Bua tshinyi kudi bisumbu bia buena Kristo mu mêna a bungi menemene?
Diandamuna dia mu Bible
Bantu mbangate malongesha a Yezu Kristo, benze nawu bisumbu bia “buena Kristo” mu mêna mashilashilangane. Kadi Bible udi uleja ne: kudi anu mushindu umue wa buena Kristo bulelela. Tukonkonone malu asatu tshianana adi atusaka bua kuamba nanku.
Yezu wakamba ne: uvua mulongeshe “bulelela,” ne bena Kristo ba kumpala bavua babikila tshitendelelu tshiabu ne: “bulelela.” (Yone 8:32; 2 Petelo 2:2; 2 Yone 4; 3 Yone 3) Miaku eyi idi ileja ne: bantu badi bamuangalaja malongesha adi kaayi apetangana ne malongesha a Yezu kabena mu ntendelelu wa buena Kristo bulelela to.
Bible udi ulongesha ne: bena Kristo badi ne bua ‘kuakula bobu buonso mu diumvuangana.’ (1 Kolinto 1:10) Kadi mêna a bungi a bitendelelu bidi bidiamba mudibi bia bena Kristo kaena umvuangana ne malongesha adi ne bua kuikala nshindamenu wa tshidi kuikala muena Kristo kumvuija to. Mêna a mushindu au kaena mua kuikala onso majalame to.—1 Petelo 2:21.
Yezu uvua mulaye ne: bantu ba bungi bavua ne bua kudiamba muvuabu bena Kristo kadi bakapanga mua kutumikila mêyi ende, yeye kuamba ne: uvua ne bua kubenga bantu mushindu au. (Matayi 7:21-23; Luka 6:46) Bavua ne bua kupambuisha bamue bantu kudi balombodi ba bitendelelu badi banyanga ntendelelu mulelela bua kukumbaja majinga abu bobu. (Matayi 7:15) Kadi bantu bakuabu bavua anu mua kujinga kulonda bukua buena Kristo, anu bualu nebubambila malu adibu basue kumvua pamutu pa bulelela bua mu Bible.—2 Timote 4:3, 4.
Mu tshilejilu tshivua Yezu mufile tshia blé ne ntete ya lupela, uvua mudianjile kuakula bua buntomboji bunene (butontolodi) buvua ne bua kuluisha buena Kristo bulelela. (Matayi 13:24-30, 36-43) Tshikondo tshile tshivua ne bua kupita, kakuyi mushindu wa kutapulula bena Kristo balelela ne ba dishima. Anu mukavua Yezu muambe, butontolodi buakavula bikole pakafua bapostolo. (Bienzedi 20:29, 30) Nansha mudi malongesha a butontolodi ashilangana, bitendelelu bishilashilangane bidi biamba mudibi bia bena Kristo, buonso buabi ‘mbisesuke ku bulelela.’—2 Timote 2:18.
Yezu uvua mudianjile kuamba kabidi ne: dishilangana pankatshi pa bena Kristo balelela ne ba dishima divua ne bua kulua kumueneka patoke. Dishilangana edi ndimueneke bimpe tshikondo tshietu etshi tshia ku “nshikidilu wa ndonguluelu wa malu.”—Matayi 13:30, 39.