Bua tshinyi badi babikila Yezu ne: mMuana wa Nzambi?

Diandamuna dia mu Bible

Batu babikila Yezu mu Bible ne: “Muana wa Nzambi.” (Yone 1:49) Tshiambilu tshia ne: “Muana wa Nzambi,” tshidi tshitujadikila ne: Nzambi mMufuki ne mMpokolo wa bintu bionso bidi ne muoyo, too ne muoyo wa Yezu muine. (Misambu 36:9; Buakabuluibua 4:11) Bible kena ulongesha ne: Nzambi mmulele muana mushindu wa muomumue ne utu bantu balela bana to.

Bible utu kabidi ubikila banjelu ne: “bana ba balume ba Nzambi mulelela.” (Yobo 1:6) Bible udi uleja ne: Adama muntu wa kumpala uvua “muana wa Nzambi.” (Luka 3:38) Nansha nanku, Bible udi ubikila Yezu ne: Muanabute wa Nzambi bualu yeye ke tshifukibua tshia kumpala tshia Nzambi ne muntu uvua Nzambi mudifukile nkayende buludiludi.

• Yezu uvua mu diulu kumpala kua kuledibuaye pa buloba anyi?

• Ntshinyi tshivua Yezu wenza kumpala kua kuluaye pa buloba?

Yezu uvua mu diulu kumpala kua kuledibuaye pa buloba anyi?

Eyowa. Yezu uvua tshifukibua tshia mu nyuma mu diulu kumpala kua kuledibuaye pa buloba bu muntu. Yezu nkayende wakamba ne: ‘Ndi mufumine mu diulu.’​—Yone 6:38; 8:23.

Nzambi uvua mufuke Yezu kumpala kua bintu bikuabu bionso. Bible udi wamba bua Yezu ne:

• “Yeye udi . . . muanabute wa bifukibua bionso.”​—Kolosayi 1:15.

• Yeye udi “tshibangidilu tshia bufuki bua Nzambi.”​—Buakabuluibua 3:14.

Yezu wakakumbaja mêyi a buprofete adi akula bua muntu “udi ne mbangilu wende katshia ku bikondo bia kale, katshia ku matuku a kale kale.”​—Mika 5:2; Matayi 2:4-6.

Ntshinyi tshivua Yezu wenza kumpala kua kuluaye pa buloba?

Uvua ne muanzu munene mu diulu. Yezu wakatela bualu bua muanzu eu pakasambilaye ne: “Tatu, untumbishe . . . ne butumbi bumvua nabu ku luseke luebe kumpala kua buloba kuikalaku.”​—Yone 17:5.

Wakambuluisha tatuende bua kufuka bintu bikuabu bionso. Yezu uvua wenza mudimu ku luseke lua Nzambi “bu muena mudimu mupiluke.” (Nsumuinu 8:30) Bible udi wamba bua Yezu ne: “Ku diambuluisha diende bintu bikuabu bionso biakafukibua mu diulu ne pa buloba.”​—Kolosayi 1:16.

Yezu wakambuluisha Nzambi bua kufuka bintu bikuabu bionso. Mu bifukibua abi mudi bifukibua bionso bia mu nyuma ne bintu bikuabu bitudi tumona ne mêsu. (Buakabuluibua 5:11) Mu bulelela, dipetangana didi pankatshi pa Nzambi ne Yezu padibu benza mudimu, didi anu bu dia muenji wa tshifundu (plan) tshia nzubu ne muibaki. Padi muenji wa tshifundu tshia nzubu uzola muikala nzubu, muibaki udi wibaka nzubu au anu muvuabu bamuzole.

Wakenza mudimu bu Dîyi. Bible udi ubikila Yezu ne: “Dîyi,” padiye wakula bua tshivuaye mu diulu kumpala kua kulua pa buloba. (Yone 1:1) Kakuyi mpata, bualu ebu budi bumvuija ne: Nzambi uvua utuma muanende bua kuambila bifukibua bikuabu bia mu nyuma malu ne mêyi a kulonda.

Yezu uvua mua kuikala kabidi muleji mpala wa Nzambi kudi bantu pa buloba. Nzambi uvua pamuapa wambila Adama ne Eve mêyi a kulonda pavuabu mu budimi bua Edene ku diambuluisha dia Yezu. (Genese 2:16, 17) Yezu ke uvua pamuapa muanjelu uvua ulombola tshisamba tshia Isalele wa kale mu tshipela, ne dîyi diende ke divua bena Isalele ne bua kutumikila.​—Ekesode 23:20-33.a