Tuakajayi mishindu yetu ya kuyisha: Kuyisha muntu udi wakula muakulu mukuabu

Mushinga: Yehowa mmusue bua bantu ba “mu tshisamba tshionso” bikale mu malanda mimpe nende. (Bien. 10:34, 35) Ke bualu kayi Yezu wakaleja ne: bavua ne bua kuyisha lumu luimpe “pa buloba bujima budi bantu basombe” ne “kudi bisamba bionso.” (Mat. 24:14) Muprofete Zekâya wakamba ne: ‘bantu ba mu muaku ne mu muaku’ bavua ne bua kuluitaba. (Zek. 8:23) Bilondeshile tshikena kumona tshivua mupostolo Yone mumone, mu bantu bavua ne bua kupanduka mu dikenga dinene muvua ne bua kuikala bantu ba “mu matunga onso ne mu bisamba bionso ne mu bantu bonso ne mu miakulu yonso.” (Buak. 7:9, 13, 14) Bilondeshile malu aa, patudi tupeta muntu udi wakula muakulu mukuabu mu teritware wetu, tudi ne bua kudienzeja bua kumuyisha.