Londayi tshilejilu tshia baprofete: Nahuma
1. Mukanda wa Nahuma udi utulongesha tshinyi?
1 Anu muvua Nahuma mudianjile kumanyisha, dibutuka dia tshimenga tshia Ninewe didi dijadika mudi Yehowa udisombuela kudi baluishi bende, dileja kabidi ne: nansha baluishi ba luonji lua mushindu kayi kabena mua kumukandamena to. (Nah. 1:2, 6) Dikonkonona bimpe mulayi wa buprofete wa Nahuma didi ditulongesha malu a bungi bua mudimu wetu wa buambi.
2. Ntshinyi tshitudi mua kuenza bua mukenji wetu wikale muimpe?
2 Udi utusamba ne utupesha ditekemena: Tuetu katuyi babale mukanda wa Nahuma ne ntema, tudi mua kumona anu bu ne: udi wakula anu bua dibutuka divua ne bua kufikila Ninewe, tshimamuende wa bukalenge tshia Ashû wa kale. (Nah. 1:1; 3:7) Kadi kumanyisha dibutuka edi kuakalua lumu luimpe bua bantu ba Yehowa. Dîna Nahuma didi diumvuija “Musambi,” divua dijadikila bena Yuda ne: mu matuku makese baluishi babu bavua ne bua kubutuka. Nahuma wakalua kuamba ne: Yehowa udi “tshinyemenu mu dituku dia ntatu.” (Nah. 1:7) Patudi tuyisha, tudi petu tuambila bantu lumu luimpe ne tubalomba bua kunyemena kudi Yehowa.—Nah. 1:15.
3. Leja mutudi mua kufila bilejilu anu bu Nahuma.
3 Fila bilejilu: Yehowa wakasaka Nahuma ku diambuluisha dia nyuma wende bua kufuanyikija dibutuka dia Ninewe ne dia tshimenga tshia Thèbes tshia mu Ejipitu tshikavuabu babutule kudi bena Ashû. (Nah. 3:8-10) Patudi tuambila bantu bua nshikidilu wa ndongoluelu wa malu eu, tudi mua kubambila milayi ya buprofete ya mu Bible idi ijadika ne: Yehowa utu ukumbaja mêyi ende too ne mu katoba. Tshilejilu, pavua bena Babilona ne bena Madai balue kuluisha tshimenga tshia Ninewe mu 632, mvula mukole wakuwuja musulu wa Tigre, mâyi kupulawu tshitupa tshia tshimenga atshi tshivua ne bimanu bile menemene. Bakakuata Ninewe ne lukasa luonso anu muvua Yehowa muambe.—Nah. 1:8; 2:6.
4. Mmushindu kayi utudi mua kutokesha ne kuamba malu adi umvuika bimpe patudi tuyisha?
4 Tokesha malu bimpe ne ikale umvuika: Malu adi mu mukanda wa Nahuma mmafunda mu mushindu udi umvuika bimpe menemene. Malu onso adimu mmatokesha bimpe. (Nah. 1:14; 3:1) Bia muomumue, tudi basue kuakula mu mushindu udi bantu mua kumvua bipepele. (1 Kol. 14:9) Paudi uya kutangila muntu bua musangu wa kumpala, umuleje patoke tshiudi muluile. Paudi ulonga Bible ne bantu, ubambuluishe bua bitabuje Yehowa ne Dîyi diende ne bua bumvue ne: malu adibu balonga adi abatangila.—Lomo 10:14.
5. Mêyi a buprofete a Nahuma adi atushindikila tshinyi?
5 Dieyemena divua nadi Nahuma mu dikumbana dia mêyi a Yehowa didi dimueneka bimpe mu mukanda udi ne dîna diende. Bu mudi nshikidilu wa ndongoluelu wa Satana musemene pabuipi, mêyi a Nzambi aa adi atukolesha: ‘Dikenga kadiakulua kudibu musangu muibidi’ to.—Nah. 1:9, NWT.