Tuakajayi nyishilu wetu—Mua kuimanyika dilonga didi kadiyi diya kumpala

MUSHINGA: Bua bantu kupandishibua badi ne bua kubila dîna dia Yehowa. (Lom 10:13, 14) Kadi ki mmuntu yonso udi witaba dilonga dia Bible utu musue kutumikila mikenji ya Yehowa to. Tudi tuenza mudimu bimpe ne dîba dietu mu mudimu wa buambi patudi tuambuluisha bantu badi bushuwa basue kushintuluka bua kusankisha Yehowa. Mulongi wa Bible yeye kayi uya kumpala mu bule bua tshikondo kampanda tshiakanyine, mbimpe tuetu kuimanyika dilonga ne kufila dîba dietu bua kuambuluisha bantu badi Yehowa ukoka kudiye mu bulongolodi buende. (Yne 6:44) Muntu uuvua ulonga nende Bible yeye mulue kuenza mashintuluka adi aleja ne: ‘mmuakaje muoyo wende bimpe bua kupeta muoyo wa tshiendelele,’ udi mua kutuadijilula nende dilonga dia Bible ne disanka dionso.—Bz 13:48.

TSHIA KUENZA:

• Ela mulongi kalumbadi bua mudiye musue kupeta dimanya dijalame.—1Tm 2:4

• Tamba kumuleja mushinga wa ditumikila malu adiye mulonge.—Luk 6:46-49

• Muleja ne bulenga buonso tshilejilu tshia Yezu tshia mukunyi wa mamiinu, ne mulomba ela meji bua tshidi tshimupangisha bua kuya kumpala.—Mat 13:18-23

• Mumvuija ne bulenga buonso tshiudi wimanyikila dilonga

• Muambila ne: newikale ulua kumutangila ku musangu ne ku musangu bua kumukankamija, umuleje kabidi ne: yeye muenze mashintuluka mu matuku adi alua kumpala, nenutuadijilule dilonga adi

NUTANGILE FILME, PASHISHE NUANDAMUNE NKONKO EYI:

• Tshidi tshileja mu muyiki eu ne: mulongi wa Bible kavua uya kumpala ntshinyi?

• Mmunyi muvua muanetu wa balume eu mufikishe mulongi ku diumvua ne: bivua bikengela enze mashintuluka?

• Tshivua mumanyishi muenze bua mulongi kumona ne: yeye muakaje malu bavua mua kulua kubangulula dilonga matuku avua alua ntshinyi?