Didimuija bua bubi bua miaba ya dipetelangana ku Enternete kudi bana​—Ntshinyi tshidi Bible wamba?

Mu dia 23/5/2023, munene mukuabu wa malu a makanda a mubidi wa mu États-Unis mmudimuije bantu bua bubi bua miaba ya dipetelangana ku Enternete kudi bana ba bungi.

• “Nansha mudi miaba ya dipetelangana ku Enternete mua kuambuluisha bana ne bantu bakole, kudi bijadiki bia bungi bidi bileja ne: miaba ayi mmifuane kubakebela kabidi njiwu ya bungi ya kupeta masama a mitu ne kunyanga makanda abu a mubidi.”​—Social Media and Youth Mental Health: The U.S. Surgeon General’s Advisory, 2023.

Mu luapolo alu mbatele makebulula adibu benze adi aleja malu adi atusamisha mutu.

• Bana ba bidimu 12 too ne 15 “badi bapitshisha mêba mapite pa 3 ku dituku miaba ya dipetelangana ku Enternete badi mu njiwu mikole ya kupeta masama a mitu, bu mudi dibungama dikole ne kanyinganyinga.”

• Padi bana ba bidimu 14 “babuela bikole miaba ya dipetelangana ku Enternete kabena batamba kulala, badi babatatshisha bikole ku Enternete, badi bumvua bibi bua tshimuenekelu tshiabu, kabena badiangata ne mushinga, ne badi babungama bikole. Bualu ebu budi bufikila nangananga bana ba bakaji.”

Mmunyi mudi baledi mua kukuba bana babu ku njiwu ayi? Bible udi ufila mibelu idi yambuluisha.

Tshidi baledi mua kuenza

Dibuejayi mu malu a muanenu. Konkononayi njiwu idi miaba ya dipetelangana ku Enternete ne angatayi dipangadika dia kumona ni mbikumbane bua bana benu babuela miaba ayi, anyi kababuedimu.

• Dîyi dia mu Bible: “Longesha muana njila udiye ne bua kulonda.”​—Nsumuinu 22:6, dimanyisha dia kuinshi kua dibeji.

• Bua kumanya malu makuabu, balayi tshiena-bualu tshia “Mon enfant devrait-il utiliser les réseaux sociaux?”

Nuenu bitabile muanenu bua kubuela miaba ya dipetelangana ku Enternete, nudimukile njiwu idiye mufuane kupeta ne nukebe bua kumanya tshidiye wenza ku Enternete. Mushindu kayi?

Kubayi muanenu ku bintu bibi. Longeshayi muanenu mua kumanya bintu bibi ne kubiepuka.

• Dîyi dia mu Bible: “Masandi ne malu a bukoya a mishindu yonso anyi lukuka kabitedibu nansha munkatshi muenu, . . . nansha bikadilu bia bundu anyi biakulakula bia patupu anyi mineku ya busenji.”​—Efeso 5:3, 4.

• Bua kumanya malu makuabu adi ambuluisha, balayi tshiena-bualu tshia “Protégez votre adolescent des dangers des réseaux sociaux.”

Elelayi muanenu mikalu. Tshilejilu, muelelayi mikenji ya dîba didiye mua kubuela miaba ya dipetelangana ku Enternete ne bungi bua mêba adiye mua kupitshisha miaba ayi.

• Dîyi dia mu Bible: “Ikalayi badimuke bikole bua mushindu unudi nuenda . . . wikale bu wa bena meji, nuenza malu bimpe bitambe ne dîba dienu.”​—Efeso 5:15, 16.

• Tangilayi filme wa bazola bimfuanyi wa Ikala ne meji paudi mu site wa dipetelangana ne bantu ku Enternete bua kuambuluisha muanenu bua kumanya bua tshinyi kumuelela mikalu kudi ne mushinga.