TSHIENA-BUALU TSHIA KULONGA 13
Nunangangane bikole
“Nunangangane bikole ne muoyo umue.”—1 PET. 1:22.
MUSAMBU WA 109 Tubanange bikole mu muoyo wetu
KADIOSHAa
Pavua Yezu ne bapostolo bende butuku bua muladilu wa lufu luende, wakatamba kuakula bua dinanga (Tangila tshikoso 1-2)
1. Ndîyi kayi divua Yezu mutumine bayidi bende? (Tangila tshimfuanyi tshia pa tshizubu.)
BUTUKU bua muladilu wa lufu lua Yezu, wakatumina bayidi bende dîyi dia pa buadi. Wakabambila ne: “Anu bu mundi mununange, nuenu penu nunangangane.” Kuambaye kabidi ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”—Yone 13:34, 35.
2. Bua tshinyi bidi bikengela tunangangane?
2 Yezu wakamba ne: bavua ne bua kumanya bayidi bende balelela bimpe menemene bobu ne dinanga dia buena divuaye nadi. Ke muvuabi bienzeke tshikondo atshi, ne ke mudibi bienzeka kabidi ne lelu. Ke bualu kayi bidi bikengela tudienzeje bua kunangangana nansha padibi bikola bua kuenza nanku.
3. Ntshinyi tshituakonkonona mu tshiena-bualu etshi?
3 Dipanga bupuangane ditu ditutatshisha bua tuetu kunangangana bikole. Nansha nanku, tudi ne bua kudienzeja bua kuidikija Kristo. Mu tshiena-bualu etshi, netumone mudi dinanga dituambuluisha bua kuikala bakebi ba ditalala, katuyi ne kansungansunga, ne bakididianganyi. Paudi wenda ulonga malu adimu, diebaja ne: ‘Tshilejilu tshia bana betu badi batungunuke ne kunangangana nansha pavuabi bikola tshidi tshindongesha tshinyi?’
IKALA MUKEBI WA DITALALA
4. Bilondeshile Matayi 5:23, 24, bua tshinyi tudi ne bua kulengejangana ne muanetu udi netu tshilumbu?
4 Yezu mmutuleje mushinga wa kulengejangana ne muanetu udi netu tshilumbu. (Bala Matayi 5:23, 24.) Wakamba ushindika ne: tuetu basue kusankisha Nzambi, bidi bikengela tuikale mu malanda mimpe ne bakuabu. Yehowa udi usanka patudi tuenza muetu muonso bua kulengejangana ne bena Kristo netu. Tuetu tulaminangana munda, tubenga too ne bua kulengejangana, kakuangata mudimu utudi tumuenzela ne mushinga to.—1 Yone 4:20.
5. Ntshinyi tshivua tshitatshishe muanetu kampanda bua kukeba ditalala?
5 Bidi mua kutukolela bua kukeba ditalala. Bua tshinyi? Mona tshivua tshifikile Mark.b Pavua muanetu kampanda umubipisha ne uya wenda umuamba kudi bantu bakuabu ba mu tshisumbu, wakanyingalala bikole. Ntshinyi tshiakenzaye? Udi uvuluka wamba ne: “Ngakamuyila tshianza panshi.” Kadi pashishe, Mark wakadiela meji bua tshivuaye muenze atshi, kuditatshishaye bua kulomba muanabu au luse bua balengejangane. Kadi au wakabenga bua bobu kulengejangana. Mark wakanji kudiambila ne: ‘Yeye udi ubenga bua tuetu kulengejangana nende, tshindi nditatshishila ne dîna ntshinyi?’ Kadi mutangidi wa tshijengu wakamukankamija bua kalekedi to. Mark wakenza tshinyi?
6. a) Mmunyi muvua Mark mutungunuke ne kukeba ditalala? b) Mmunyi muvuaye mutumikile Kolosayi 3:13, 14?
