Nukadi badilongolole bua kalasa anyi?
1. Mpunga kayi iwapete paudi ubuela mu kalasa?
1 Bikala etshi ke tshidimu tshia kumpala tshiudi ubuela mu kasala anyi uvua ulonga bidimu bishale ebi, umanya ne: bana balongi badi bena Kristo batu balonga batu ne ntatu ne malu makole atubu bapeta. Nansha nanku, udi upeta mishindu mikuabu ya wewe “kuamba malu malelela” anyi kuyisha. (Yone 18:37) Udiku mudilongolole ne mudiakaje bua kuamba lumu luimpe anyi?
2. Mmalu kayi audi ne bua kuenza bua kuleja muudi mudilongolole bua kubuela mu kalasa?
2 Bua kukuambuluisha mu nsombelu yonso iwikala mua kupetangana nayi, Yehowa mmukulongeshe malu a bungi, baledi bebe kabidi ne nansha mupika wa lulamatu ne wa budimu. (Nsu. 1:8; 6:20; 23:23-25; Ef. 6:1-4; 2 Tim. 3:16, 17) Mpindieu udi mumanye ntatu iwapeta pawabuela mu kasala. Ku diambuluisha dia malu a Nzambi audi mulonge ne dia dimanya tshitu nsombelu mu tulasa, tuadija kudilongolola bua kuyishamu. (Nsu. 22:3) Mu volime yonso ibidi ya mukanda wa Les jeunes s’interrogent kabidi ne mu biena-bualu bidi biakula bua malu aa mu Réveillez-vous! mudi ngenyi mimpe yakuambuluisha.
3. Mmishindu kayi idi mua kumueneka bua wewe kuyisha?
3 Mu tulasa muenu ke teritware webe, uudi mua kuyishila mu mishindu ya bungi. Padi balongi nebe bamona mvuadilu webe mulenga, ndengejilu webe wa mubidi ne nsuki, bikadilu biebe bimpe ne ngakuilu, mushindu uudi uteka mulongeshi ne mulongi muntu pa kaba kende ne balombodi ba tulasa, bionso ebi bitu bafikisha bamue ku didikonka ne: “Bua tshinyi yeye mmushilangane bikole ne bakuabu?” (Mal. 3:18; Yone 15:19) Nanku udi mua kupeta njila wa wewe kuyishila ne kumvuija bantu malongesha etu. (1 Tim. 2:9, 10) Mu tshidimu tshijima tshia kalasa, neupete ntatu bu mudi dienza misekelelu ya matuku a ditunga anyi mafesto makuabu. Bu muntu mua kukukonka bua tshinyi udi ubenga kuenza nabu bidibu benza, newandamune ne: “Mbikandika mu tshitanda tshietu; bualu ndi Ntemu wa Yehowa” peshi newangate lukonko alu bu njila mukunzuluila bua wewe kuyisha malu a Tatuebe wa mu diulu Yehowa? Wewe mudilongolole bimpe ne diambuluisha dia Yehowa newikala pabuipi bua kuyisha balongi nebe, balongeshi ne bantu bakuabu bonso mu mushindu mulenga wa dikema.—1 Pet. 3:15.
4. Bua tshinyi udi mua kukola ku muoyo bua ne: neupite bimpe ne tshidimu tshiwikala ulonga atshi?
4 Nansha wewe ne buôwa bua kuya mu kalasa, umanye ne: kudi bantu ba bungi badi basue bua wewe kupita bimpe ne bidimu bionso biwikala ulonga abi. Kabidi, tudi ne disanka buebe bua muwayisha bantu mu tulasa tuenu. Nanku, kola ku muoyo, buela mu kalasa!