Ndi mu bukubi bualu ndi ngeyemena Yehowa

MUNGAKAFIKA KU DIMANYA YEHOWA NE KU DIMUEYEMENA

Mbandele mu 1948, mu kamusoko ka ku sud-ouest kua Nigeria. Tshikondo atshi, tatu muakunyi diende Moustapha ne Wahabi mukuluanyi bakabatijibua. Tatu wakafua pamvua ne bidimu 9. Ngakumvua bibi bikole. Mukuluanyi au wakangambila ne: netumonangane ne tatu pamubishabu ku lufu. Bualu buvuaye mungambile abu buakankolesha, kunsakabi bua kulonga Bible. Ngakabatijibua mu 1963. Batutuanyi babidi ne muakunyanyi wa balume bakabatijibua pabu.

Mu 1965, ngakaya mu tshimenga tshia Lagos muvua tutuanyi Wilson, meme kutuadija kusomba ne bampanda-njila ba pa tshibidilu ba mu tshisumbu tshia Igbobi. Disanka divuabu nadi ne tshisumi biakansaka bua kutuadija mudimu wa bupanda-njila mu ngondo wa 1 mu 1968.

Albert Olugbebi muena ku Betele wakenza netu tshisangilu tshia pa buatshi tuetu bansonga, uleja muvuaku dijinga dia bampanda-njila ba pa buabu ku nord kua Nigeria. Ndi mvuluka mêyi avuaye mutuambile ne musangelu a ne: “Nutshidi bansonga, nudi mua kupesha Yehowa makanda enu ne dîba dienu. Kudi mudimu wa bungi wa nuenu kuenza.” Bu mumvua musue kuidikija lungenyi lua muprofete Yeshaya, ngakuwuja dilomba dia kulua mpanda-njila wa pa buende.—Yes 6:8.

Mu ngondo 5 wa 1968, bakantuma mpanda-njila wa pa buende mu tshimenga tshia Kano ku nord kua Nigeria. Tshivua tshikondo tshia mvita ya Biafran. (1967 too ne 1970) Mvita ayi ivua minyangakaje malu bikole mu tshitupa atshi kumpala kua kuyayi too ne ku est kua Nigeria. Muanetu mukuabu wa balume umvua nnemeka bikole wakangambila misangu ya bungi bua tshiyi ku Kano to. Kadi ngakamuambila ne: “Tuasakidila bua kuntabalela. Kadi bikalabi ne Yehowa mmusue bua meme kuya kuenza mudimu eu, ndi mutuishibue ne: neikale nanyi.”

KUEYEMENA YEHOWA MUABA UVUA MVITA MINYANGAKAJE MALU BIKOLE

Nsombelu uvua mubi bikole mu Kano tshikondo atshi. Mvita ayi ivua minyangakaje tshimenga tshinene atshi bibi be! Imue misangu patuvua mu buambi, tuvua tuenda tupita bitalu bia bantu bavuabu bashipe mu mvita ayi. Nansha muvuaku bisumbu bia bungi mu Kano, bena Kristo ba bungi bavua banyeme. Kuvua kushale bamanyishi batue anu ku 15. Bavua batekete mu mikolo ne bavua ne buôwa bua bungi. Kadi bakasanka bikole patuakafika tuetu bampanda-njila ba pa buabu 6. Bakatumikila mibelu ituvua babapeshe. Tuakabambuluisha bua kutuadijilula kuenza bisangilu, kuyisha, kutuma luapolo lua mudimu wa buambi ku Betele, ne kulomba mikanda.

Tuetu bampanda-njila ba pa buabu tuakatuadija kulonga muakulu wa Tshiwuza. Bantu ba bungi bavua batuteleja pavuabu bumvua mukenji wa Bukalenge mu muakulu wabu. Kadi bena mu tshitendelelu tshivua tshimanyike muaba au bikole kabavua banange mudimu wetu wa buambi to. Nanku bivua bilomba tuikale badimuke. Musangu mukuabu patuvua mu buambi ne muanetu wa balume, bakatuela lubilu kudi tatu mukuabu ne kele. Diakalenga, tuakamupita ku lubilu. Nansha muvuaku njiwu, Yehowa uvua ‘utusombesha mu bukubi’ ne bungi bua bamanyishi buakatuadija kuvula. (Mis. 4:8) Lelu, mu Kano mudi bisumbu 11 bidi ne bamanyishi bapite pa 500.

DITUILANGANA NE BULUISHI MU DITUNGA DIA NIGER

Mu ngondo wa 8 wa 1998, meme mumane kuenza ngondo mikese ku Kano, bakantuma ku Niamey (tshimenga tshikulu tshia Niger) ne bampanda-njila ba pa buabu bakuabu 2. Patuakafikaku, bualu butuakadijinguluila tuetu nkayetu ne tshifikidi mbua ne: Niger nditunga dia mu Afrike wa ku ouest didi munkatshi mua matunga a buloba bujima atu ne luya lua bungi. Pa kumbusha dibidilangana ne luya, tuvua ne bua kulonga muakulu wa Mfualansa udi muakulu munene wa mu Niger. Nansha muvuaku ntatu yonso ayi, tuakeyemena Yehowa, kutuadija kuyisha mu tshimenga atshi pamue ne bamanyishi ndambu bavuamu. Mu matuku makese tshianana, tuakapesha muntu pa kuamba yonso uvua mumanye kubala mu Niamey mukanda wa kulonga nawu Bible wa La vérité qui conduit à la vie éternelle. Bantu ba bungi bavua mene balua kututangila bua tubapeshawu!

