Ntshinyi tshitu tshienzekela muntu padiye ufua?

Diandamuna dia mu Bible

Bible udi wamba ne: “Badi ne muoyo mbamanye ne: nebafue, kadi bafue ki mbamanye bualu nansha bumue.” (Muambi 9:5; Misambu 146:4) Nunku patudi tufua, katuena kabidi ne muoyo to. Bafue kabena mua kuela meji, kuenza anyi kumvua tshintu nansha tshimue to.

“Neupingane ku lupuishi”

Nzambi wakumvuija tshitu tshituenzekela patudi tufua pakakulaye ne Adama muntu wa kumpala. Adama wakabenga kutumikila Nzambi. Nzambi wakamuambila ne: “Wewe udi lupuishi ne neupingane ku lupuishi.” (Genese 3:19) Kumpala kua Nzambi kufuka Adama ne “lupuishi lua buloba,” Adama kavuaku to. (Genese 2:7) Nunku pakafua Adama, wakapingana ku lupuishi ne katshivua kabidi ne muoyo to.

Ke tshitu tshienzekela kabidi muntu padiye ufua. Bible udi wamba bua bantu ne nyama ne: “Bionso mbifumine ku lupuishi, ne bionso bidi bipingana ku lupuishi.”​—Muambi 3:19, 20.

Lufu kaluena anu ndekelu wa malu onso to

Misangu ya bungi Bible utu ufuanyikija lufu ne tulu. (Misambu 13:3; Yone 11:11-14; Bienzedi 7:60) Muntu udi mulale tulu tukole ki mmumanye bidi bipitakana muaba udiye to. Bia muomumue, bafue ki mbamanye bualu nansha bumue to. Kadi Bible udi utulongesha ne: Nzambi udi mua kubisha muntu ku lufu, bienze anu bu ne: udi umubisha ku tulu ne umupeshilula muoyo. (Yobo 14:13-15) Bua bantu bikala Nzambi ne bua kubisha ku lufu, lufu kaluena ndekelu wa malu onso to.