6 Pavua Mark mudiele ku tshipimu, wakamona ne: uvua mupangile budipuekeshi ne uvua ne lungenyi lua kudimona mupite bakuabu. Wakajingulula ne: bivua bikengela ashintulule ngelelu wende wa meji. (Kolos. 3:8, 9, 12) Wakadipuekesha, kuyaye kudi muanetu au bua kumulomba kabidi luse bua muvuaye mumuyile tshianza panshi. Mark wakamufundila kabidi mikanda, uleja muvuabi bimutonde bua tshivuaye muenze ne muvuaye ujinga bua balengejangane. Mark wakafika too ne ku dimupesha tubintu tuvuaye umona ne: uvua mua kusanka natu. Diakabi, muanetu au yeye utshivua anu mumulamine munda. Nansha nanku, Mark wakatungunuka ne kutumikila dîyi divua Yezu mutume bua kunanga muanabu ne kumufuila luse. (Bala Kolosayi 3:13, 14.) Nansha bantu bakuabu bobu babenga kututeleja patudi tuditatshisha bua kukeba nabu ditalala, dinanga dilelela dia buena Kristo nedituambuluishe bua kutungunuka ne kubabuikidila ne kusambila batekemene ne: malu neende bimpe.—Mat. 18:21, 22; Gal. 6:9.
Bidi mua kutulomba bua kuyukila ne muanetu misangu ya bungi bua kulekela meji mabi (Tangila tshikoso 7-8)c
7. a) Yezu mmutulombe bua kuenza tshinyi? b) Ndutatu kayi luvua muanetu kampanda mupete?
7 Yezu mmutulombe bua tuikale tuenzela bakuabu malu mutudi basue bua batuenzelawu. Mmuambe kabidi ne: katuena mua kunanga anu bantu badi batunange petu to. (Luka 6:31-33) Nansha mutubi kabiyi bitamba kuenzeka, newenze tshinyi bikala muntu wa mu tshisumbu tshienu ukuepuka ne ubenga kukuela muoyo? Ke tshivua tshienzekele Lara. Udi wamba ne: “Muanetu kampanda uvua wenza anu bu ne: kavua mummanye to, ne tshivua mumanye mbua tshinyi to. Biakantonda, ne tshivua kabidi musue kuya mu bisangilu to.” Lara wakanji kudiambila ne: ‘Tshilema ki ntshianyi to. Nansha tuamba eku tuela eku, bantu bakuabu ba mu tshisumbu si mbamone pabu ne: muanetu eu ukadi wenza malu adi kaayi alonda mulongo.’
8. Ntshinyi tshivua Lara muenze bua kukeba ditalala? Tshidi tshitulongesha tshinyi?
8 Lara wakakeba tshia kuenza bua kukeba ditalala. Wakasambila Yehowa, yeye kudisuika bua kuya kuyukila ne muanabu. Bakayukila bua tshilumbu atshi, kupukilanganabu, ne kulengejanganabu. Bivua bimueneke ne: malu akenda bimpe. Lara udi wamba ne: “Muanetu au wakalua kungenzela kabidi bia buena bivuaye mungenzele kumpala abi. Biakantekesha be!” Kumpala, Lara wakamona ne: kavua mua kuikala ne disanka pavua muanabu au kayi mushintuluke to. Kadi wakalua kumona ne: tshivua tshimpe kuenza nkutungunuka ne kunanga muanabu au ne ‘kumufuila luse ne muoyo mujima.’ (Ef. 4:32–5:2) Lara wakavuluka ne: dinanga dilelela dia buena Kristo “kadiena dibalulula malu mabi. Didi dikolesha muoyo mu malu onso, ditabuja malu onso, ditekemena malu onso, dinanukila mu malu onso.” (1 Kol. 13:5, 7) Lara wakapetulula ditalala diende dia munda. Pakapita matuku, muanetu wa bakaji au wakalua kabidi mulunda wende. Paudi utungunuka ne kukeba ditalala ne bena Kristo nebe ne utungunuka ne kubananga, wikale mutuishibue ne: “Nzambi wa dinanga ne ditalala neikale [nebe].”—2 Kol. 13:11.
