Londayi tshilejilu tshia baprofete: Amosa
1. Tshilejilu tshia muprofete Amosa tshidi mua kutukankamija bua tshinyi?
1 Ukadiku mudiumvue kuyi mukumbane bua kuyisha bualu udi mulonge tulasa tukese peshi bualu udi mu dîku dia bapele anyi? Biobi nanku, tshilejilu tshia Amosa netshikuambuluishe bua kuikala ne dikima. Uvua mulami wa mikoko, uvua kabidi wenza midimu ya madimi, kadi Yehowa wakamupesha bukole bua kuyisha mukenji wa mushinga mukole. (Amo. 1:1; 7:14, 15) Bia muomumue, Yehowa udi wenza mudimu ne bantu bapuekele matuku etu aa. (1 Kol. 1:27-29) Tshilejilu tshia muprofete Amosa tshidi mua kutulongesha malu kayi makuabu bua mudimu wetu wa buambi?
2. Padibu batuluisha mu mudimu wa buambi, tudi ne bua kushala bashindame bua tshinyi?
2 Ushale mushindame padibu bakuluisha: Pavua Amasaya (muakuidi wa mu bukalenge bua bisa dikumi bia Isalele uvua utendelela kana ka ngombe) mumvue Amosa wamba mêyi a buprofete, wakamuandamuna bienze anu bu uvua wamba ne: ‘Ndaku kuenu! Lekela kutuela mitoyi! Tudi ne wetu nzambi!’ (Amo. 7:12, 13) Pavuaye ulomba mukalenge Yalobama bua akandike mudimu wa Amosa, Amasaya wakakonyangaja mêyi a muprofete eu. (Amo. 7:7-11) Kadi Amosa kakatshina to. Lelu, bamue bamfumu ba bitendelelu batu bakeba diambuluisha kudi bena tshididi bua kukengeshabu bantu ba Yehowa. Kadi, Yehowa udi utujadikila ne: kakuena tshiamu tshia mvita nansha tshimue tshidibu batula bua kutuluisha natshi tshidi mua kushala ne diakalengele.—Yesh. 54:17.
3. Mmalu kayi abidi atudi tumanyisha bantu lelu?
3 Manyisha bantu dilumbuluisha dia Nzambi ne masanka atshilualua: Nansha muvua Amosa mumanyishe bena mu bukalenge bua bisa dikumi bia Isalele dilumbuluisha dia Yehowa, ku ndekelu kua mukanda wa mu Bible udi ne dîna diende, wakajikija ne mulayi wa Yehowa wa kumbusha bena Isalele mu bupika ne wa kubatuadila masanka a bungi. (Amo. 9:13-15) Tudi petu tuambila bantu bua “dituku dia dilumbuluisha” dia Nzambi didi dienda dilua, kadi kuambila bantu bua dituku edi ntshitupa patupu tshia ‘lumu luimpe lua Bukalenge’ lutudi ne bua kuyisha. (2 Pet. 3:7; Mat. 24:14) Dibutula dia bantu babi kudi Yehowa ku Armagedone nediunzuluile mparadizu njila.—Mus. 37:34.
4. Tshidi tshitujadikila ne: netuenze disua dia Yehowa ntshinyi?
4 Kuyisha mukenji wa Bukalenge mu bulongolodi mudi baluishi ba bungi kudi bushuwa kuteka dipangadika dietu dia kuenza malu mu diumvuangana ne didilambula dietu kudi Yehowa ne dia kuenza disua diende mu diteta. (Yone 15:19) Nansha nanku, tudi bajadike ne: Yehowa neatungunuke ne kutupesha bitudi nabi dijinga bua kuenza disua diende anu muvuaye muenzele Amosa.—2 Kol. 3:5.