Leja dianyisha bua mudi Yehowa upeshangana bintu

YEHOWA n’Nzambi utu upeshangana bintu. (Yakobo 1:17) Tudi mua kumona ngikadilu wende eu ku diambuluisha dia bintu bidiye mufuke. Mmuwuje tshibuashibuashi ne mitoto, ne mmuwuje buloba ne mitshi mimpe.—Musambu 65:12, 13; 147:7, 8; 148:3, 4.

Bu muvua mufundi wa Misambu wa 104 ne dianyisha bua bintu bivua Yehowa mufuke, wakafunda musambu bua kumutumbisha. Paudi ubala musambu eu, udiku pebe ne dianyisha anu bu mufundi wa Misambu eu anyi? Wakamba ne: ‘Nengimbile Yehowa misambu pantshidi ne muoyo; nengimbile Nzambi wanyi misambu ya kumutumbisha nayi pantshidiku.’ (Musambu 104:33) Udiku pebe musue kuenza bia muomumue anyi?

TSHILEJILU TSHINENE TSHIA DIPESHANGANA BINTU

Yehowa mmusue bua tuikale petu tupeshangana bintu. Udi utuleja malu mimpe adi atusaka bua kupeshangana bintu. Wakasaka mupostolo Paulo ku nyuma wende bua kufunda ne: “Ambila bantu badi babanji mu ndongoluelu wa malu eu bua kabikadi bena lutambishi, bua kabateki ditekemena diabu mu bubanji budi mua kujimina, kadi baditeke kudi Nzambi udi utupesha bintu bionso bitudi tusanka nabi. Ubambile bua benze malu mimpe, bikale babanji mu midimu mimpe, bikale bapeshanganyi ba bintu, bikale badiakaje bua kuabanyangana bintu ne bakuabu, ne nunku badi baditekela tshishimikidi tshimpe bua matuku atshilualua, bua bakuate bikole ku muoyo wa bushuwa.”—1 Timote 6:17-19.

Paulo wakumvuija mu mukanda muibidi uvuaye mutumine bena Kolinto lungenyi lutudi ne bua kuikala nalu patudi tupesha bakuabu bintu. Wakamba ne: “Muntu ne muntu enze bu mudiye mupangadije mu muoyo wende, kenji ne kanyinganyinga anyi bu muenzeja ku bukole, bualu Nzambi mmunange muntu udi ufila ne disanka.” (2 Kolinto 9:7) Mbanganyi batudi tuambuluisha patudi tupeshangana bintu? Paulo wakamba ne: tudi tuambuluisha bakuabu patudi tubapesha bidibu nabi dijinga, ne tudi tudiambuluisha petu bualu Yehowa neatubeneshe.—2 Kolinto 9:11-14.

Pashishe Paulo wakakula bua tshijadiki tshitambe bunene tshia mudi Nzambi upeshangana bintu pakambaye ne: “Tudi tuela Nzambi tuasakidila bua dipa diende difila tshianana didi kadiyi kuamba.” (2 Kolinto 9:15) Dipa didi Yehowa ‘mufile tshianana,’ didi dikongoloja bintu bionso bimpe bidiye mutupeshe ku diambuluisha dia Yezu Kristo. Tudi bapange mêyi makumbane bua kumvuija mushinga udi nawu dipa edi!

Mmunyi mutudi mua kuleja ne: tudi ne dianyisha bua bionso bidi Yehowa ne Yezu batuenzele ne bialuabu kutuenzela? Umue mushindu mpatudi tufila dîba dietu, makanda etu, ne bintu bietu bua ntendelelu wa Yehowa ne bua kuambuluisha bakuabu bua kumumanya. Tudi mua kuenza nunku nansha tuetu ne bintu bia bungi anyi bikese.—1 Kulondolola 22:14; 29:3-5; Luka 21:1-4.

Mushindu udi bamue bafila mapa bua mudimu wa pa buloba bujima

Anu bu bena Kristo ba mu bidimu lukama bia kumpala, bantu ba bungi lelu batu bateka makuta ku luseke bua mudimu wa pa buloba bujima ne baela mu tushete tua mapa tua mu Nzubu yabu ya Bukalenge. (1 Kolinto 16:2) Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Nudi mua kutuma kabidi makuta aa buludiludi ku biro bia Bantemu ba Yehowa bidi bitangila mudimu mu ditunga dienu. Bua kumanya bulongolodi budi Bantemu ba Yehowa benza nabu mudimu mu ditunga dienu, buela mu site wa www.jw.org ne ebeja Betele wa Bantemu ba Yehowa wa muaba uudi. Mapa anudi mua kutuma ngowu aa:

DIFILA BINTU BITUDI NABI

Mmapa adi muntu wela ku banke anyi ufila ku diambuluisha dia karte ka kuangata naku makuta ku banke. Mu amue matunga, batu kabidi bafila makuta aa ku diambuluisha dia site wa jw.org peshi dia site mukuabu.
Nudi mua kufila makuta, bilengejilu bu mudi mpeta ne bikanu bia or peshi bintu bikuabu bia mushinga mukole. Nutume makuta anyi bintu ebi ne mukanda muîpi udi uleja ne: nudi babitume bua kashidi.

DILAMISHA MAKUTA

Muntu udi mua kufila bintu biende nansha makuta bua balue kumupingajila pikalaye nawu dijinga.
Muntu udi mua kufunda mukanda udi uleja ne: bintu ebi mbia kupingaja.

MISHINDU MIKUABU YA KUFILA MAPA

Mbaleje kuinshi eku mishindu mikuabu ya kufila mapa bua kutua mudimu wa diyisha udi wenzeka pa buloba bujima nyama ku mikolo. Kumpala kua wewe kufila mapa aa, suaku wanji kuebeja Betele udi utangila midimu ya mu ditunga dienu bua kumanya mishindu idiku idibu bakuata nayi mudimu mu ditunga dienu. Bu mutu mikenji ne bitadi bishintuluka, mbimpe kuebeja bantu badi bamanye bimpe malu a bitadi ne mikenji kumpala kua wewe kusungula mushindu muimpe wa kufila mapa.

Makuta a tshieya: Mmapa adi muntu mua kupesha bumue bua ku malongolodi adi Bantemu ba Yehowa benza nawu mudimu ne kuleja mudi bulongolodi ebu ne bukenji bua kuangata makuta ende a tshieya anyi a pansio.

Konte ya ku banke: Bilondeshile mikenji ya banke ya muaba uudi, muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio. Udi kabidi mua kuleja ne: bumue bua ku malongolodi adi Bantemu ba Yehowa benza nawu mudimu nebuangate makuta ende padiye ufua.

Bukenji bua kupeta bintu ne makuta masombesha: Muntu udi mua kupesha bumue bua ku malongolodi adi Bantemu ba Yehowa benza nawu mudimu bintu biende. Udi kabidi mua kufunda bua kuleja ne: bulongolodi nebuangate bintu biende ebi padiye ufua.

Mpangu ne nzubu: Muntu udi mua kufila lupangu anyi nzubu wende kudi bumue bua ku malongolodi adi Bantemu ba Yehowa benza nawu mudimu bua kashidi, kadi bikalaye musombele mu lupangu elu, udi mua kutungunuka ne kusombelamu too ne muafuaye.

Dipa dia kufuta ku tshidimu: Mmakuta anyi mikanda bidibu bapesha bumue bua ku malongolodi adi Bantemu ba Yehowa benza nawu mudimu, bumvuangana ne muntu udi ubifila anyi muntu udiye musungule bua kutuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila bumue bua ku malongolodi adi Bantemu ba Yehowa benza nawu mudimu bintu anyi makuta ende padiye ufua, peshi kubupa bukenji bua kuangata bintu bidiye mulamishe. Kuenza nunku kudi mua kukepeshisha mushinga wa bitadi.

Bua kumanya malu a bungi a mushindu wa kufila mapa malongolola bua mudimu wa Bantemu ba Yehowa wa pa buloba bujima, mbapatule broshire wa mu Anglais ne mu tshiena Espagne udi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Mbenze broshire eu bua kuleja mishindu mishilashilangane idi bantu mua kufila mapa. Malu adibu baleje mu broshire eu kaena anu mua kuikala akutangila wewe bilondeshile bitadi ne mikenji idi mu ditunga dienu to. Nunku, paudi umubala, udi kabidi ne bua kuebeja bantu badi bamanye mikenji ne malu a bitadi bia mu ditunga dienu. Bantu ba bungi badi benze mudimu ne mishindu ya difila mapa eyi mbafike ku diambuluisha mudimu wetu wa pa buloba bujima, ne mbabakepeshile bungi bua makuta a bitadi avuabu bafuta. Bikala broshire eu mu ditunga dienu, udi mua kumulombesha kudi sekretere wa mu tshisumbu tshienu.

Bua kumanya malu makuabu, udi mua kubikila anyi kufundila Betele udi utangila mudimu mu ditunga dienu.