Bisukuita bia mbua yanyi
NICK udi musombele mu Oregon mu États-Unis udi wamba ne: “Ku ntuadijilu kua tshidimu tshia 2014, mvua ngendakana ne tubua tuanyi tubidi mu kartshie ka bangenda mushinga mu tshimenga tshietu. Bantemu bavua pa tshibidilu bimana ku tumatempu tuabu tua kutekela mikanda mu kartshie aku. Bavua bavuala bimpe, ne bafukishila muntu yonso uvua upitshila muaba uvuabu au mimuemue.
Bavua benzela bantu malu mimpe, baenzela kabidi mbua yanyi. Musangu kampanda, Elaine uvua muimane ku kaditempu ka mikanda wakapesha mbua yanyi bisukuita. Pashishe, misangu yonso ituvua tusemena pabuipi ne kaditempu, tubua tukavua anu tuzuka bua kuya kudi Bantemu bua batupeshe bisukuita.
Ngondo ya bungi yakapita. Mbua yanyi ivua minange bisukuita bivuabu bayipesha, eku meme panyi munange muvua Bantemu bayukila nanyi tumiyuki tukese. Kadi tshivua musue kuyukila nabu bia bungi to. Mvua ne bidimu bipite pa 70, ne tshivua mumanye malu avua Bantemu bitabuja to. Bu muvua bitendelelu bia bungi bingele mâyi ku makasa, ngakamona ne: bivua bimpe ndilongele Bible meme nkayanyi.
Tshikondo atshi, ngakamona Bantemu bakuabu bimane ku kaditempu kabu mu kartshie kakuabu ka mu tshimenga tshietu. Bobu pabu bavua bantu ba malu mimpe. Bavua bandamuna nkonko imvua nayi ya malu a mu Bible, kumfikishabi ku ditaba malu abu.
Musangu kampanda, Elaine wakangebeja ne: ‘Udi mumanye ne: nyama ndipa dia kudi Nzambi anyi?’ Meme kumuandamuna ne: ‘Eyowa, bidi nanku menemene!’ Pashishe, Elaine wakambadila Yeshaya 11:6-9. Kutuadijila anu pine apu, meme kunanga kulonga malu a mu Bible bikole nansha mumvua tshiyi musue kuangata tshia kubala nansha tshimue tshia Bantemu.
Matuku akalonda, tuvua tuyukila kakese ne Elaine ne bayende Brent malu avua ansankisha bikole. Bakandomba bua mbale mukanda wa Matayi too ne ku wa Bienzedi bua mmone tshidi kuikala muena Kristo mulelele kumvuija. Meme kubala mikanda ayi. Kakuvua kupite matuku a bungi to, meme kuitaba bua kulonga Bible ne Brent ne Elaine. Tukavua munkatshi mua tshidimu tshia 2016.
Lumingu luonso mvua ngindila ne muoyo kuulu kuulu dilonga dianyi dia Bible ne bisangilu ku Nzubu wa Bukalenge. Mvua ne disanka dia bungi dia kumanya tshivua Bible ulongesha menemene. Panyima pa tshidimu tshijima ngakabatijibua kulua Ntemu. Ndi ne bidimu 79 mpindieu, ne ndi mujadike ne: ndi mu njila mulelele. Yehowa mmumbeneshe bua mudiye mungakidile mu dîku diende dia bantu badi badilambule kudiye.”