KUIKADI NE KANSUNGANSUNGA TO
9. Bilondeshile Bienzedi 10:34, 35, bua tshinyi katuena ne bua kuikala ne kansungansunga?
9 Yehowa katu ne kansungansunga to. (Bala Bienzedi 10:34, 35.) Tuetu katuyi petu ne kansungansunga, tudi tuleja mutudi bana bende. Tudi tutumikila dîyi dia kunanga muinetu mutudi badinange, ne tulama ditalala didi mu dîku dietu dia mu nyuma.—Lomo 12:9, 10; Yak. 2:8, 9.
10-11. Mmunyi muvua muanetu kampanda mufike ku dilekela meji mabi?
10 Kushala kuyi muena kansungansunga kudi mua kukolela bamue bantu. Mona tshivua tshifikile muanetu Ruth. Patshivuaye nsonga, muntu kampanda wa mu ditunga dikuabu wakamuenzela bualu bubi. Bualu abu buakamuenzela tshinyi? Ruth udi wamba ne: “Ngakakina bintu bionso bia mu ditunga adi. Mvua ngela meji ne: bantu bonso ba muntu amu bavua anu bu yeye, nansha bena Kristo nanyi kabidi.” Mmunyi muakalekela Ruth meji mabi au?
11 Ruth wakajingulula ne: uvua ne bua kulekela meji mabi au. Wakabala mukanda wetu wa Annuaire muvuabu balonda malu ne luapolo bia mu ditunga adi. Udi wamba ne: “Ngakaditatshisha bua kumona bantu bonso ba mu ditunga adi mu mushindu muimpe. Ngakabanga kumona ne: bana betu bavua benzela Yehowa mudimu ne tshisumi. Ngakalua kumona bimpe ne: badi pabu mu dîku dietu dia buloba bujima.” Panyima pa matuku, Ruth wakafika ku dimona ne: bivua bikengela abanange. Udi wamba ne: “Muaba wonso umvua ntuilangana ne bana betu ba mu ditunga adi, mvua ndienzeja ne muanyi muonso bua kuikala nabu bimpe. Mvua nyukila nabu ne mbamanya bimpe.” Tshiakenzeka ntshinyi? Ruth udi wamba ne: “Mu kupita kua matuku, ngakafika ku dilekela meji mabi amvua nawu.”
Tuetu ‘banange tshisumbu tshijima tshia bana betu’ bikole, katuakuikala ne kansungansunga to (Tangila tshikoso 12-13)d
12. Ndutatu kayi luvua nalu Sarah?
12 Bantu bakuabu badi mua kuikala ne kansungansunga kadi kabayi nansha badimanye to. Tshilejilu, muanetu kampanda diende Sarah uvua wela meji ne: bu muvuaye kayi usunguluja bantu bilondeshile dikoba diabu, bungi bua makuta avuabu nawu, anyi midimu ivuabu nayi mu tshisumbu, yeye kavua ne kansungansunga to. Kadi udi wamba ne: “Ngakabanga kumona ne: mvua ne kansungansunga ketu aka.” Mushindu kayi? Sarah ngua mu dîku dia bantu bavua balonge bikole ne uvua musue kusomba anu ne bantu bavua balonge pabu bikole. Dimue edi wakambila too ne mulunda wende mukuabu ne: “Ntu musue kusomba anu ne Bantemu nanyi batu balonge bikole. Ntu ngepuka badi kabayi balonge kalasa ka nsongo.” Bidi bimueneka bimpe ne: bivua bikengela bua Sarah kushintulula lungenyi luende. Mushindu kayi?
