Tudi banange Yehowa Tatu wetu bikole menemene

1-2. Bua tshinyi Yehowa mmutunzuluile njila wa kubuela mu dîku diende? Mmunyi muvuaye muenze bualu ebu?

YEHOWA mmutubikile bua tubuele mu dîku dia batendeledi bende. Edi ndiakalenge dia dikema! Dîku dietu ndienza ne bantu badi badilambule kudi Nzambi ne badi baleja ditabuja mu mulambu wa Muanende udi upikula bantu. Dîku dietu ndîku dia disanka. Tudi ne nsombelu wa nsongo mpindieu, ne tudi ne disanka dia kuikala ne ditekemena dia muoyo wa kashidi, mu diulu anyi mu Mparadizu pa buloba.

² Dinanga diakasaka Yehowa bua kutunzuluila njila wa kubuela mu dîku diende. Bua kuenza bualu ebu, bivua bimulombe bua kufila tshintu tshia mushinga wa bungi menemene. (Yone 3:16) Uvua ‘mutusumbe ku mushinga kampanda.’ (1 Kol. 6:20) Ku diambuluisha dia tshia kupikulangana natshi, Yehowa mmutupeshe mushindu wa kuikala nende mu malanda mashême. Tudi ne diakalenga dia kubikila Muntu mutambe bunene wa mu diulu ne pa buloba ne: Tatu. Kabidi anu mutuvua bamone mu tshiena-bualu tshishale, Yehowa nTatu udi mupite batatu bakuabu bonso.

3. Nnkonko kayi itudi mua kudiela? (Tangila kabidi kazubu ka ne: “Yehowa utu ummona meme anyi?”)

³ Tudi mua kudiebeja petu anu bu umue wa ku bafundi ba Bible ne: “Nempingajile Yehowa tshinyi bua malu mimpe onso adiye mungenzele?” (Mis. 116:12) Diandamuna didi ne: kakuena tshintu nansha tshimue tshitudi mua kupingajila Tatu wetu wa mu diulu to. Tshidibi, dinanga diende didi ditusaka bua kumunanga petu. Mupostolo Yone wakafunda ne: “Tudi tunanga, bualu yeye uvua mudianjile kutunanga.” (1 Yone 4:19) Mmu mishindu kayi itudi mua kuleja Tatu wetu wa mu diulu ne: tudi bamunange?

SHALA PABUIPI NE YEHOWA

4. Bilondeshile Yakobo 4:8, bua tshinyi mbimpe tudienzeje bua kusemena pabuipi ne Yehowa?

⁴ Yehowa mmusue bua tusemene pabuipi nende ne tuikale tuyukila nende. (Bala Yakobo 4:8.) Udi utulomba bua ‘kusuminyina mu disambila,’ ne matshi ende atu anu kutudi dîba dionso. (Lomo 12:12) Malu kaatu amupita bungi ne katu utshioka bua kututeleja to. Tuetu petu tudi tumuteleja patudi tubala Bible Dîyi diende pamue ne mikanda yetu idi ituambuluisha bua kumumvua. Tudi tumuteleja kabidi patudi tulonda bisangilu ne ntema. Bana bobu bayukila ne baledi babu pa tshibidilu, badi bashemesha nabu malanda; tuetu tuyukikila petu ne Yehowa pa tshibidilu, netushale pabuipi nende.

5. Mmunyi muudi mua kulengeja masambila ebe?

⁵ Anji elabi meji: muyuki webe ne Nzambi utu wa mushindu kayi? Yehowa mmusue bua tuikale tumusambila tumupumuina mioyo yetu. (Mis. 62:8) Diebeja ne: ‘Masambila anyi atu a pamutu pamutu makuate bu nkusu, anyi atu afumina mu muoyo menza ne muoyo mujima?’ Tudi bamanye ne: udi munange Yehowa bikole, ne udi musue kukolesha malanda enu nende. Bua wewe kuakolesha, ikala ne tshibidilu tshia kuyukila nende. Ikala umuambila yebe ya munda. Muambila malu adi akusankisha ne adi akubungamija. Ikala mutuishibue ne: udi mua kumulomba diambuluisha.

