Dipatula filme ya mu Mpungilu wa rejon wa 2020 wa ‘Ikalayi nusanka misangu yonso!’

Filme ya mu Mpungilu wa rejon mmilenge mioyo yetu ne mmikoleshe ngumvuilu wetu wa tshidi Bible ulongesha. Mu Mpungilu wa rejon wa 2020 wa ‘Ikalayi nusanka misangu yonso!’ eu mudi filme 114 ne miyuki 43 mienza kudi bena mu Kasumbu kaludiki ne bana betu badi babambuluisha. Udiku mudiebeje bungi bua mudimu udibu benze bua kupatula filme eyi ne bungi bua makuta adibu batule anyi?

Bana betu batue ku 900 ba pa buloba bujima bavua badifile ne dîba diabu ne mamanya abu bua kupatula filme ya mu mpungilu eu. Mu tshikoso, mudimu udibu benze eu mmudimu uvua mua kuangata mêba matue ku 100 000 mu bule bua bidimu bibidi ne bia mu njila. Mu mêba onso au mudi kabidi mêba 70 000 avuabu benze bua kujikija drama wa minite 76 wa malu a mu Bible wa Nehemiya: “Disanka dia Yehowa mbukole buenu.”

Nuenu bele meji, nenumone ne: bivua bilomba makuta a bungi bua kukumbaja majinga a bana betu bavua badifile ku budisuile mu mudimu au, kubakebela nzubu, biamu bia mudimu ne bintu bikuabu bua kujikijabu mudimu au bimpe.

Muanetu Jared Gossman wa mu Tshibambalu tshia mêyi ne bindidimbi udi wamba ne: “Bana betu ba mu Komite wa dilongesha wa Kasumbu kaludiki batu bajinga bua filme yetu ikale ilenga malu a bantu ba miaba ne bilele bishilashilangane. Kuenza nanku kudi kuambuluisha bua filme yetu ileje mutudi dîku dimue dia bana ba muntu pa buloba bujima. Bua kukumbaja tshipatshila etshi, tusumbu 24 mu matunga 11 tuvua tueleshangane diboko bua kukumbaja mudimu eu. Mudimu eu mmulombe makuta mapite bungi, ne didianjila kulongolola malu ne dimanya mua kualombola.”

Bua kuenza filme yetu ya bungi bitu bitulomba biamu bia pa buabi ne bintu bia kulongolola nabi muaba wa kuenzela filme ayi. Tshilejilu, tuvua base bintu bia kuenzela filme wa Nehemiya: “Disanka dia Yehowa mbukole buenu” mu nzubu wetu wa Mount Ebo wa dikuatshila bindidimbi udi pabuipi ne ku Patterson (mu New York) mu États-Unis. Bua kutula makuta adi bana betu bafile bua kukuatshisha mudimu bimpe, ne bua filme eu kulejaye malu anu muvuawu menzeke kale menemene, bana betu bakangata tubintu tupepele bua kuibaka bimanu bivua bifuanangane ne bimanu bilelela bia Yelushalema wa kale. Bintu bionso bivuabu benze nabi bimanu bivua bienza ne mabaya malamika bivuare pambidi ne bilaba mukubu bua bimueneke bu mabue. Bua kukepesha bungi bua bintu bivua bikengela bua kuenza filme eu, bavua bumbusha “bimanu” abi babiteka muaba mukuabu bua bikumbanangane ne miaba ivuabu bajinga kuleja. Nansha nanku, bivua bitulombe ndola mitue ku 100 000 bua kuakaja bintu bionso bua kukuata drama nkayende.a

Kumanya malu onso a mudibu benze filme ya mu Mpungilu wa rejon wa tshidimu etshi bidi bivudija dianyisha dietu. Tudi bashindike ne: mushindu udi bana betu badienzeje bua kukuata filme eyi, newambuluishe bana betu pa buloba bujima bua kutumbisha Yehowa. Tudi tunuela tuasakidila bua mapa anudi nufidila ku donate.jw.org anyi mu mishindu mikuabu bua mudimu wa pa buloba bujima.