Mu matuku makese tuakalua kujingulula ne: bakokeshi kabavua banange Bantemu ba Yehowa to. Mu ngondo wa 7 wa 1969, tuakenza mpuilu wa tshijengu wa kumpala mu ditunga adi; bantu 20 bavua babuelamu. Tuvua bindile ne muoyo kuulu kuulu bua kuakidila bamanyishi babidi bavua babatijibua. Kadi bampulushi bakalua kuimanyikila mpuilu au munkatshi dituku dia kumpala. Bakaya netu tuetu bampanda-njila ba pa buabu ne mutangidi wa tshijengu ku biro biabu. Bobu bamane kutuela nkonko, bakatuambila bua kualukila dituku divua dilonda. Bu mutuvua bamone ne: lutatu luvua mua kumueneka, tuakalongolola bua kuenza muyuki wa batismo mu musokoko, tuetu kuya kubatiza bana betu mu musulu kampanda.

Mbingu mikese pashishe, ministre muomekela mianda ya mu ditunga wakatuipata tuetu bampanda-njila ba pa buabu 5 bavua mu Niger. Bakatupesha matuku abidi bua kupatuka ditunga, ne bua tudikebela mushindu wa kumbuka. Tuakatumikila diakamue dîyi adi, tuetu kuya ku Betele wa mu Nigeria muvuabu bakatupeshe midimu ya tshianana.

Bakantuma mu musoko wa Orisunbare mu Nigeria, mutuvua tulombola malonga a Bible avua aya kumpala ne kasumbu kakese ka bamanyishi kavuamu. Ngondo 6 pashishe, Betele wakampingaja mu Niger. Pangakumvua bualu abu bua musangu wa kumpala, biakambungamija. Kadi mvua ne disanka dia bungi dia kupetangana kabidi ne bana betu ba mu Niger!

Meme kualukila mu tshimenga tshia Niamey. Pangakafikamu, ngakatuilangana ne mubanji mukuabu dituku diakalonda; yeye kumvuluka ne: ndi Ntemu. Kutuadijaye kungela nkonko ya malu a mu Bible. Ngakatuadija kulonga nende. Panyima pa matuku, yeye kulekela kunua makanya ne maluvu makole. Pashishe wakabatijibua. Mvua ne disanka dia kuyisha pamue ne bana betu ba mu Niger ne kumona muvua bantu batuvua tuyisha balua Bantemu. Musangu wa kumpala ungakafikamu muvua bantemu 31, kadi pangakumbukamu bakavua 69.

“KATUENA BAMANYE MUDI BANA BETU BENZA MUDIMU WA NZAMBI MU GUINÉE TO”

Mu 1977, ngakalukila mu Nigeria bua kubuela mu kalasa. Ku ndekelu kua mbingu isatu ya kalasa, muanetu Malcolm Vigo, mutangidi wa Komite wa filiale wakambadila mukanda uvua ufumina ku Betele wa mu Sierra Leone. Bana betu ba mu Guinée bavua bakeba mpanda-njila uvua ne makanda a mubidi udi mumanye Anglais ne Mfualansa, kadi muikale mujike bua ashale mutangidi wa tshijengu. Muanetu Vigo wakangambila mumvua mubuele mu kalasa bua kukenza mudimu au. Kungambilaye patoke ne: “Ki mmudimu mupepele to. Anji ela meji kumpala kua kuitaba.” Ngakamuandamuna diakamue ne: “Bu mudibi ne: Yehowa ke udi untuma, ndi nya.”

Meme kuangata ndeke kuya mu Sierra Leone bua kumonangana ne bena mu Komite wa filiale. Umue wa kudibu wakangambila ne: “Katuena bamanye mudi bana betu benza mudimu wa Nzambi mu Guinée to.” Nansha muvua Betele ne bujitu bua kutangila mudimu wa diyisha mu Guinée, kabavua ne mushindu wakuyukila ne bana betu ba mu Guinée to, bua tshimvundu tshia malu a tshididi tshivuamu. Nansha muvua Betele mutete misangu ne misangu bua kutuma muanetu bua kuya kukumbula bana betu ba mu Guinée, kabavua anu ne mushindu wa kubamanyisha malu avua enzekamu to. Nunku, bakangambila bua kuya mu Conakry, tshimenga tshikulu tshia ditunga dia Guinée bua kupeta mikanda ivua inganyishila bua kusombelamu.

