Ntshinyi tshidi Bible wamba bua bipupu?
Diandamuna dia mu Bible
Bible ukavua mudianjile kuleja ne: bipupu bia masama (mmumue ne: masama avua mua kutampakana bikole mu bantu) bivua ne bua kuikalaku mu matuku a ku nshikidilu. (Luka 21:11) Bipupu ebi ki ndinyoka dia kudi Nzambi to. Kadi mu katupa kîpi emu Nzambi neajikije masama onso ku diambuluisha dia Bukalenge buende, nansha bipupu kabidi.
Bible ukavuaku muleje ne: bipupu bivua ne bua kuenzeka anyi?
Bible ki mmutele bipupu anyi masama masunguluke bu mudi tshipupu tshia korona (COVID-19), disama dia sida, dia tshiadi, maleyaleya, anyi tshimpumpu tshia bena Espanye to. Kadi ukavua mumanyishe ne: “bipupu bia masama” ne “tshipupu tshia lufu” bivua ne bua kuenzeka. (Luka 21:11; Buakabuluibua 6:8) Bipupu bionso ebi bidi mu malu adi enza tshimanyinu tshia “matuku a ku nshikidilu,” adibu babikila kabidi ne: “nshikidilu wa ndongoluelu wa malu eu.”—2 Timote 3:1; Matayi 24:3.
Nzambi ukadiku mutumine bantu masama bua kubanyoka anyi?
Bible udi utela misangu mitshintshika ivua Nzambi mutumine bantu masama bua kubanyoka. Tshilejilu, wakatua bamue bantu nsudi. (Nomba 12:1-16; 2 Bakalenge 5:20-27; 2 Kulondolola 26:16-21) Malu aa avua akuata anu muntu umue ne kaavua bu bipupu bidi bikuata too bantu badi kabayi ne bualu to. Kadi avua bushuwa manyoka avua Nzambi upesha bantu bavua bamutombokele.
Bipupu bidiku lelu ndinyoka dia kudi Nzambi anyi?
Tòo. Bantu bakuabu batu bamba ne: lelu eu Nzambi ke udi utumina bantu bipupu anyi masama bua kubanyoka. Kadi Bible yeye kena ulongesha nanku to. Bua tshinyi?
Bualu nansha bamue batendeledi ba Nzambi ba kale ne ba matuku etu aa batu basama pabu. Tshilejilu, Timote muntu wa lulamatu wakakenga ne “tusamasama.” (1 Timote 5:23) Kadi Bible kena wamba ne: bualu abu buvua buleja muvua Nzambi katshiyi umuanyisha to. Bia muomumue lelu, batendeledi ba Nzambi ba lulamatu batu pabu basama. Misangu ya bungi bualu bantu abu bavua pa muaba mubi pa dîba dibi.—Muambi 9:11.
Bualu bukuabu, Bible udi ulongesha ne: tshikondo tshia Nzambi kunyokaye bantu babi ki ntshianji kukumbana to. Nansha nanku, tudi “mu dituku dia lupandu,” mmumue ne: tshikondo tshidi Nzambi ubikila bantu bonso bua basemene pabuipi nende ne basungidibue. (2 Kolinto 6:2) Udi ubikila bantu ku diambuluisha dia mudimu udi wenzeka pa buloba bujima wa kuyisha mukenji muimpe, mbuena kuamba ne: “lumu luimpe . . . lua Bukalenge.”—Matayi 24:14.
Bipupu nebijikaku dimue dituku anyi?
Eyowa. Bible udi uleja ne: mu katupa kîpi emu muntu nansha umue kakusama kabidi to. Nzambi neondope masama onso mu bukokeshi bua Bukalenge buende. (Yeshaya 33:24; 35:5, 6) Neajikije makenga, lufu ne bintu bidi bisama. (Buakabuluibua 21:4) Neabishe bantu bakadi bafue bua bikale ne makanda a mubidi ne nsombelu muimpe pa buloba.—Misambu 37:29; Bienzedi 24:15.
Mvese ya mu Bible idi yakula bua masama
Matayi 4:23: “[Yezu] wakanyunguluka mu Galela mujima, ulongesha mu nsunagoga yabu, uyisha lumu luimpe lua Bukalenge, wondopa masama a mishindu yonso ne matekete a mishindu yonso munkatshi mua bantu.”
Diumvuija: Bishima bivua Yezu muenze bivua kadiosha ka malu ikala Bukalenge bua Nzambi mua kuenzela bukua bantu mu katupa kîpi emu.
Luka 21:11: ‘Nekuikale bipupu bia masama.’
Diumvuija: Masama adi matampakane adi mu malu adi enza tshimanyinu tshia matuku a ku nshikidilu.
Buakabuluibua 6:8: “Tangila! kabalu katokoloke, ne eu uvua musombapu uvua ne dîna ne: Lufu. Ne Lukita luvua lumulonda pabuipi. Bakabapesha bukokeshi . . . bua kushipa ne . . . tshipupu tshia lufu.”
Diumvuija: Dîyi dia buprofete didi diakula bua bendeshi ba tubalu banayi ba mu Buakabuluibua didi dileja ne: bipupu bivua ne bua kuenzeka tshikondo tshietu etshi.