Udiku mudiakaje bua kushintulula malu anyi?
1. Bu mudi malu ashintuluka mu bulongolodi ebu, bidi bikengela kushintulula malu kayi?
1 Mu 1 Kolinto 7:31, Bible udi ufuanyikija bulongolodi ebu ne tshinayilu mudi banayi ne manaya ashintulukangana. Bu mudi malu ashintuluka mu bulongolodi ebu, bidi bikengela kushintulula ku musangu ne ku musangu mushindu wetu wa kuyisha, programe wetu, ne mushindu wa kutuadija muyuki ne bantu. Udiku musue kushintulula malu anyi?
2. Tuetu basue kuenda pamue ne bulongolodi bua Yehowa, bua tshinyi tudi ne bua kuikala tushintulula malu?
2 Mushindu wetu wa kuyisha: Tshisumbu tshia bena Kristo tshitu tshienza malu bilondeshile nsombelu wa muaba uditshi. Pavua Yezu mutume bayidi bende musangu wa kumpala bua kuyisha, wakabambila bua kabambudi tshibombi tshia kuela biakudia anyi makuta to. (Mat. 10:9, 10) Kadi pashishe, wakashintulula mibelu eyi bua buluishi buvua ne bua kukuata bayidi bende ne bua muvuabu mua kuyisha ne mu teritware mikuabu. (Luka 22:36) Munkatshi mua bidimu bipite pa lukama, bulongolodi bua Yehowa mbuenze mudimu ne mishindu mishilangane bu mudi: kuyisha ne tuarte tua bumanyishi, tudiomba ne mashinyi a bikolokolo bilondeshile nsombelu uvuaku tshikondo atshi. Bu mudi miaba ya bungi bantu kabayi batamba kusomba kumbelu matuku etu aa, bulongolodi budi butamba kuakula bikole bua kuyisha miaba idi bantu ba bungi ne padi mpunga umueneka nansha mutudi ne bua kuyisha ku nzubu ne ku nzubu. Batu kabidi batukankamija bua kuyisha ku nzubu ne ku nzubu ku dilolo pikala bantu ku midimu mu munya. Bu mudi tshidiendelandela tshia Yehowa tshia mu diulu tshishintulula lubilu luatshi, udiku wenda natshi tshiapamue anyi?—Yeh. 1:20, 21.
3. Leja mudi kushintulula malu kutuambuluisha bua kuyisha bimpe mu teritware wetu.
3 Mua kutuadija muyuki: Mmalu kayi adi atonda bantu ba muaba unudi patudi tuakula apa? Mmalu a makuta anyi? Nga mêku anyi? Nga mvita anyi? Mbimpe kumanya malu ne nsombelu idi nayi bantu ba muaba unudi bua kumona mua kudilongolola bua kutuadija kuyukila nabu bilondeshile malu abu. (1 Kol. 9:20-23) Padi bantu bakula, pamutu pa kubandamuna anu tshituvua balongolole ne kutungunuka ne muyuki wetu, mbimpe kushintulula malu ne kuyukila nabu bilondeshile majinga abu.
4. Tudi ne bua kushintulula malu ne lukasa bua tshinyi?
4 Mu matuku makese emu, “malu” a pa buloba ebu neajike ne dikenga dinene nedituadije. “Dîba didi dishale ndikese.” (1 Kol. 7:29) Nanku mbimpe tuetu kushintulula malu katuyi tujingakana bua tuenze mudimu bikole mu dîba dikese didi dishale.