Pangakafikamu, ngakaya ku biro bia ambasade bia ditunga dia Nigeria, meme kumonangana ne muleji mpala wa ditunga dietu uvuaku. Meme kumuambila ne: ndi musue kuyisha mu Guinée emu. Yeye kungambila ne: “Kushadi munemu to, badi mua kukukuata anyi kukuenzela bibi. Alukila mu Nigeria ukayisha.” Meme kumuambila ne: “Ndi musue kuyisha meme munemu.” Nanku wakafunda mukanda, ulomba ministre muomekela mianda ya munda mua ditunga dia Guinée bua ikale untabalela. Yeye kungenzela mukanda wa kusombela mu Guinée.

Ke meme kupingana ku Betele wa mu Sierra Leone, kuleja bana betu mukanda au. Bakela mbila ya disanka pakamonabu muvua Yehowa mubeneshe luendu luanyi, pavuabu bampeshe mukanda uvua unganyishila bua kusombela mu Guinée!

Kutuadijila mu 1978 too ne mu 1989, ngakenza mudimu wa butangidi bua tshijengu mu Guinée, mu Sierra Leone, ne mu Libéria bu muambuluishi. Kumpala, mvua ntamba kusama bikole. Imue misangu mvua nkasamina mu misoko ya kule menemene. Kadi bana betu bavua badienzeja bua kumfikisha ku lupitadi.

Musangu mukuabu ngakasama malaria makole ne misanda. Pangakumvua bimpe, ngakumvua ne: bana betu bakavua benda badiabakena bua muaba wa kunjikila. Nansha muvua malu makole aa antulukila, tshivua muele meji musangu nansha umue bua kulekela midimu yanyi to. Ndi anu mutuishibue ne: bukubi bulelela buashalaku kashidi budi bufumina anu kudi Nzambi udi ne bukole bua kutubisha ku lufu.

DIEYEMENA YEHOWA MU DIBAKA

Mu 1988, ngakatuilangana ne Dorcas uvua mpanda-njila uvua munange Yehowa ne uvua ne budipuekeshi. Tuetu kuselangana nende kutungunuka ne mudimu wa butangidi bua tshijengu. Wakenza mudimu bikole pamue nanyi ne uvua udipangisha bia bungi bua Yehowa. Tuvua tuenda nende kilometre 25 tumbuka mu tshisumbu tuya mu tshikuabu bambule mabuki. Bua bisumbu bivua kule, tuvua tukeba mushindu wa kufikaku tuenza luendu mu njila ya bitotshi ne binina.

Dorcas mmukaji wa muoyo mukole. Tshilejilu, kuvua misangu ituvua tusabuka nende mâyi avua ne ngandu ya bungi. Dimue edi, tuvua tuenza luendu lua matuku 5, kadi bilamba bia mitshi bituvua tupitshila bivua bikoseke, nunku tuvua ne bua kusabuka ne matu. Pakavua Dorcas upatuka mu buatu, wakakuluka mu mâyi male. Tuetu bonso katuvua bamanye kuowela to, kadi pabi mu mâyi au muvua ngandu ya bungi. Diakalenga, nsongalume mikuabu yakadiela mu mâyi, kumupandishaye. Bua bualu abu, tuakashala tulota bilota bibi munkatshi mua tshikondo kampanda; nansha nanku tuakatungunuka ne mudimu wetu.

Mu 1992, patuakamanya ne: Dorcas uvua ne difu, biakatukemesha bikole! Tuakadiebeja ne: mudimu wetu newimane anyi? Tuakamona ne: “Divua dipa dia kudi Yehowa!” Nunku tuakambilangana bua kupesha muanetu wa bakaji au kadîna ka mu Anglais ne: Jahgift (mmumue ne: Kupa kua Yah). Panyima pa bidimu 4 Dorcas wakalela kabidi Eric. Bana betu bonso babidi aba, mmapa a kudi Yehowa. Tshikondo kampanda, Kupa wakenza mudimu mu biro bia dikudimuna mikanda mu Conakry, kadi Eric yeye mmusadidi.

Nansha muvua Dorcas mulue kuimanyika bumpanda-njila bua pa buabu, wakatungunuka ne bua pa tshibidilu, nansha muvuaye ulama bana. Yehowa wakangambuluisha meme kutungunuka ne mudimu wanyi wa pa buawu wa ku dîba ne ku dîba. Pakakola bana betu, Dorcas wakangatulula bumpanda-njila bua pa buabu. Mpindieu tudi nende bamisionere mu Conakry.

MPOKOLO WA BUKUBI BULELELA

Ndi mmuye miaba yonso ivua Yehowa musue bua meme kuya. Meme ne mukajanyi tudi bamone mudi Yehowa mutukube misangu ya bungi ne mutubeneshe. Kueyemena Yehowa pamutu pa kueyemena bintu nkutuepule ku malu a bungi adi mua kutukebela tunyinganyinga. Malu adi matufikile ne Dorcas mmatulongeshe ne: ‘Yehowa Nzambi wa lupandu luetu’ ke Mpokolo wa bukubi bulelela. (1 Kul. 16:35) Ndi mutuishibue ne: muoyo wa muntu yonso udi umueyemena “newikale mujingila bimpe menemene mu tshibuta tshia muoyo tshidi kudi Yehowa.”—1 Sam. 25:29.