Ngondo wa 8: ngondo wa dikema bua kuyisha

1. Mmudimu kayi wa pa buawu utuenza pa buloba bujima?

¹ Bu mudi bidimu 100 bia mufikilu wa diledibua dia Bukalenge bua Nzambi bikadi bikumbana, mbikumbane menemene bua kuenza mudimu wa diabanya trakte pa buloba bujima bua kutumbisha Yehowa. Mu ngondo wa 8, netuabanye pa buloba bujima trakte udi ne tshiena-bualu ne: Udi mua kupetela mandamuna a nkonko minene muaba kayi? Trakte eu neakankamije bantu bua kukeba mandamuna mu Bible ne nealeje mudi site wetu wa jw.org mua kubambuluisha.

2. Ntshinyi tshitudi mua kuenza bua ‘kuela mbila ne dîyi dikole bua kutumbisha Yehowa’ mu ngondo wa 8?

² Kuela mbila ne dîyi dikole bua kutumbisha Yehowa: Mu ngondo wa 8, mbalongolole malu mu mushindu wa pa buawu bua kuambuluisha bamanyishi bonso badi basue kulua bampanda-njila bambuluishi bua kuvudijabu mudimu wabu. Mu ngondo eu, mbanyishile bamanyishi bakadi babatijibue bua kuenza bumpanda-njila bua mêba 30. Bu mudi ngondo wa 8 muikale ne matuku atanu a Ditanu, Disambombo ne Dia lumingu, bamanyishi ba bungi badi ku midimu yabu anyi badi baya mu tulasa munkatshi mua lumingu nebikale ne mushindu wa kulua bampanda-njila bambuluishi. Wewe ne mulongi wa Bible udi ukumbaja malu malomba anyi ne muanebe udi musue kulua muambi wa lumu luimpe, wambile mutangidi wa malu a kasumbu ka bakulu diakamue. Nebitukankamije bikole bua kumona bantu ba nunku balua bamanyishi bu tuetu bua kuyisha mu ngondo wa pa buende eu. Nansha mutu bampanda-njila ba pa tshibidilu ba bungi bikisha mu ngondo wa 8, panyima pa bamane kukumbaja mêba malomba bua tshidimu tshijima, badi anu mua kuakaja programe wabu bua kuyisha bikole mu ngondo eu. Mpindieu ke tshikondo tshidi bena mu mêku mua kuyukidilangana bua muikalabu pabu mua ‘kuela mbila ne dîyi dikole bua kutumbisha Yehowa’ mu ngondo wa 8.​—Eze. 3:11; Nsu. 15:22.

3. Ntshinyi tshitudi batekemene bua mudimu wa pa buawu eu?

³ Nansha mutuvua benze mudimu wa muomumue eu tshidimu tshishale, tudi batekemene ne: bua musangu eu, mudimu eu newikale wa dikema. Katuenaku mua kuvudija bungi bua mêba etu, bungi bua bamanyishi ne bua bampanda-njila bambuluishi mu ngondo eu anyi? Bu mutukadi ku ndekelu kua tshidimu tshia mudimu tshia 2014, tudi tulomba Yehowa bua abeneshe bionso bidi bantu bende benza pa buloba bujima bua kuvuija ngondo wa 8 ngondo munene wa katshia ne katshia wa kuyisha.​—Mat. 24:14.