda eu udi wambuluisha bana betu badi ne midimu ya kuenza mu bisangilu anyi batu balombola bisangilu bia mudimu wa buambi.
6. Tudi ne kipatshila kayi patudi tuyisha?
6 Patudi tuyisha, kipatshila ketu ki nka kutandangana ne bantu bua kubatuisha anyi kubambila anu malu patupu to. Kipatshila ketu nka kuelangana nabu meji bimpe ne Bible. Kuenza mudimu bilenga ne mukanda wa Comment raisonner, nkuikala badimuke ku diyisha dietu.—1 Tim. 4:16.