Kuyisha ku telefone kudi mua kupatula bipeta bimpe
1. Bua tshinyi tudi mua kuangata kuyisha ku telefone bu tshitupa tshia mushinga tshia mudimu wetu wa buambi?
1 Bua tshinyi tudi mua kuela meji bua kuyisha ku telefone? Bualu ngumue mushindu wa kuambuluisha bantu bakuabu bua kupetabu dimanya dilelela bua lupandu luabu. (2 Pet. 3:9) Nansha mutu kuyisha ku nzubu ne ku nzubu kuikale mushindu munene ututu tuyishila lumu luimpe lua Bukalenge, tudi basue kukeba imue mishindu ya kupeta bantu batudi katuyi mua kusangana ku mbanza yabu.—Mat. 24:14; Luka 10:1-7; Buak. 14:6.
2. Mmushindu kayi udi mudimu wa kuyisha ku telefone mulongolola?
2 Mushindu udibi bilongolola: Anu mutubu bapesha bamanyishi teritware bua kuyisha ku nzubu ne ku nzubu ke mudibu kabidi babapesha teritware bua kuyisha ku telefone. Muntu udi mua kuyisha ku telefone nkayende anyi ne kasumbu ka bantu pamuapa babidi anyi basatu. Bikengela kusungula muaba udi kauyi mitoyi nansha ditanaji bua kuyisha ku telefone. Bantu ba bungi batu bamona bimpe bua kusomba ku mêsa bikale ne mikanda idibu bayisha nayi padibu benza mudimu wa ku nzubu ne ku nzubu.
3. Mmalu kayi atudi ne bua kuvuluka patudi tuyisha ku telefone?
3 Mushindu wa kuyisha ku telefone: Patudi tuyisha ku telefone, tudi ne bua kuakula bimpe badilekelele. Bamue batshidi batuadijilaku badi mua kubadila muntu udibu bayukila nende malu adibu bafunde pa kabeji, kadi benze bu ne: kabena baabala to. Mbuelelu ya mu miyuki idi mu mukanda wa Comment raisonner, mu Mudimu wetu wa Bukalenge, ne mu trakte wa Kuenaku musue kupeta mandamuna a nkonko eyi anyi? idi mua kutuambuluisha mu bualu ebu. Paudi udilongolola pa nkayebe, wikale mujadike tshiena-bualu tshiwakuila, umanye nkonko yiwela muntu, ne udianjile kusungula mvese mikese iwamubadila bua kuandamuna nkonko. Pa tshibidilu mbimpe kufila mikanda imue imue itutu tufila mu mudimu wa ku nzubu ne ku nzubu. Tukija paudi wakula ne wakula bitulu bitulu. Wikale ne bukalanga, lutulu ne wakula ne bulunda, bualu dîyi diebe didi mua kumvuija bintu ebi ku telefone. Uteleje padi muntu au ukuleja yende ngenyi, pashishe wela muntu tuasakidila bua tshidiye muamba. Kadi wadimuka: kuakudi bualu bua makuta a diyisha nawu mudimu wetu wa lumu luimpe kumpala nansha, bualu bantu badi mua kupeta meji mabi, bienza anu bu se: tudi tubabikila ku telefone bua kubalomba makuta.
4. Mmushindu kayi udi kuyisha ku telefone kutuambuluisha bua kuyisha mu teritware udibu batupeshe?
4 Muntu uudi uyukila nende ku telefone udi mua kuikala usama, mulema anyi utu ne midimu idi imupangisha bua kumupeta ku mbelu paudi mu mudimu wa ku nzubu ne ku nzubu. Kudi bamue badi basombele mu muaba udi bantu ba bungi anyi bibambalu bidibu bakandike bua muntu mukuabu kubuela. Nunku, bua tuetu kuenza mudimu wetu bimpe menemene, tukuate mudimu ne telefone bua kuambila bantu lumu luimpe.