13. Mushindu uvua Sarah mushintulule ngelelu wende wa meji udi mua kutulongesha tshinyi?
13 Mutangidi wa tshijengu kampanda wakambuluisha Sarah bua adiele ku tshipimu. Sarah udi wamba ne: “Wakangela kalumbandi bua mumvua ngezela Yehowa mudimu ne lulamatu, mfila mandamuna mimpe, ne mumanye Mifundu. Yeye kulua kungambila ne: padi dimanya dietu dienda divula, bidi bikengela tupete ngikadilu ya buena Kristo bu mudi budipuekeshi, luse, ne kumanya mikalu yetu.” Sarah wakatumikila mubelu wa mutangidi wa tshijengu au. Udi wamba ne: “Tshidi ne mushinga menemene nkuikala ne dinanga ne kuikala muena malu mimpe.” Bua bualu abu, wakatuadija kumona bena Kristo nende mushindu mukuabu. Udi wamba ne: “Mvua nditatshisha bua kujingulula ngikadilu ivua ibavuija ne mushinga kudi Yehowa.” Kadi tuetu? Katudimonyi bapite bakuabu musangu nansha umue bua tulasa tutudi balonge to! Tuetu ‘banange tshisumbu tshijima tshia bana betu,’ katuakuikala ne kansungansunga to.—1 Pet. 2:17.
IKALA MUAKIDIDI WA BENYI
14. Bilondeshile Ebelu 13:16, Yehowa udi umvua bishi patudi bakididi ba benyi?
14 Patudi bakididi ba benyi, Yehowa utu usanka bikole. (Bala Ebelu 13:16.) Udi umona ne: ngumue mushindu utudi tumutendelela, nangananga patudi tuambuluisha bakengi. (Yak. 1:27; 2:14-17) Ke bualu kayi Bible udi utukankamija bua ‘kuikala ne tshibidilu tshia kuakidila benyi.’ (Lomo 12:13) Patudi tuakidila benyi, tudi tuleja mutudi tubatabalela, mutudi babanange, ne basue kudia nabu bulunda ne muoyo mujima. Yehowa utu usanka patudi tudiaku kombe ne kambela ne bakuabu, tutalaja nabu pa mioyo, tuela nabu tshianza mukana, tusomba nabu, anyi tubatabalela bimpe. (1 Pet. 4:8-10) Kadi kudi mua kuikala malu adi mua kututatshisha bua kuikala bakididi ba benyi.
“Kumpala, tshivua ne muoyo wa kuakidila benyi to, kadi ndi mushintuluke ne mupete disanka dia bungi” (Tangila tshikoso 16)e
15-16. a) Bua tshinyi bantu bakuabu badi mua kuelakana bua kuikala bakididi ba benyi? b) Ntshinyi tshivua tshiambuluishe Edit bua ikale wakidila benyi?
15 Tudi mua kuelakana bua kuakidila benyi bua nsombelu wetu. Tuangate tshilejilu tshia mamu kampanda mukamba diende Edit. Kumpala kua kulaye Ntemu, kavua musue kutamba kusomba ne bantu to. Uvua umona ne: bakuabu bavua bobu ne bintu bia kuakidila nabi benyi.
16 Pakavua Edit mulue Ntemu, wakashintulula ngelelu wende wa meji. Wakenza malu avua akengela bua kuikala kuakidila benyi. Udi wamba ne: “Pavuabu batuibakila Nzubu wetu wa Bukalenge mupiamupia, mukulu mukuabu wakangambila bua muanetu kampanda ne muena kuende bavua balua kutuambuluisha mu mudimu au, kungebejaye bua kumanya ni mvua mua kubakidila kuanyi bua mbingu ibidi. Meme kuvuluka muvua Yehowa mubeneshe mukaji mukamba wa ku Salefata.” (1 Bak. 17:12-16) Edit wakitaba bua kubakidila. Mmasanka kayi akapetaye? Udi wamba ne: “Mbingu ibidi ayi yakalua ngondo ibidi. Dîba dionso adi, ngakadia nabu bulunda bua dikema.” Edit wakapeta kabidi balunda ba pa muoyo mu tshisumbu. Udi mpindieu mpanda-njila ne utu musue bua bantu batuye uyisha nabu bikale balua kuende bua kupetaku tshiashima. Udi wamba ne: “Ntu ngumvua bimpe pantu mpeshangana bintu! Mu kuamba kuimpe, bindi meme mupete mbia bungi be!”—Eb. 13:1, 2.
