NKONKO IDI BANSONGA BADIELA

Mbimpe meme kubatijibua anyi?—Tshitupa tshia 1: Tshidi batismo umvuija

Bansonga ba bungi badi bakolela mu mêku a Bantemu ba Yehowa batu babatijibua tshidimu tshionso etshi. Utu pebe wela meji a kuangata batismo anyi? Bikalabi nanku, tshia wewe kuanji kuenza ntshia kumanya tshidi mene didilambula ne batismo biumvuija.

Batismo ntshinyi?

Batismo udibu bamba mu Bible nkuina kua muntu yonso mujima mu mâyi, kadi ki nkumumiamina kua mâyi patupu to, bualu kuinyibua mu mâyi nanku kudi ne diumvuija dinene.

Kuinyibua muinshi mua mâyi dîba dia batismo kudi kuleja patoke ne: kutshiena ne muoyo bua kuenza anu malu adi akusankisha wewe to.
Kupatuka mu mâyi kudi kuleja muudi mubange nsombelu mupiamupia udi mutangija yeye nangananga ku dienza malu adi asankisha Nzambi.

Paudi ubatijibua, udi uleja patoke muudi witaba ne: Yehowa ngudi ne bukokeshi bua kutuelela mikenji ya tshidi tshimpe ne tshidi tshibi, ne udi umanyisha bonso mutshipu uudi muenze wa kulonda tshidiye ukulomba ne muoyo wonso wa budisuile.

Tshia kuelela meji: Bua tshinyi mbimpe wewe kuitaba ku mêsu kua bonso bua kushala utumikila Yehowa mu nsombelu webe mujima? Tangila 1 Yone 4:19 ne Buakabuluibua 4:11.

Didilambula ntshinyi?

Kumpala kua wewe kubatijibua, mbimpe wewe kuanji kudilambula pa nkayebe kudi Yehowa. Neudilambule mushindu kayi?

Mmu disambila dia pa nkayebe dia wambila Yehowa ne: udi umulaya bua kumuenzela mudimu kashidi, kabidi ne: newenze tshidiye yeye musue nansha nsombelu kayi mua kumueneka, nansha bakuabu mua kusungula tshikuabu tshia kuenza.

Mmumue ne: batismo nkuleja patoke ne: ukavua mudilambule pa nkayebe mushindu au. Batismo udi uleja bakuabu ne: kutshiena kabidi mfumu wa malu ebe to, mpindieu ukadi muntu wa Yehowa.—Matayi 16:24.

Tshia kuelela meji: Bua tshinyi nsombelu webe neatambe kulengela paudi ulua muntu wa Yehowa? Tangila Yeshaya 48:17, 18 ne Ebelu 11:6.

Bua tshinyi kubatijibua kudi ne mushinga?

Batismo mbualu budi Yezu mulombe bonso badi balua bayidi bende. (Matayi 28:19, 20) Ke bualu kayi batismo utshidi bualu budi bulombibue kudi bena Kristo. Mu kuamba kuimpe, Bible udi wamba ne: bidi bikengela kuangata batismo bua kupandishibua.—1 Petelo 3:21.

Kadi tshidi ne bua kukusaka bua kubatijibua mbimpe tshikale dinanga ne dianyisha biudi nabi kudi Yehowa. Ngelelu webe wa meji ikale bu wa mufundi wa Misambu wakafunda ne: “Nempingajile Yehowa tshinyi bua malu mimpe onso adiye mungenzele? . . . Nembile dîna dia Yehowa. Nenkumbaje mitshipu yanyi kudi Yehowa.”—Misambu 116:12-14.

Tshia kuelela meji: Mbualu kayi buimpe bukadi Yehowa mukuenzelaku? Ntshinyi tshiudi pebe mua kumufuta? Tangila Dutelonome 10:12, 13 ne Lomo 12:1.

Tshidi bansonga nebe bamba

“Kudilambula kudi kumvuija dilaya diudi ulaya Yehowa didi kadiyi dia bilele to. Kadi kuikala ne nsombelu wa bantu ba Yehowa badi badilambule kudiye kudi ne masanka mapite. Kabidi yeye muine si udi mua kututabalela bimpe kupita ne mutudi mua kuditabalela tuetu nkayetu.”—Mijin.

“Yehowa ukadi mumane kuleja mudiye mukunange wewe. Kubatijibua mmushindu wa wewe kuleja muudi mumunange pende bikole. Kubatijibua ndiakalenga dia dikema ne ndibenesha dinene!”—Ember.

“Kusungula bua kudilambula kudi Nzambi ne kubatijibua ndipangadika ditambe bunene didi muntu udiangatshila. Kadi kadikuenji buôwa to. Wewe mudilongolole ne mudiangatshiladi ne kipatshila kakane, didi dilua dipangadika ditambe onso ku buimpe mu nsombelu webe.”—Julian.

Mudi bamue babuejakaja ne bulelela bua bualu

MUDI BAMUE BABUEJAKAJA: Anu bakulumpe bakadi bashindame ke badi bakumbane bua kubatijibua.

BULELELA BUA BUALU: Kuikala mushindame ki mbualu bua bidimu to, mbualu bua dinanga didi nadi muntu kudi Yehowa ne bua mudiye mudiakaje bua kumutumikila. Mushindu au si ke uvua Jozefe ne Samuele ne Yoshiya baleje mukavuabu bashindame nansha mutshivuabu bana. Bansonga ba bungi lelu eu badi benza bia muomumue.

Bible udi wamba ne: “Muana badi bamumanyina ku malu adiye wenza, bikala bienzedi biende bikezuke ne biakane.”—Nsumuinu 20:11.

MUDI BAMUE BABUEJAKAJA: Padi balunda bebe babatijibua, mbimpe wewe kubatijibua pebe.

BULELELA BUA BUALU: Dipangadika dia kudilambula ne kubatijibua ndia muntu udiangatshila nkayende ku budisuila bua muoyo wende. Batismo ki mmukiya udi uleja ne: muana mmupite anyi mmufike pa tshipimu tshia buntu bukole wa wewe kuenza anu bualu bakuabu badi bawenza anyi bualu udi udiambila ne: bakuabu mbashale bantangidile to.

Bible udi wamba ne: “Bantu [ba Nzambi] nebadifile ku budisuile.”—Misambu 110:3.

MUDI BAMUE BABUEJAKAJA: Paudi kuyi mubatijibue, bionso biwenza abi kakuena wakulumbuluishilabi to.

BULELELA BUA BUALU: Paudi ubatijibua ki mpaudi ulua muena dibanza kudi Yehowa to, kadi ndîba diukadi anu mumanye tshidi tshimpe ne tshidi tshibi ku mêsu kuende.

Bible udi wamba ne: “Bikala muntu mumanye mua kuenza tshidi tshimpe kadi kayi utshienza, udi wenza mpekatu.”—Yakobo 4:17.

MUBELU: Bujitu bua kulua muena Kristo muditshipe ukadi mubatijibue buobu bukuenza buôwa, mbimpe wenze tshidi tshikengela bua kudiata buôwa abu kubutshimuna. Bua kuenza nanku, bala nshapita wa 37 wa mukanda wa Les jeunes s’interrogent—Réponses pratiques, volume 2.