‘Tungunukayi ne kuenza nunku’
Netuenze Tshivulukilu mu dia matuku 5 a ngondo 4
1. Tshivulukilu tshia lufu lua Yezu tshidi ne mushinga wa bungi bua tshinyi?
1 ‘Tungunukayi ne kuenza nunku bua kumvuluka.’ (Luka 22:19, NW) Yezu wakambila bayidi bende mêyi aa bua kuikalabu bavuluka lufu luende. Patudi tutangila malu onso adi mulambu wa Yezu utuenzela, tudi tumona ne: kakuena dituku dikuabu didi ne mushinga wa bungi bua bena Kristo kupita dituku dia Tshivulukilu tshitubu benza tshidimu tshionso to. Bu mudi Tshivulukilu tshituenza mu dia 5 ngondo 4 tshidimu etshi tshienda tshisemena, mmushindu kayi utudi mua kuleja Yehowa dianyisha?—Kolos. 3:15.
2. Leja mushindu utudi mua kuleja dianyisha bua Tshivulukilu patudi tulonga ne tuelangana meji.
2 Tudilongolole: Misangu ya bungi tutu tudilongolola bua malu atutu tuangata ne mushinga. Tuetu tulonga mu dîku malu avua menzeke mu matuku a ndekelu a Yezu pa buloba, ne tuelelanganapu kabidi meji, dîba adi tudi tulongolola mutshima wetu bua Tshivulukilu. (Eze. 7:10) Imue mvese itudi mua kubala idi mu kalandriye ne mu kakanda ka Tukonkononayi mifundu dituku dionso. Kadi mu Tshibumba tshia Nsentedi tshia dia 1/2/2011 (dib. 23, 24) mudi mvese yonso ya kubala; badi balejamu nshapita ya mu mukanda wa Muntu mutambe bunene idi yakula bua mvese ayi.
3. Leja tshitudi mua kuenza bua kuleja dianyisha bua Tshivulukilu.
3 Tuyishe: Tudi mua kuleja kabidi dianyisha dietu patudi tuyisha bikole. (Luka 6:45) Kutuadija mu Disambombo dia 17 ngondo 3, netutuadije kuabanyina bantu pa buloba bujima mabeji a kubabikila nawu mu Tshivulukilu. Udiku mua kuakaja programe webe bua kuyisha bikole, kulua mene nansha mpanda-njila muambuluishi anyi? Kanuenaku mua kuyukila bua bualu ebu mu Ntendelelu wenu wa mu Dîku wa musangu walonda anyi?
4. Mmalu mimpe kayi atuapeta patuenza Tshivulukilu?
4 Kubuela mu Tshivulukilu tshidimu tshionso kudi kutuambuluisha bikole be! Patudi tuelengana meji bua mudi Yehowa mutupeshe Muanende umuepele mulela bu mulambu, tudi tuvudija disanka ne dinanga ditudi nadi kudiye. (Yone 3:16; 1 Yone 4:9, 10) Bualu ebu budi butusaka bua kubenga kuikala ne muoyo anu bua bualu buetu nkayetu. (2 Kol. 5:14, 15) Budi kabidi butusaka bua kutumbisha Yehowa ku mêsu kua bantu bakuabu. (Mus. 102:19-21) Batendeledi ba Yehowa badi ne dianyisha. Ke bualu kayi mbidile ne muoyo kulu kulu mpunga utuikala nende bua ‘kuambila bantu bua lufu lua Mukalenge’ mu Tshivulukilu, mu dia 5 ngondo 4.—1 Kol. 11:26.