Lomo 6:23​—“Difutu dia mpekatu ndufu, kadi dipa didi Nzambi ufila mmuoyo wa tshiendelele”

“Difutu dia mpekatu ndufu, kadi dipa didi Nzambi ufila mmuoyo wa tshiendelele ku butuangaji bua Kristo Yezu Mukalenge wetu.”​—Lomo 6:23, Nkudimuinu wa bulongolodi bupiabupia.

“Difutu dia bubi ndufu, kadi diha dia luse dia Nzambi mmuoyo wa tshiendelele mu Kilisto Yesu Mukelenge wetu.”​—Lomo 6:23, Mukanda wa Nzambi.

Diumvuija dia Lomo 6:23

Bilondeshile mêyi aa, mupostolo Paulo wakumvuija ne: bantu badi bafua bualu mbena mpekatu. Kadi Nzambi udi upesha batendeledi bende ba lulamatu ditekemena dimpe, tuambe ne: dipa dia muoyo wa tshiendelele.

“Difutu dia mpekatu ndufu.” Bantu bonso mbaledibue bapange bupuangane, ke bualu kayi badi benza mpekatu.a (Misambu 51:5; Muambi 7:20) Bu mudi bantu baledibue mu bubi, buonso buabu badi bakulakaja ne bafua.​—Lomo 5:12.

Bua kumvua bualu ebu bimpe, Paulo wakafuanyikija mpekatu ne mfumu wa mudimu udi ufuta muena mudimu makuta. Anu mutu muenji wa mudimu windila difutu bua mudimu wende, ke mudibi kabidi bantu badi ne bua kutekemena ne: nebafue bua dipanga diabu dia bupuangane.

Nansha nanku, Paulo wakumvuija kabidi ne: “Muntu udi mufue mmubingishibue ku mpekatu wende.” (Lomo 6:7) Padi muntu ufua, udi upikudibua, anyi ulekeledibua ku mpekatu yende yonso. Nunku kakuena mushindu wa kuela meji ne: bafue badi batungunuka ne kukenga muaba kampanda bua mibi yabu ya kale to. Bushuwa, Bible udi uleja patoke ne: bafue kabena mua kuela meji, kuenza bualu, anyi kumvua tshintu nansha tshimue to.​—Muambi 9:5.

“Kadi dipa didi Nzambi ufila mmuoyo wa tshiendelele ku butuangaji bua Kristo Yezu.” Bishilangane ne “difutu” didi bubi bufila, Nzambi yeye udi ufila dipa dia muoyo wa tshiendelele. Mu muakulu wa ntuadijilu, muaku “dipa” udi kabidi mua kumvuija “dipa difila tshianana” peshi “dipa dia ngasa.” Udi uleja tshintu tshidi muntu upeta kayi mutshikumbanyine to. Kakuena muenji wa mpekatu udi mua kupeta lupandu ne muoyo wa tshiendelele ku bukole buende nkayende to. (Misambu 49:7, 8) Kadi Nzambi udi ufila dipa dia mushinga mukole dia muoyo wa tshiendelele tshianana kudi bonso badi baleja ditabuja kudi Yezu.​—Yone 3:16; Lomo 5:15, 18.

Malu adi Lomo 6:23 wakuila

Paulo wakafundila bena Kristo ba ku Lomo mukanda eu bu mu 56 P.Y. Bidi bimueneka ne: tshikondo atshi, bamue bena Kristo bavua ne ngenyi mibi pa bidi bitangila luse lua Nzambi. Bu muvua nkindi ya bena Greke mitangalake, imue misangu bakuabu bavua badiambila ne: bobu batungunuke ne kuenza mpekatu, Nzambi uvua ne bua kuvudija luse luende. (Lomo 6:1) Bakuabu bavua pamuapa bamba ne: kabakubanyoka bua mpekatu yabu bualu kabatshivua kabidi ku mikenji ya Mose to. (Lomo 6:15) Paulo wakaleja mu mukanda wende ne: Nzambi kena mua kufuila bena Kristo luse bobu balekele mpekatu ubakokesha to.​—Lomo 6:12-14, 16.

Mêyi a Paulo adi ajadikila batendeledi ba Nzambi ba lelu ne: nansha mudibu baledibue bena mibi, badi anu ne ditekemena. Nunku Nzambi mmulaye bua kubapesha muoyo wa tshiendelele, bobu batumikila mikenji yende ne kabayi balekela majinga abu mabi abalombola to.​—Lomo 6:22.

Tangila filme muîpi eu bua kumona kadiosha ka mukanda wa Lomo.