‘Dîna dia Nzambi ditumbe’
1. Mpuilu wa tshijengu wa tshidimu tshia mudimu tshia 2012 neikale ne tshiena-bualu kayi? Mbatshiangatshile mu mvese kayi?
1 Tudi ne diakalenga dinene dia kuikala ne dîna dia Mfumu wa diulu ne buloba, ki mmuomu anyi? Nzambi nkayende ke uvua mutupeshe dîna diende. Katshia nangananga tuapeta dîna dia Bantemu ba Yehowa mu 1931, tudi bamanyike ku dîna dia Yehowa. (Yesh. 43:10) Muana wa Nzambi umuepele mulela uvua unemeka bikole dîna dia Nzambi; tshilejilu, uvua mupeshe dîna edi muaba wa kumpala mu disambila dia Tatu wetu. (Mat. 6:9) Tshiena-bualu tshia mpuilu wetu wa tshijengu wa 2012 ntshiangatshila mu disambila edi. Tshidi ne: “Dîna dia Nzambi ditumbe.”
2. Mmalu kayi atudi bindile ne muoyo kulu kulu?
2 Malu atuikala mua kumvua: Muyuki kampanda wa mu Disambombo udi ne mutu wa bualu ne: “Ikala mpanda-njila bua kumanyisha dîna dia Nzambi”; neuleje bulenga bua kuikala mpanda-njila. Netuteleje muyuki wa bitupa binayi udi ne mutu wa bualu ne: “Wamanya! Kupendeshi dîna dia Yehowa to!” Nebatulejamu mishindu itudi katuyi mua kukuatshika mu mateyi kampanda anayi. Muyuki udi mutu wa bualu ne: “Bua tshinyi dîna dia Nzambi didi ne bua kutumba?” newandamune nkonko ibidi eyi: Ntshinyi tshiatuambuluisha bua kuyisha ne disuminyina nansha bantu bobu kabayi batamba kuitaba mukenji? ne Tshidi mua kutuambuluisha bua kupatula bipeta bimpe mu buambi ntshinyi? Mu Dia lumingu netuteleje muyuki wa bitupa binayi watuleja mua kutumbisha dîna dia Nzambi mu meji, mu ngakuilu, mu mapangadika ne mu bikadilu bietu. Muyuki wa patoke udi wamba ne: “Yehowa neatumbishe dîna diende dinene ku Armagedone.” Muyuki eu newambuluishe nangananga bantu bapiabapia.
3. Tudi ne diakalenga kayi? Mpuilu neatuambuluishe mushindu kayi?
3 Yehowa ukadi pa kuenza bua kutumbisha dîna diende. (Yeh. 36:23) Kadi patutshidi bindile dituku adi, lelu eu tudi ne diakalenga dimpe ditambe dia kuleja mutudi bitabe malu onso adi dîna dinsantu edi diumvuija. Tudi bashindike ne: mpuilu eu neambuluishe muntu yonso bua kuambula bujitu bunene butudi nabu bua kubikidibua ku dîna dia Nzambi.