Longesha bana bebe bua kulua bena Kristo
1. Musambu wa 148:12, 13 udi usaka baledi bena Kristo bua kuenza tshinyi?
1 Yehowa udi ulomba bansonga bua kumutumbisha. (Mus. 148:12, 13) Nunku, nansha mudi baledi bena Kristo mua kubalongesha malu adi mu Bible, badi ne bua kubalongesha kabidi bua kuluabu bambi ba lumu luimpe. Baledi badi mua kuenza tshinyi?
2. Leja mudi tshilejilu tshimpe tshia muledi mua kuambuluisha bana.
2 Tshilejilu tshimpe: Gideona wakambila bantu bende 300 ne: “Nuntangile meme.” (Bal. 7:17) Bana batu batangila baledi babu bua kubidikija. Tatu mukuabu uvua wenza mudimu butuku, upingana kuende anu mu dinda mutshioke yonso. Kadi bua mu Disambombo mu dinda, uvua wanji kuya ne bana bende mu buambi. Nanku uvua uleja bana bua kuteka mudimu wa buambi kumpala kua malu makuabu. (Mat. 6:33) Bana bebe batuku bakumona usambila, ubala Bible, wandamuna mu bisangilu, uyisha anyi wenza malu makuabu a buena aa ne disanka dionso anyi? Mu bulelela, kuena mua kuikala tshilejilu tshidi katshiyi kalema to. Kadi bana nebalonde biudi ubalongesha pikalabu bakumona utendelela Yehowa ne muoyo mujima.—Dut. 6:6, 7; Lomo 2:21, 22.
3. Mmalu kayi atudi mua kulongesha bana betu kakese kakese bua kukumbaja?
3 Malu audi mua kubalongesha kakese kakese: Baledi kabatu batshioka bua kulongesha bana babu bua kuenda, bua kuakula, bua kudivuadila bilamba anyi bua kuenza malu makuabu to. Kadi padi bana bakola, batu babalongesha malu mapiamapia. Baledi bena Kristo batu kabidi babalongesha mua kuenza amue malu a mu ntendelelu wa Yehowa bilondeshile bidimu biabu ne lungenyi luabu. (1 Kol. 9:26) Utuku ulongesha bana mua kuandamuna mu bisangilu mu abu mêyi anyi? bua kudilongoluela midimu ya mu Kalasa ka Mudimu wa Nzambi anyi? (Mus. 35:18) Utuku ubalongesha mua kuyisha mu mishindu mishilashilangane anyi? Utuku ubaleja ne: bidi bikengela kutambula ne kulua bu mudi bampanda-njila anyi? Utuku udienzeja bua bikale basomba ne bena Kristo batu banange bikole mudimu wa buambi anyi?—Nsu. 13:20.
4. Padi baledi batuadija kulongesha bana babu mua kuyisha patshidibu bapuekele, bidi mua kuambuluisha bana aba mushindu kayi?
4 Mufundi wa Musambu wa 71 wakamba ne: ‘Nzambi, wewe wakunyisha ku buana buanyi too ne mpindieu; too ne mpindieu ntshidi ngambila bantu bua bienzedi biebe bia kukema.’ (Mus. 71:17) Bangisha kulongesha bana bua kuyisha anu patshidibu bapuekele. Malu audi ubalongesha aa neabambuluishe paluabu bantu bakole.—Nsu. 22:6.