Mmunyi muudi mua kusambila Nzambi bua akuteleje?
Yehowa Nzambi ke “Muteleji wa disambila.” (Misambu 65:2) Tudi mua kuyikila nende nansha tuetu muaba kayi, dîba kayi, ne dîyi dikole anyi munda munda. Yehowa mmusue bua tumubikile ne: “Tatu” wetu, ne yeye muine ke Tatu muimpe mutambe utudi nende. (Matayi 6:9) Yehowa udi utulongesha ne dinanga dionso mutudi mua kusambila bua atuteleje.
SAMBILA YEHOWA NZAMBI MU DÎNA DIA YEZU
“Nuenu balombe Tatu tshintu, neanupeshatshi mu dîna dianyi.”—Yone 16:23.
Mêyi a Yezu aa adi aleja bimpe ne: Yehowa mmusue bua tumusambile kupitshila ku dîna dia Yezu Kristo, ki nkupitshila ku bimfuanyi, bansantu, banjelu, anyi bankambua betu bakadi bafue nansha. Patudi tusambila Nzambi mu dîna dia Yezu, tudi tuleja dianyisha bua malu adi Yezu mutuenzele. Yezu wakamba ne: “Muntu kena mua kulua kudi Tatu kayi mupitshile kundi to.”—Yone 14:6.
AKULA MALU ADI AFUMINA MU MUOYO WEBE
“Pumunayi mioyo yenu kumpala kuende.”—Misambu 62:8.
Patudi tusambila Yehowa, mbimpe tuakule nende anu mutudi mua kuakula ne tatu udi mutunange. Pamutu pa kubala masambila makuata mu mutu anyi a mu mikanda, mbimpe tumulombe ne kanemu konso, tuakula ne muoyo wa munda.
LOMBA MALU ADI UMVUANGANA NE DISUA DIA NZAMBI
“Tshintu tshionso tshitudi tulomba bilondeshile disua diende, udi utumvua.”—1 Yone 5:14.
Yehowa Nzambi mmutuambile mu Bible malu adiye musue kutuenzela, ne adiye musue bua tuetu tumuenzele. Bua Nzambi kuanyishaye masambila etu, anu tuetu tusambila “bilondeshile disua diende.” Bua kufika ku dienza nanku, bidi bikengela tulonge Bible bua tufike ku dimumanya bimpe. Apu netuikale batuishibue ne: masambila etu adi amusankisha.
MMALU KAYI ATUDI MUA KULOMBA MU DISAMBILA?
Sambila bua bintu biudi nabi dijinga. Tudi mua kusambila Nzambi bua majinga etu a matuku onso bu mudi biakudia, bilamba, ne muaba wa kulala. Tudi mua kumulomba kabidi meji bua kuangata mapangadika mimpe, ne bukole bua kutantamena ntatu idi itukuata. Tudi mua kusambila bua ditabuja dietu, bua atufuile luse, ne bua atuambuluishe.—Luka 11:3, 4, 13; Yakobo 1:5, 17.
Sambila bua bantu bakuabu. Baledi bimpe batu basanka padibu bamona bana babu banangangane. Yehowa pende mmusue bua bana bende badi pa buloba bikale batabalelangana. Mbimpe kusambidila muena dibaka netu, bana betu, dîku dietu, ne balunda betu. Muyidi Yakobo wakafunda ne: “Sambidilanganayi.”—Yakobo 5:16.
Ikala uleja dianyisha. Bible udi wamba bua Mufuki wetu ne: ‘Uvua muenze malu mimpe, unulokeshila mvula ya mu diulu, unupesha mivu ya biakudia, unukutshisha ne biakudia ne uwuja mioyo yenu ne disanka.’ (Bienzedi 14:17) Tuetu tuela meji a bionso bidi Nzambi mutuenzele, nebitusake bua kumuela tuasakidila mu disambila. Tudi ne bua kuleja kabidi Nzambi dianyisha ku malu atudi tuenza mu nsombelu wetu.—Kolosayi 3:15.
