Mandamuna a nkonko yenu

▪ Bamanyishi badiku mua kubuela mu Enternete bikole bua kuyisha bantu ba mu matunga makuabu anyi kulonga nabu anyi?

Bamue bamanyishi batu babuela mu Enternete bua kupeta bantu ba kulonga nabu Bible badi mu matunga adibu bakandike midimu yetu anyi adi ne bamanyishi bakese. Imue misangu, bavua bapete malu mimpe. Kadi kudi njiwu padi bamanyishi bafundila bantu badibu kabayi bamanye ku Enternete anyi bayukila nabu. (Bala Mudimu wetu wa Bukalenge wa 7/2007, dib. 3.) Nansha mudi dijinga dikale dia kupeta bantu ba muoyo muakane bua kubayisha, kuyukidilangana kua mushindu eu kudi mua kufikisha muanetu mukuabu ku didia bulunda ne bantu babi, nansha batontolodi mene. (1 Kol. 1:19-25; Kolos. 2:8) Bualu bukuabu, mu matunga adibu bakandike mudimu wetu, bamfumu ba mbulamatadi badi mua kulondesha malu onso anudi nufundilangana. Diyukidilangana dia mushindu eu didi mua kukebela bana betu njiwu. Nunku, bamanyishi kabena ne bua kuya ku Enternete bua kukeba bantu ba mu ditunga dikuabu badibu mua kuyisha to.

Betele wa mu ditunga dienu yeye kayi munuleje tshikuabu tshia kuenza, nuenu bayishe muenyi udi mufume mu ditunga dikuabu pavua mpunga mumueneke, kanuena ne bua kukolesha dijinga diende padiye upingana kuabu to. Kadi nudi mua kumuleja mudiye mua kubuela mu site wa jw.org bua kumanya malu makuabu ne mudiye mua kufundila Betele wa mu ditunga diabu. Nudi kabidi mua kumulomba bua kuya ku Nzubu wa Bukalenge udi pabuipi nende. Bushuwa, mu amue matunga kamutu Nzubu ya Bukalenge to. Yeye musue bua balue kumutangila kudi Ntemu wa muaba udiye, nudi mua kuuja formilere wa Veuillez suivre l’intérêt (S-43) ne kumupesha sekretere, wikala ne bua kumutuma ku diambuluisha dia jw.org. Betele udi utangila mudimu mu ditunga didi muntu udi muleje dijinga mmumanye malu a mu ditunga adi ne mmukumbane bua kuambuluisha muntu au mu nyuma.​—Bala Mudimu wetu wa Bukalenge wa 6/2014, dib. 7, ne wa 11/2011, dib. 2.

Muntu utudi tupinganyina matuku aa yeye mumbuke muye mu ditunga dikuabu anyi bituikala tulonga mpindieu ne muntu udi mu ditunga dikuabu utudi bamanyine anu ku Enternete, tudi ne bua kulonda malu atudi baleje aa. Kadi tudi mua kutungunuka ne kukolesha dijinga diende tòo ne padibu bapetangana ne bamanyishi ba muaba udiye au. Nansha nanku, bikalaye musombele mu ditunga didibu bakandike mudimu wetu, tudi ne bua kuikala ne budimu bua bungi patudi tuyukila nende malu a mu Bible ku diambuluisha dia mikanda itudi tumufundila, dia telefone anyi dia biamu bikuabu.​—Mat. 10:16.