Tuakajayi mishindu yetu ya kuyisha: Mua kuandamuna muntu udi ne tshiji

Mushinga: Bantu ba bungi batutu tupetangana nabu mu buambi batu ne bukalanga. Kadi, Yezu wakadianjila kumanyisha ne: bamue bantu nebatukine. (Yone 17:14) Nanku, kabiena ne bua kutukemesha patudi tupetangana ne muntu udi ne tshiji to. Bu mutudi baleji-mpala ba Yehowa, padibi bitufikila, tudi basue kuandamuna mu mushindu udi umusankisha. (Lomo 12:17-21; 1 Pet. 3:15) Kuenza nanku nekuambuluishe pamuapa bua kubenga kunyangakaja malu. Nekutuambuluishe kabidi bua kuyisha muntu au anyi bantu bakuabu badi batutangile, bibasaka bua kuikala badiakaje bua kuteleja Bantemu balua kubatangila musangu mukuabu.—2 Kol. 6:3.

Mushindu wa kuenza malu:

Wikale ne lutulu ne bulenga. Bidi mua kutuyisha tshiji tshiende. Kumonyi bu ne: muntu mukufikile wewe munda to. (Muam. 7:9) Udi mua kuikala mufike munda bua ende malu anyi bualu udi mulue kumutangila dîba dibi. Nansha biobi ne: mmufike munda bua mukenji wetu, bidi nanku bualu mbamupambuishe.—2 Kol. 4:4.
Umuandamune ne mêyi mimpe ne kanemu. (Nsu. 15:1) Uvuaku mumubishe ku tulu peshi mukose tshivuaye wenza anyi? Nansha mututu katuyi tulomba luse bua kuyisha muntu, udi mua kumulomba luse ne budipuekeshi bua muudi mulue kumutangila dîba dibi. Mmufike munda bua malu a dishima adiye mumvue bua bualu buetu anyi? Biobi nanku, udi mua kumuambila ne: “Ndi mumvue bua tshinyi udi mufike munda. Kadi, bidi bimueneka ne: malu audi mumvue au nga dishima. Ndiku mua kukumvuijawu anyi?” Udiku ubenga dimue dia ku malongesha etu, bu mudi dia kuipata bantu mu tshisumbu peshi dia mashi anyi? Udi mua kumuambila ne: “Ndi nkumvuila. Bantu bakuabu batu pabu bamba anu bu wewe. Ndiku mua kukuleja muaba udi dilongesha adi mu Bible anyi?”
Muntu yeye ne tshiji tshikole menemene, bidi mua kuikala bimpe bua kumbuka katuyi bambe dîyi. Yeye munuambile ne: ki mmusue bua Bantemu ba Yehowa balue kumutangila mukuabu musangu, numujadikile ne: nenunemeke dijinga diende.

Tshitudi mua kuenza mu ngondo eu:

Nuenze manaya mu ntendelelu wenu wa mu dîku.
Panudi numbuka kumbelu kua muntu uvua ne tshiji, nuyukile ne mumanyishi unudi nende bua munuvua mua kuikala bamuandamune bimpe.