NKONKO IDI BANSONGA BADIELA
Bua tshinyi mbimpe kusambila?
Bilondeshile nkonko ivuabu bele bansonga ba mu Amerike, bakasangana ne: bansonga bia pa lukama 80 batu basambila. Kadi anu bansonga 40 ke batu basambila dituku dionso. Kakuyi mpata, bamue ba kudibu bavua mua kuikala badikonka ne: ‘Disambila didi anu tshintu kampanda tshidi tshiambuluisha muntu bua kumvua bimpe anyi? Peshi didi diambuluisha ku bualu bukuabu?’
Disambila ntshinyi?
Disambila nkuyukila ne Mufuki wa bintu bionso. Anji elabi meji a tshidi bualu ebu bumvuija! Yehowa mmupite bantu mu mishindu yonso; nansha nanku, ‘kena kule ne yonso wa kutudi’ to. (Bienzedi 17:27) Mu Bible mudi dibikila dia dikema edi: “Semenayi pabuipi ne Nzambi ne yeye neasemene pabuipi nenu.”—Yakobo 4:8.
Mmunyi muudi mua kusemena pabuipi ne Nzambi?
Mushindu wa kumpala nkusambila; ke mushindu uudi wakula ne Nzambi au.
Mushindu muibidi nkulonga Bible: ke mushindu udi Nzambi pende wakula nebe au.
Muyuki wa wakula ne Nzambi mushindu eu ne yeye pende wakula nebe (mmumue ne: kusambila ne kulonga Bible) neukuambuluishe bua kudia bulunda bukole ne Nzambi.
“Kuakula ne Yehowa (mmumue ne: kuyukila ne Mutambe Bunene) ndiakalenga dinene ditambe didi nadi bantu.”—Jeremy.
“Pandi nsambila Yehowa mmuambila yanyi ya munda ndi ndiumvua pabuipi nende menemene.”—Miranda.
Nzambi utu uteleja masambila anyi?
Nansha wewe witabuja Nzambi, ne nansha wewe umusambila, bidi mua kukukolela bua kuitaba ne: yeye utu uteleja masambila. Bible utu ubikila Yehowa ne: “Muteleji wa disambila.” (Misambu 65:2) Bible udi ukulomba too ne bua ‘kumupuila ntatu yebe yonso.’ Bua tshinyi? ‘Bualu yeye udi unutabalela.’—1 Petelo 5:7.
Nkonko ya kuelela meji: Utuku ukeba dîba dia kuyukila ne balunda bebe ba pa muoyo pa tshibidilu anyi? Udi mua kuenza kabidi nanku ne Nzambi. Ikala wakula nende mu disambila pa tshibidilu, utela dîna diede dia Yehowa. (Misambu 86:5-7; 88:9) Bible muine si udi utulomba wamba ne: “Nusambile misangu yonso.”—1 Tesalonike 5:17.
“Disambila mmuyuki untu ngenza ne Tatu wanyi wa mu diulu, mmuambila yanyi yonso ya munda.”—Moises.
“Ntu ngakula ne Yehowa mmuambila malu mu buondoke, anu muntu mua kuenza ne mama anyi ne mulunda wanyi wa pa muoyo.”—Karen.
Ndi mua kusambila bua malu kayi?
Bible udi wamba ne: “Mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu.”—Filipoyi 4:6.
Bidi biumvuija ne: mbimpe kusambila bua ntatu iudi nayi anyi? Eyowa! Bible muine si udi wamba ne: “Upuila Yehowa bujitu buebe, ne yeye neakuambuluishe.”—Misambu 55:22.
Kadi paudi usambila, kuikadi usambila anu bua ntatu iudi nayi to. Nsongakaji kampanda diende Chantelle udi wamba ne: “Meme nsambila Yehowa anu bua kumulomba diambuluisha, tshiakushemeja nende bulunda to. Ndi mumone ne: ndi ne bua kuikala nganji muela tuasakidila, ne malu andi mmuelela tuasakidila adi ne bua kuikala a bungi.”
Nkonko ya kuelela meji: Mu nsombelu webe, mmalu kayi autu umvua muoyo wa kulejila dianyisha? Udiku mua kuela meji a malu asatu a kuelela Yehowa tuasakidila bua lelu anyi?
“Kubandila nansha bu mudi tshilongo tshimpe kumona, kudi mua kutusaka bua kusambila Yehowa bua kumuela tuasakidila nansha mudi kutshibandila kumueneka bu bualu bukese.”—Anita.
“Elangana meji a mvese kampanda wa mu Bible udi mukulenge menemene anyi a tshintu kampanda tshidi Nzambi mufuke tshidi tshikukemesha, pashishe wele Yehowa tuasakidila bua bualu abu.”—Brian.