17. Mbualu kayi buvua Luke ne mukajende balue kujingulula?
17 Tudi mua kuikala tukadi bakididianganyi, kadi tudiku mua kulengeja malu anyi? Tshilejilu, Luke ne muena kuende batu bakididi ba benyi. Bavua ne tshibidilu tshia kubikila baledi babu, balela, balunda, ne mutangidi wa tshijengu ne mukajende kuabu. Kadi Luke udi wamba ne: “Tuakalua kujingulula ne: tuvua tubikila anu bena dietu.” Mmunyi muvua Luke ne muena kuende balengeje mushindu wabu wa diakidila dia benyi?
18. Mmunyi muvua Luke ne muena kuende balongolole mushindu wa diakidila benyi?
18 Luke ne muena kuende bakashintulula mmuenenu wabu wa malu pakelanganabu meji a mêyi a Yezu aa: “Binuikala banange anu badi banunange, nudi nupeta difutu kayi?” (Mat. 5:45-47) Bakamona ne: bivua bikengela bidikije Yehowa utu upesha bantu bonso bintu ne tshianza tshilekelela. Ke bobu kudisuika bua kubikila bena Kristo nabu bavuabu kabayi banji kubikila. Luke udi wamba ne: “Tuetu bonso tutu tusanka bikole patutu tusomba mushindu eu. Muntu yonso utu udiumvua mukankamijibue ne mukoleshibue.”
19. Leja mutudi mua kuleja ne: tudi bayidi ba Yezu. Udi mudisuike bua kuenza tshinyi?
19 Tudi bamone mudi kunangangana bikole kutuambuluisha bua kuikala bakebi ba ditalala, kubenga kuikala ne kansungansunga, ne kuikala bakididi ba benyi. Tudi ne bua kulekela meji mabi onso ne kunanga bana betu bikole ne muoyo umue. Tuetu tuenza nunku, netuikale ne disanka ne netuleje ne: tuetu ke bayidi ba Yezu menemene.—Yone 13:17, 35.
MUSAMBU WA 88 Mmanyisha njila yebe
a Yezu wakamba ne: dinanga ntshimanyinu tshia bena Kristo balelela. Dinanga ditudi banange nadi bena Kristo netu didi ditusaka bua kuikala bakebi ba ditalala, katuyi ne kansungansunga, ne bakididianganyi. Kabitu anu bipepele bua kuenza nunku to. Tshiena-bualu etshi netshitupeshe ngenyi mimpe ya mua kutungunuka ne kunangangana bikole ne muoyo umue.
b Tudi bashintulule amue mêna mu tshiena-bualu etshi.
c DIUMVUIJA DIA TSHIMFUANYI: Muanetu wa bakaji wanji uteta bua kulengejangana ne muanabu, au ubenga, kadi kayi ulekela to. Bu mudiye anu uditatshisha bua kunanga muanabu, badi bafika ku dilengejangana.
d DIUMVUIJA DIA TSHIMFUANYI: Muanetu wa balume udiumvua mudiombola kudi bakuabu mu tshisumbu.
e DIUMVUIJA DIA TSHIMFUANYI: Muanetu wa bakaji uvua welakana kumpala bua kuikala kuakidila benyi ushintulula ngelelu wende wa meji, ne tshidiye wenza tshimupetesha kabidi masanka.