IKALA NE LUTULU, UTUNGUNUKE NE KUSAMBILA
Imue misangu, tudi mua kudiumvua batapibue ku muoyo patudi tumona ne: Nzambi ki mmuandamune ne lukasa masambila etu menza ne muoyo mujima. Nanku tudi mua kuamba ne: Nzambi kena utangila bualu buetu anyi? Nansha kakese! Tumonayi malu adi bantu bambe adi aleja ne: mbimpe anu tutungunuke ne kusambila.
Steve utukavua batele mu tshiena-bualu tshia kumpala udi wamba ne: “Bu kabuyi bua disambila, nunku ndi mudienzele bibi kukadi bidimu bia bungi.” Tshivua tshimuambuluishe ntshinyi? Wakatuadija kulonga Bible, kulongaye ne: bivua bikengela kusambila, ne kusuminyina mu masambila. Udi wamba ne: “Ntu nsambila Nzambi mmuela tuasakidila bua dikuatshisha didi balunda banyi bankuatshishe. Ndi mpindieu ne disanka kupita muntu kuonso eku.”
Kadi netuambe tshinyi bua Jenny uvua udiumvua kayi mukumbane bua Nzambi kuteleja masambila ende? Udi wamba ne: “Pamvua mushikile apu, ngakasengelela Nzambi bua angambuluishe bua kumanya bua tshinyi mvua ndiumvua tshiyi ne mushinga.” Bivua bimuambuluishe mushindu kayi? Udi wamba ne: “Kukuatshila Nzambi bualu abu kuakangambuluisha bua kumona malu muvuawu, bua kumvua ne: nansha muvua muoyo wanyi umpisha, Nzambi yeye kavua umpisha nansha. Biakangambuluisha kabidi bua kubenga kuditekesha, kadi kutungunuka ne kusambila.” Biakapatula bipeta kayi? Jenny udi wamba ne: “Disambila diakangambuluisha bua kumona ne: Yehowa udiku bushuwa, nNzambi, nTatu, mMulunda udi munnange ne untabalela, ne neangambuluishe misangu yonso pandi nditatshisha bua kuenza malu adiye musue.”
Mona kabidi tshivua tshifikile Isabel. Pakimitaye difu, doktere wende wakamuambila ne: muana uvuaye mua kulela uvua ne bua kuledibua ne bulema bunene. Biakamupampakaja bikole. Bantu bakuabu bakamubela bua atule difu adi. Udi wamba ne: “Ngakadiumvua anu bu uvua ukeba kufua bua bukole bua kanyinganyinga kamvua naku ku muoyo.” Ntshinyi tshiakenzaye? Udi wamba ne: “Ngakasambila Nzambi misangu ne misangu bua angambuluishe.” Panyima pa matuku, wakalela muana wa balume diende Gerard, uvua mulema. Isabel uvuaku mumone ne: Nzambi uvua muandamune masambila ende anyi? Eyowa. Mushindu kayi? Udi wamba ne: “Pandi mmona muananyi lelu ne bidimu 14 usanka ne muoyo nansha mudiye mulema, ndi mmona ne: yeye ke diandamuna dinene ku masambila anyi, ne ndibenesha dinene didi Yehowa mumbeneshe nadi.”
Mêyi mamba ne muoyo mujima aa adi atuvuluija tshivua mufundi wa Misambu muambe etshi: “Yehowa wanyi, wewe neuteleje kulomba kua bena bupuekele. Neukoleshe mioyo yabu ne neuteye ntema yonso kudibu.” (Misambu 10:17) Aa mmalu mimpe matambe adi ne bua kutusaka bua kusuminyina mu masambila!
Bible udi utela masambila a bungi avua Yezu usambila. Kadi didi ditambe kumanyika ndivuaye mulongeshe bayidi bende. Disambila adi didi ditulongesha tshinyi?