Padi mudimu webe ufua, mêyi a mu Bible adi mua kukuambuluisha
Dijimija dia mudimu didi mua kukulelela lutatu lua makuta, kubueja dîku diebe mu dikenga anyi kabidi kukutshiokesha mu lungenyi. Mona mibelu mimpe ya mu Bible idi mua kukuambuluisha bua kupita bimpe ne lutatu elu.
Ambila bakuabu muudi umvua.
Tshidi Bible wamba: “Mulunda mulelela udi uleja dinanga mu bikondo bionso.”—Nsumuinu 17:17.
Panyima pa dijimija dia mudimu, udi mua kubungama, kumvua tshiji, anyi lungenyi kalutshiyi muaba umue, peshi umona ne: malu onso mmanyanguke. Paudi wambila bena mu dîku ne balunda bebe muudi umvua, badi mua kukukankamija bua udiumvua bimpe. Badi kabidi mua kukupesha mibelu mimpe idi mua kukuambuluisha bua kupeta mudimu mukuabu.
Kutambi kusamisha mutu bikole to.
Tshidi Bible wamba: “Kanuditatshishi bua dituku didi dilonda nansha, bualu dituku didi dilonda nedikale ne yadi ntatu.”—Matayi 6:34.
Bible udi utukankamija bua kudianjila kulongolola malu. (Nsumuinu 21:5) Kadi udi kabidi utubela bua katutambi kusamisha mutu bua matuku atshilualua. Tutu tutamba kusamisha mutu bua malu adi kaayi nansha mua kutufikila to. Mbimpe tutume meji etu ku malu atudi ne bua kuenza anu bua dituku dia lelu.
Bible udi ufila mibelu ya meji ya bungi ya mua kupita bimpe ne tunyinganyinga tuudi natu. Bua kumanya malu makuabu, bala tshiena-bualu tshia ne: “Tshia kuenza paudi ne tunyinganyinga.”
Akajilula mushindu webe wa kutula makuta.
Tshidi Bible wamba: “Ndi mulonge . . . tshia kuenza pandi ne bintu bia bungi ne pandi tshiyi nabi.”—Filipoyi 4:12.
Ibidilangana ne nsombelu mupiamupia uudi nende. Mmumue ne: ushintulule mushindu uudi utula makuta bua kufiki ku ditula a bungi kupite audi nawu to. Kubuedi mabanza a lukutukutu to.—Nsumuinu 22:7.
Bua kumanya malu makuabu a mua kutula makuta bilondeshile nsombelu uudi nende, tangila tshiena-bualu tshia ne: “Muudi mua kutula makuta makese audi nawu.”
Kuata mudimu bimpe ne dîba diebe.
Tshidi Bible wamba: “Tungunukayi ne kuenda ne meji . . . , nukuata mudimu bimpe menemene ne dîba dienu.”—Kolosayi 4:5.
Nansha wewe kutshiyi ne programe wa kuya ku mudimu, kushintuludi mushindu uuvua wenza malu ne dîba diebe to. Kuenza nunku nekukuambuluishe bua kuenza malu ne bulongame ne nekukupeteshe bukole bua bungi.
Itaba bua kuenza mudimu kayi wonso.
Tshidi Bible wamba: “Mudimu mukole wonso udi ne difutu.”—Nsumuinu 14:23.
Itaba bua kuenza mudimu mukuabu mushilangane ne uuvua wenza kumpala. Nebikulomba pamuapa bua kuenza midimu itu bantu bamone ne: nki nya nsongo ayi, anyi idibu bafuta makuta makese kupita auvua upeta ku mudimu webe wa kumpala awu.
Kutshioki to.
Tshidi Bible wamba: “Kuna mamiinu ebe mu dinda ne kulekedi tshianza tshiebe tshikisha too ne dilolo; bualu kuena mumanye bikala mua kukola.”—Muambi 11:6.
Tungunuke anu ne kukeba mudimu. Manyisha bakuabu ne: udi mu dikeba dia mudimu. Yukila ne bena mu dîku diebe, bantu baudi mumanyangane nabu, bena mudimu nebe ba kale, ne bena mutumba nebe. Keba kumpanyi itu yangata bantu ku mudimu, miaba idibu balamike mamanyishaanyi kumpanyi idi ikeba bena mudimu kupitshila ku Enternete. Ikala mumanye ne: newikala ne bua kuya miaba itubu bela bantu batu bakeba midimu nkonko, ne ufile mikanda ya dilomba nayi mudimu miaba ya bungi.