Malu adi atusaka bua kulama ditekemena dietu mu 2023​—Ntshinyi tshidi Bible wamba?

Bu mukadi tshidimu tshia 2023 tshituadije, tuetu bonso ne mêku etu tudi batekemene ne: malu mimpe neenzeke. Bua tshinyi tudi batekemene nanku?

Bible udi ufila ditekemena

Bible udi umanyisha bantu lumu luimpe lua ne: ntatu itudi nayi lelu nya tshitupa tshîpi, ne mu katupa kîpi emu neyijike. Bushuwa, bavua bafunde Bible “bua kutulongesha, bua tupete ditekemena ku diambuluisha. . . dia busambi bua mu Mifundu.”​—Lomo 15:4.

•  Bua kumanya malu makuabu adi Bible ulaya, bala tshiena-bualu tshia “Ditekemena dilelela dia matuku atshilualua mimpe.”

Ditekemena didi mua kukuambuluisha lelu

Ditekemena dia mu Bible didi bu “luongo bua mioyo yetu.” (Ebelu 6:19, dimanyisha dia kuinshi kua dibeji) Ditekemena adi didi mua kutushindamija. Didi mua kutuambuluisha bua kutantamena ntatu itudi nayi lelu, kuikala ne muoyo mukole, ne kupeta disanka dia kashidi. Tshilejilu:

•  Mona muvua ditekemena dia mu Bible diambuluishe muntu uvua mukuatshike mu bupika bua bukanuayi. Tangila filme wa Nsombelu au ukavua muntonde.

•  Mona mudi ditekemena dia mu Bible mua kutuambuluisha patudi tufuisha. Tangila filme wa Kusamba badi bafuishe.

Kolesha ditekemena diebe

Bantu ba bungi badi bajinga ne: malu mimpe enzeke kumpala eku, kadi ki mbajadike ne: malu au neenzeke anyi kaakuenzeka to. Malu adi Bible yeye ulaya neakumbane too ne mu katoba. Bua tshinyi? Bualu milayi ya mu Bible nya kudi Yehowa Nzambia nkayende “udi kayi mua kushima” to. (Tito 1:2) Anu Yehowa ke udi ne bukole bua kukumbaja milayi yende yonso; udi mua kuenza “tshintu tshionso tshidiye musue kuenza.”​—Misambu 135:5, 6.

Tudi tukulomba ne disanka dionso bua umone mudi ditekemena dilelela dia mu Bible mua kukuambuluisha. Wewe ‘ukonkonona Mifundu bimpe menemene,’ neufike ku dituishibua ne: malu atudi tutekemena neakumbane. (Bienzedi 17:11) Dimuenena nkayebe pa kuteta programe wetu wa dilonga dia Bible dia ulonga ne mulongeshi kuyi ufuta to. Tuadija tshidimu tshia 2023 ne ditekemena dimpe!