Mpuilu mulongoluela bamanyishi ba Bukalenge
1. Mbualu bupiabupia kayi buakatuadija mu 1938? Buvua ne kipatshila kayi?
1 Mu 1938, bulongolodi bua Yehowa buakatuadija kuenza bualu bupiabupia. Bakatuadija kulomba bisumbu bungi kampanda bua kubuela mu mpuilu ya tshijengu. Bua tshinyi? Mudimu wetu wa Bukalenge wa ngondo wa kumpala wa 1939 wakamba ne: “Bulongolodi bua Yehowa budi bulongolola mpuilu eyi bua kulombola mudimu wa Bukalenge buende. Malu adibu balongeshamu adi ambuluisha muntu yonso bua kuenza mudimu wende bimpe.” Patudi tumona mudi bamanyishi ba Bukalenge bavua 58 000 patupu mu 1938 bavule mpindieu bapite pa 7 000 000 mu 2009, bidi bimueneka patoke ne: mpuilu ya tshijengu mmikumbaje tshipatshila tshiayi tshia kuambuluisha bamanyishi ‘bua kuenza mudimu wabu bimpe.’
2. Mmalu kayi atualonga mu mpuilu wa tshijengu wa tshidimu tshipiatshipia tshia mudimu?
2 Tshiena-bualu bua tshidimu tshialua: Tudi bindile ne disanka mpuilu wa tshijengu watuadija mu ngondo wa tshitema bua alue kutukankamija. Tshiena-bualu tshiende ntshiangatshila mu Yone 15:19 ne tshidi tshiamba ne: ‘Kanuena ba pa buloba.’ Ngimue miyuki kayi yambuluisha bambi ba lumu luimpe? Mu Disambombo netumvue muyuki udi wamba ne: “Mudimu wa bumpanda-njila udi utulama: mmushindu kayi?” Netumvue kabidi muyuki wa bitupa bisatu udi wamba ne: “Kabanunyangi kudi . . .” “Nyama wa luonji,” “Mukaji wa masandi munene,” ne “Bangenda mushinga.” Mu Dialumingu netuteleje muyuki wa bitupa bia bungi udi wamba ne: “Nunange Yehowa, kanunangi malu a pa buloba.” Netuteleje kabidi miyuki idi ilonda eyi: “Nutungunuke ‘bu benyi ne bena luendu,’” ne “Nukoleshe muoyo! Nudi mua kupita ba pa buloba bukole.”
3. Mmalu mimpe kayi atuapeta tuetu babuele mu mpuilu wa tshijengu?
3 Muanetu mukuabu wa bakaji uvua katshiyi uyisha bikole wakafunda panyima pa dibuela mu mpuilu wa tshijengu mushale ne: mpuilu au uvua mumuambuluishe bua kukonkonona nsombelu wende ne kudisuika bua ‘kupatuka bua kuenza mudimu pamutu pa kudibingisha.’ Kakuyi mpata mpuilu wa tshijengu wa tshidimu tshipiatshipia tshia mudimu neatuambuluishe bua kunanga Yehowa pamutu pa kunanga malu a pa buloba. (1 Yone 2:15-17) Enza muebe muonso bua kubuelamu ne kuteleja bua mpuilu eu akuambuluishe.