Mutu Bantemu ba Yehowa bamona kushipa kua dibaka
Tudi tutumikila tshidi Bible wamba bua dibaka ne dishipa dia dibaka. Nzambi wakenza dibaka bua dikale muaba udi mulume ne mukaji mua kusomba bua kashidi. Kuenda masandi ke bualu bumuepele budi Bible witabila muntu bua kushipa dibaka.—Matayi 19:5, 6, 9.
Bantemu batu bambuluisha bena dibaka badi ne ntatu anyi?
Eyowa, mu mishindu mishilangane eyi:
Mikanda yetu. Idi ne biena-bualu bidi mua kukolesha mabaka, nansha adi amueneka bu ne: mbikole bua kuakolesha. Tshilejilu, bala biena-bualu ebi: “Bua bena dibaka: Didifila,” “Bua bena dibaka: Difuilangana luse,” ne tangila filme wa “Mua kusomba bimpe mu dibaka: Kueleshangana diboko.”
Bisangilu. Mu bisangilu bietu, mu mpuilu, ne mu mpungilu, tutu tukonkonona mibelu mimpe ya mu Bible idi itangila dibaka.
Bakulu. Batu bambuluisha bena dibaka ne mibelu ya mu Bible, bakoka ntema yabu ku mvese bu mudi Efeso 5:22-25.
Bakulu badi ne bukenji bua kuanyishila Ntemu bua ashipe dibaka anyi?
Tòo. Nansha mulume ne mukajende bobu balombe bakulu mibelu ya mua kupita ne ntatu ya mu dibaka, bakulu kabena ne bukenji bua kubambila tshidibu ne bua kuenza to. (Galatiya 6:5) Kadi muntu yeye musungule bua kushipa dibaka bua bualu budi Bible kayi umuanyishila, Bible kena umuanyishila bua kubuela mu dibaka dikuabu to.—1 Timote 3:1, 5, 12.
Mutu Bantemu bamona diabulukangana
Bible udi ukankamija mulume ne mukajende bua kushala pamue nansha mu nsombelu mikole. (1 Kolinto 7:10-16) Nudi mua kujikija bilumbu bia bungi panudi nusambila ne muoyo mujima, nutumikila mêyi manene a mu Bible, ne nulejangana dinanga.—1 Kolinto 13:4-8; Galatiya 5:22.
Kadi mu nsombelu mikole bu mudi idi ilonda eyi, bena Kristo bakuabu mbangate dipangadika dia kuabulukangana ne muena dibaka nabu:
Dibenga kukumbaja majinga a dîku ku bukole.—1 Timote 5:8.
Tshikisu tshikole.—Misambu 11:5.
Diteka bulunda bua muntu ne Yehowa mu njiwu mikole. Tshilejilu, mulume anyi mukaji udi mua kukeba bua kuenzeja muena diende bua kushipa mikenji ya Nzambi. Dîba adi muena diende au udi mua kumona ne: diabulukangana ke mushindu umuepele wa “kutumikila Nzambi bu mfumu pamutu pa kutumikila bantu.”—Bienzedi 5:29.