Nkonko ya babadi
Bua tshinyi bamue bantu batu bamba ne: Misambu 12:7 udi wakula bua “mêyi a Yehowa” (mvese 6) kadi Bible wa Nkudimuinu wa Bulongolodi bupiabupia wamba yeye ne: udi wakula bua “bakengi” (mvese 5)?
Nshapita au mujima udi wakula bua bantu.
Tudi tubala mu Misambu 12:1-4 ne: “Bena lulamatu mbajimine munkatshi mua bantu.” Mmulue kuamba mu Misambu 12:5-7 ne:
“‘Bu mudibu bakengesha bakengi,
Ne bua mikemu ya bapele,
Nenjuke bua kuenza bualu,’ ke mudi Yehowa wamba.
‘Nembapandishe kudi badi babenzela malu ne kapeja.’
Mêyi a Yehowa mmakezuke;
Adi bu tshiamu tshia arjan tshilengejila mu mfulu wa buloba, tshikezula misangu muanda mutekete.
Yehowa, wewe neubalame;
Neukube yonso wa kudibu kudi bantu ba tshipungu etshi bua kashidi.”
Mvese 5 udi uleja tshienzela Nzambi “bakengi.” Neabakube.
Mvese 6 ulua kuamba ne: ‘mêyi a Yehowa mmakezuke; bu tshiamu tshia arjan tshilengejila.’ Mêyi aa adi aleja tshitutu tumvua bua dîyi dia Yehowa.—Mis. 18:30; 119:140.
Tupitayi mpindieu ku mvese wa 7. Udi wamba ne: “Yehowa, wewe neubalame; neukube yonso wa kudibu kudi bantu ba tshipungu etshi bua kashidi.” Bua tshinyi Bible wa Nkudimuinu wa Bulongolodi bupiabupia udi wakula bua bantu mu mvese eu?
Bu mudi mvese wa 7 eu mulue panyima pa mvese 6 udi muakule bua “mêyi a Yehowa,” bamue badi bamba ne: mvese wa 7 kena wakula bua bantu to. Tuamba eku tuela eku, tudi bamanye mudi Nzambi mulame Bible nansha mudi bantu bakebe bua kumujimija anyi mudibu bamukandikangane.—Yesh. 40:8; 1 Pet. 1:25.
Nansha nanku, mvese 5 mmuambe pende ne: Yehowa udi ulama bantu. Yehowa ukadi muambuluishe “bakengi” ne badi “bakengeshibua” ne mmubakube; neatungunuke ne kubambuluisha ne kubakuba.—Yobo 36:15; Mis. 6:4; 31:1, 2; 54:7; 145:20.
Tuambe aku, mvese wa 7 udi wakula bua bantu anyi bua mêyi a Yehowa?
Tuetu babale bimpe bimpe Musambu wa 12 au mujima, netumone ne: udi wakula bua bantu.
Tshilejilu, Misambu 12:1 udi wakula bua “bena lulamatu” badibu bashime. Pishishe tudi tupeta tshiambilu tshia ne: Yehowa neanyoke bena dishima. Nshapita wa 12 eu udi utukolesha ne: mbimpe tueyemene Nzambi watuluangena bualu mêyi ende mmakezuke.
Nunku mvese wa 7 udi wamba ne: Yehowa ‘neabalame’ ne ‘neabakube,’ tuambe ne: badibu bakengesha kudi bantu babi.
Ke tshivua tshiamba mu Mifundu ya tshiena Ebelu ivua bantu beyemena. Bible wa Septante wa mu tshiena Greke mmutele muaku ‘tuetu’ misangu ibidi mu mvese eu bua kuleja bena lulamatu badi bakenga ne badibu bakengesha. Bualu bukuabu, mvese wa 7 au udi wamba kabidi ne: ‘yonso wa kudibu,’ tuambe ne: wa ku bena lulamatu, neakubibue “kudi bantu ba tshipungu etshi,” bantu badi batumbisha bikadilu binyanguke. (Mis. 12:7, 8) Mbakudimune mvese wa 7 eu mu Mifundu ya tshiena Ebelu ya mu tshiena Amalama ne: “Wewe MUKALENGE, neukube bantu bakane, neubakube kudi bantu ba tshipungu tshibi etshi bua kashidi. Bantu babi badi baya mu nseke yonso, anu bu musundu utu unua bana ba bantu mashi.” Tshivua tshiamba mu Bible au ntshijadiki tshikuabu tshia ne: Misambu 12:1 kena wakula bua mêyi a Nzambi to.
Bua bualu abu, mvese eu udi upesha “bena lulamatu” ditekemena dia ne: Nzambi neabaluile mvita