6. Ntshinyi tshitudi ne bua kuenza bua kushala pabuipi ne Tatu wetu wa mu diulu?

⁶ Bua tuetu kushala pabuipi ne Tatu wetu wa mu diulu, tudi ne bua kuikala tumuleja dianyisha. Tudi tuitaba mêyi akamba mufundi kampanda wa misambu a ne: “Bintu bungibi nunku biudi muenze, Yehowa Nzambi wanyi, midimu yebe ya kukema ne meji audi utuelela! Kakuena udi mua kufuanyikijibua nebe; bu meme mua kuteta bua kubiamba ne kuakula bualu buabi, nebikale bungi tshianana bundi tshiyi mua kulondelangana!” (Mis. 40:5) Kumvua bua kuleja dianyisha nkayaku ki nkukumbane to; mbimpe tuleje Yehowa dianyisha mu mêyi ne mu bienzedi. Patudi tuenza nanku, tudi tushilangana ne bantu ba bungi lelu bikole. Bena lelu kabatu baleja dianyisha bua malu adi Nzambi ubenzela to. Dikala diabu nanku si mbumue bua ku malu adi aleja ne: “mu matuku a ku nshikidilu” bantu kabena ne dianyisha to. (2 Tim. 3:1, 2) Tuetu katubafuanyi nansha kakese!

7. Yehowa mmusue bua tuenze tshinyi? Bua tshinyi?

⁷ Baledi kabatu basue bua bana babu bikale ne bilumbu matuku onso to, kadi batu basue bua bikale bapetangana. Yehowa pende mmusue bua bana bende bonso bikale bapetangana bimpe. Mu bulelela, dinanga ditudi banangangane nadi ke tshimanyinu tshia ne: tudi bena Kristo balelela. (Yone 13:35) Tudi tuitaba petu mêyi a mufundi kampanda wa misambu uvua mufunde ne: ‘Mbimpe ne bidi bienza disanka bua bana ba muntu kusomba pamue mu buobumue!’ (Mis. 133:1) Tuetu banange bena Kristo netu, tudi tuleja Yehowa ne: tudi bamunange. (1 Yone 4:20) Kuikala mu dîku dia bena Kristo badi ‘benzelangana malu ne bulenga, baditeka pa muaba wa bakuabu ne dinanga dionso’ mbualu bulenga bua dikema!​—Ef. 4:32.

MUTUMIKILA BUA KULEJA NE: UDI MUMUNANGE

8. Bilondeshile 1 Yone 5:3, mbualu kayi bunene budi butusaka bua kutumikila Yehowa?

⁸ Yehowa mmusue bua bana batumikile baledi babu, ne mmusue bua tuetu tumutumikile. (Ef. 6:1) Udi ukumbana kumutumikila bualu yeye ke Mufuki wetu, utu utuambuluisha bua tuikale ne muoyo, ne utu ne meji a bungi kupita baledi bakuabu bonso. Kadi bualu bunene budi butusaka bua kumutumikila mbua ne: tudi bamunange. (Bala 1 Yone 5:3.) Nansha mutudi tutumikila Yehowa bua malu a bungi, yeye katu utuenzeja bua kumutumikila to. Yehowa mmutupeshe tshipedi tshia kudisunguila malu, ke bualu kayi utu usanka patutu tumutumikila bua dinanga.

9-10. Bua tshinyi mbimpe kumanya mikenji ya Nzambi ne kuyitumikila?

⁹ Baledi batu basue bua bana babu bikale mu bukubi. Ke bualu kayi batu babelela mikenji ya bikadilu itu ibambuluisha. Padi bana batumikila mikenji ayi, badi baleja mudibu beyemena baledi babu ne babanemeka. Nunku, kumanya mikenji ya Tatu wetu wa mu diulu ne kuyitumikila kudi kutuambuluisha paku bikole menemene. Tuetu tuenza nanku, tudi tuleja ne: tudi bamunange ne tudi tumutumikila, ne bualu ebu budi butupetesha petu masanka. (Yesh. 48:17, 18) Kadi bantu badi babenga Yehowa ne mikenji yende batu bafika anu ku dikenga bua bienzedi biabu.​—Gal. 6:7, 8.

¹⁰ Tuetu ne nsombelu udi usankisha Yehowa, netudikube ku malu adi mua kutuenzela bibi ku mubidi, mu nyuma, ne adi mua kutubungamija. Yehowa mmumanye tshidi tshimpe menemene buetu tuetu. Muanetu kampanda wa mu États-Unis diende Aurora udi wamba ne: “Tshindi mumanye ntshia ne: kutumikila mikenji ya Yehowa kutu anu kupeteshangana nsombelu muimpe menemene.” Bidi kabidi nanku buetu tuetu bonso. Udi wela meji ne: kutumikila buludiki bua dinanga bua Yehowa kakutu kuanji kukuambuluisha anyi?

11. Mmunyi mudi disambila dituambuluisha?

¹¹ Disambila ditu dituambuluisha bua kutumikila, nansha padibi bikola. Imue misangu, bitu bitukolela bua kutumikila Yehowa, kadi tudi ne bua kuikala anu tuluangana ne lungenyi lua kuenza mpekatu. Mufundi kampanda wa misambu wakalomba Nzambi wamba ne: “Jula munda muanyi dijinga dia kukutumikila.” (Mis. 51:12) Muanetu kampanda mpanda-njila wa pa tshibidilu diende Denise udi wamba ne: “Patubi binkolela bua kutumikila mukenji kampanda wa Yehowa, ntu mmulomba bukole bua kuenza tshidi tshimpe.” Tuikale batuishibue ne: Yehowa utu anu wandamuna masambila a mushindu eu.​—Luka 11:9-13.

