Udi mua kudilongolola ku mpindieu bua kubuela mu bulongolodi bupiabupia bukadi pabuipi
Bulongolodi bupiabupia bukadi pabuipi!
Nzambi uvua mufuke buloba bua bantu bakane basombelapu bua kashidi. (Misambu 37:29) Wakateka, Adam ne Eva, mulume ne mukaji ba kumpala mu budimi buimpe bua Edene, kubapeshaye bobu ne ndelanganyi yabu mudimu wa kudima buloba ne kubulama.—Genese 1:28; 2:15.
Lelu buloba kabuena Mparadizu muvua Nzambi musue to. Kadi disua diende ki ndishintuluke to. Ntshinyi tshienzaye bua buloba kulua Mparadizu? Anu mutuvua bamone mu biena-bualu bishale, Nzambi kakubutula buloba buetu ebu to. Kadi nealekele bantu badi ne lulamatu bua basombapu. Mmunyi muikala nsombelu pa buloba pakumbaja Nzambi malu adiye mulaye?
Mbulamatadi umue ke wakokesha buloba bujima
Mu katupa kîpi emu, patuadija mbulamatadi wa Nzambi wa mu diulu kukokesha bantu bonso, buloba nebulue muaba muimpe. Bantu nebasombe pamue mu diumvuangana, benza malu mimpe ne benza mudimu wa nsongo. Nzambi mmusungule Yezu Kristo bua kukokesha buloba. Yezu mmushilangane ne bamfumu ba bungi lelu, bualu yeye neenze muende muonso bua kukumbajila bantu majinga abu. Bukokeshi buende nebuikale bushindamene pa dinanga, ne neikale Mukalenge wa malu mimpe udi umvuila bantu ne wimanyina buakane.—Yeshaya 11:4.
Bantu bonso nebikale mu buobumue
Bantu kabakuikala batapuluke bua matunga anyi bisamba to. Nebikale buonso buabu mu buobumue. (Buakabuluibua 7:9, 10) Bantu bonso bikala ne muoyo pa buloba nebikale banange Nzambi ne bantu nabu. Nebenze mudimu pamue mu ditalala bua kukumbaja tshivua Nzambi mulongolole katshia ku ntuadijilu, mmumue ne: kutabalela buloba, muaba wabu wa kusombela.—Misambu 115:16.
Diumvuangana pankatshi pa bantu ne bintu bikuabu
Padi Bukalenge bua Nzambi butuadija kukokesha pa buloba, Mufuki wetu neenze bua miunya, mvula ne mpepele kabikadi binyangakaja bintu to. (Misambu 24:1, 2) Pavua Yezu mubatamije tshipepele tshikole, wakaleja tshidiye mua kuenza ne bukole budi Nzambi mumupeshe. (Mâko 4:39, 41) Mu bukokeshi bua Kristo, muntu nansha umue kakutshina bipupu anyi malu makuabu a buena aa to. Bantu nebikale mu ditalala ne nyama ne kabakunyangakaja kabidi buloba to.—Hoshea 2:18.
Makanda a mubidi mimpe ne biakudia bia bungi
Muntu yonso neikale ne makanda a mubidi tumatuma. Muntu nansha umue kakusama, kukulakaja anyi kufua to. (Yeshaya 35:5, 6) Bantu nebasombe muaba mulenga wa mankenda anu bu mu budimi bua Edene, muaba uvua baledi betu ba kumpala basombele. Mu buloba bupiabupia biakudia nebibodiodioke anu bu mu Edene, ne bantu bonso nebikale ne biakudia bia bungi. (Genese 2:9) Anu bu tshisamba tshia Nzambi tshia kale tshia Isalele, mu Mparadizu muntu yonso ‘neadie biakudia biende, neukute.’—Lewitiki 26:4, 5.
Ditalala dilelela ne bupole
Mu mbulamatadi wa Nzambi wakokesha buloba bujima, bantu bonso nebikale mu ditalala ne benzelangana malu mimpe. Kakuakuikala mvita anyi nkokeshilu mubi to, ne bantu bonso nebikale ne bidibu nabi dijinga. Bible udi ulaya ne: “Nebasombe, muntu ne muntu muinshi mua muonji wende wa tumuma tua mvinyo ne muinshi mua mutshi wende wa mfigi, ne muntu kakubatshinyisha.”—Mika 4:3, 4.
Nzubu mimpe ne mudimu wa nsongo
Dîku ne dîku nedikale ne wadi nzubu. Muntu kakutshina, wela meji ne: nebamuipate ku nzubu to. Mudimu kayi wonso utuenza newutupeteshe disanka. Bible udi wamba ne: bantu bikala ne muoyo mu buloba bupiabupia bua Nzambi “kabakukuata mudimu mukole bua tshianana,” anyi mu tshijengu to.—Yeshaya 65:21-23.
Ndongeshilu mutambe buimpe
Bible udi wamba ne: “Buloba nebuwule tente bushuwa ne dimanya dia Yehowa.” (Yeshaya 11:9) Bantu bikala ne muoyo mu Bukalenge bua Nzambi nebalonge malu a bungi mimpe padibu bamona meji a Mufuki wabu Yehowa adi kaayi ndekelu. Nebalonge kabidi malu adi atangila bintu bimpe bidiye mufuke. Dimanya diabu kadiakubasaka bua kuenza bia mvita anyi bua kuenzelangana bibi to. (Yeshaya 2:4) Kadi nedibambuluishe bua kusomba mu ditalala ne kulama buloba.—Misambu 37:11.
Muoyo wa kashidi
Nzambi wakalongolola buloba ne muoyo mujima bua tuikale ne disanka dituku dionso. Uvua musue bua bantu basombe pa buloba kashidi ne tshiendelele. (Misambu 37:29; Yeshaya 45:18) Bua kukumbajaye bualu ebu, “neamine lufu kashidi.” (Yeshaya 25:8) Bible udi wamba ne: “Lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.” (Buakabuluibua 21:4) Nzambi neapeshe bantu bapanduka ku nshikidilu ne bantu bungi ntunde ne nkenene babishibua mu buloba bupiabupia diakalenga dia kuikala ne muoyo kashidi.—Yone 5:28, 29; Bienzedi 24:15.
Lelu eu, bantu miliyo ya bungi bakadi badilongolola bua kuikala ne muoyo mu Bukalenge bua Nzambi bukadi busemene pabuipi. Nansha mudibu bapange bupuangane, badi badienzeja bua kuikala bantu bikala Nzambi mua kuanyishila bua kubuela mu buloba bupiabupia. Badi benza tshinyi? Badi balonga malu a Yehowa Nzambi ne a Muanende uvuaye mutume Yezu Kristo.—Yone 17:3.
Keba bua kumanya tshia kuenza bua kupanduka ku nshikidilu ne kubuela mu bulongolodi bupiabupia bukadi pabuipi. Itaba bua Ntemu wa Yehowa akulongeshe Bible kuyi ufuta makuta anyi dilongela tshianana Malonga a mu Bible a ku Enternete adi mu jw.org.