Mudi disambila mua kukuambuluisha

Pavua Pamela ne disama dikole, wakakeba diambuluisha kudi baminganga bapiluke. Kadi wakasambila kabidi Nzambi bua amupeshe bukole bua kutantamena lutatu alu. Disambila divuaku dimuambuluishe anyi?

Pamela udi wamba ne: “Pamvua ngenda ngangata manga a disama dia kansere, mvua ngumvua buôwa bua bungi. Kadi pangakasambila Yehowa Nzambi, ngakumvua ditalala ku muoyo, meme kutuadija kumona malu mu mushindu muimpe. Ntshidi anu nsama, kadi disambila didi dingambuluisha bua kuikala ne mmuenenu wa malu muimpe. Padi bantu bangebeja ne: munyi?, ntu mbandamuna ne: ‘Mubidi wanyi kawena bimpe to, kadi meji anyi mmatukije!’”

Mu bulelela, ki mbimpe tuetu kuindila pikala bualu bukole kampanda mua kutukuata bua tuetu kushisha kusambila nansha. Ntatu itu itukuata tuetu bonso, minene ne mikese, ne tutu tumona ne: bidi bikengela batuambuluishe bua kupita nayi bimpe. Disambila didiku mua kukuambuluisha anyi?

Bible udi wamba ne: “Upuila Yehowa bujitu buebe, ne yeye neakuambuluishe. Yeye kakuitaba bua muntu muakane adishinde nansha kakese.” (Misambu 55:22) Mêyi aa adi akolesha ku muoyo bikole! Kadi mmunyi mudi disambila mua kukuambuluisha? Wewe usambila Nzambi mu mushindu udiye wanyisha, neakupeshe bidi bikengedibua bua wewe kupita bimpe ne ntatu yebe.—Tangila kazubu ka ne: “Mudi masambila mua kukuambuluisha.”

Mudi masambila mua kukuambuluisha

Ditalala dia mu lungenyi

“Numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne bieledi bienu bia meji ku butuangaji bua Kristo Yezu.” (Filipoyi 4:6, 7) Wewe mupumuine Nzambi yonso idi mikutonde mu muoyo, neakupeteshe ditalala bua wenze malu ne meji paudi mu ntatu.

Meji a kudi Nzambi

“Bikala umue wa kunudi mupangile meji, atungunuke ne kualomba kudi Nzambi, bualu yeye udi upesha bantu bonso ne tshianza tshilekelela, kayi ubatobolola, ne nebamupeshawu.” (Yakobo 1:5) Misangu ya bungi patudi kumpala kua malu makole, katutu tuangata mapangadika mimpe nansha. Wewe mulombe Nzambi meji, neakuvuluije mêyi manene a bungi adi mu Bible, Dîyi diende.

Bukole ne busambi

“Bua malu onso ndi ne bukole ku diambuluisha dia yeye udi umpesha bukole.” (Filipoyi 4:13) Bu mudi Yehowa Nzambi wa bukole buonso, udi mua kukupesha bukole bua utantamene ntatu, anyi udi mua kukukuatshisha mu ntatu ayi. (Yeshaya 40:29) Bible udi ubikila kabidi Yehowa ne: “Nzambi wa busambi buonso.” Udi mua kutusamba “mu mateta etu onso.”—2 Kolinto 1:3, 4.