AMBULUISHA BAKUABU BUA BANANGE TATU WETU

12. Bilondeshile Efeso 5:1, tudi ne bua kuenza tshinyi?

¹² Bala Efeso 5:1. Bu mutudi “bana bananga” ba Yehowa, tudi tuenza muetu muonso bua kumuidikija. Tudi tuidikija ngikadilu yende patudi tuenzela bakuabu malu mimpe, tubenzelawu ne dinanga, ne tubafuila luse. Padi bantu badi kabayi bamanye Nzambi bamona tshikadilu tshietu tshimpe, badi mua kupeta muoyo wa kulonga malu a bungi adi amutangila. (1 Pet. 2:12) Baledi bena Kristo badi ne bua kuditatshisha bua kuenzela bana babu malu mudi Yehowa utuenzelawu. Bobu benza nanku, bana babu badi mua kupeta dijinga dia kudia malanda a nsungansunga ne Tatu wetu wa dinanga.

13. Bua kupeta dikima, tudi ne bua kuenza tshinyi?

¹³ Muana yonso eu utu udiumvua bua tatuende ne utu usanka bua kuakula bualu buende. Tuetu petu, tudi tudiumvua bua Yehowa Tatu wetu wa mu diulu ne tudi basue bua bakuabu bafike ku dimumanya. Tudi tudiumvua anu muvua mukalenge Davidi mumvue pakafundaye ne: “Meme nenditumbishile mu Yehowa.” (Mis. 34:2) Kadi tuetu ne bundu, tudi mua kupeta dikima mushindu kayi? Tudi tupeta dikima patudi tuela meji bua disanka dikala Yehowa nadi patudi tuakula bualu buende ne mudibi mua kuambuluisha bakuabu padibu balonga malu adi amutangila. Yehowa neatupeshe dikima ditudi nadi dijinga. Wakambuluisha bena Kristo netu ba kumpala bua kupeta dikima, ne neakuambuluishe pebe.​—1 Tes. 2:2.

14. Ngamue malu kayi adi atusaka bua kuvuija bantu bayidi?

¹⁴ Yehowa katu ne kansungansunga to; nunku udi usanka padiye utumona tunanga bakuabu, nansha bobu bakolele muaba kayi. (Bien. 10:34, 35) Umue wa ku mishindu minene itudi mua kunanga bakuabu nkubayisha lumu luimpe. (Mat. 28:19, 20) Mudimu eu udi mua kubapetesha tshinyi? Bantu badi batuteleja badi bakaja nsombelu yabu mpindieu ne bapeta ditekemena dia muoyo wa tshiendelele kumpala eku.​—1 Tim. 4:16.

NANGA TATU WETU BUA WIKALE NE DISANKA

15-16. Mmalu kayi adi atusaka bua kuikala ne disanka?

¹⁵ Yehowa mmuledi wa dinanga, ke bualu kayi mmusue bua dîku diende dikale ne disanka. (Yesh. 65:14) Kudi malu a bungi adi enza bua tuikale ne disanka mpindieu, nansha mutudi mua kutuilangana ne ntatu. Tshilejilu, tudi batuishibue ne: Tatu wetu wa mu diulu mmutunange bikole menemene. Tudi ne dimanya dijalame dia Bible Dîyi dia Nzambi. (Yel. 15:16) Tudi kabidi mu dîku didi kadiyi bu mêku makuabu didi dienza ne bantu badi banange Yehowa, banange mikenji yende mibandile ya bikadilu, ne banangangane.​—Mis. 106:4, 5.

¹⁶ Tudi mua kushala anu ne disanka bualu tudi batuishibue ne: nsombelu nealengele bikole kumpala eku. Tudi bamanye ne: Yehowa ukadi pa kumbusha bantu babi bonso ne buloba nebulue Mparadizu pikala Bukalenge buende bukokesha. Tudi kabidi ne ditekemena dilenga dia ne: nebabishe bafue bua kupetanganabu kabidi ne balela babu. (Yone 5:28, 29) Netshikale tshikondo tshia disanka dia katshia! Bualu bua mushinga mukole mbua ne: tudi batuishibue ne: mu matuku makese emu, banjelu bonso ba mu diulu ne bantu bonso ba pa buloba nebapeshe Tatu wetu wa mu diulu bunême, butumbi ne nebamutendelele, bualu mmukumbanyine malu onso aa.