Yelemiya
6 Eyemayi kule ne Yelushalema, nuenu bana ba Benyamina.
Bualu dikenga didi difumina ku nord, kabutu kanene.+
2 Muana wa bakaji wa Siona mmufuanangane ne mukaji muimpe kumona ne muengeleka.+
3 Balami ba mikoko ne bisumbu biabu bia mikoko nebalue.
4 “Longololayi* mvita bua kumuluisha!
Jukayi, tumuelayi mvita munda munya!”
“Diakabi dietu, bualu dituku dikadi ditua ku tshibungubungu,
Bualu mindidimbi ya dilolo idi ilepa!”
5 “Jukayi, tuelayi mvita butuku
Ne tubutulayi bibumba biende bikolesha.”+
6 Bualu mona tshidi Yehowa wa biluilu wamba:
“Kosayi mitshi, imanyikayi tshibumba tshikole tshia kutshintshimika natshi Yelushalema.+
Yeye udi tshimenga tshidi ne bua kulumbuluishibua;
Munda muende kamuena bualu bukuabu anu dikengeshangana.+
7 Bu tshina tshidi tshilama mâyi atshi matalale,
Ke mudiye ulama malu mabi ende matalale.
Tshikisu ne kabutu bidi biumvuika munda muende;+
Masama ne bipupu bidi kumpala kuende misangu yonso.
8 Itaba didimuija, wewe Yelushalema, tshianana meme* nengumbuke kuudi ne muengu;+
Nenkuvuije muaba mutupu, buloba budi kabuyi ne bantu basombelamu.”+
9 Mona tshidi Yehowa wa biluilu wamba:
“Nebapumbulule bashadile ba Isalele bonso bu tumuma tua ndekelu ku muonji wa tumuma tua mvinyo.
Pitshisha tshianza tshiebe kabidi bu muntu udi upuola tumuma tua ku mionji ya tumuma tua mvinyo.”
10 “Nnganyi ungakula nende ne ungadimuija?
Nnganyi wateleja?
Monayi! Matshi abu mmakanga,* nunku kabena mua kuteya ntema+ to.
Monayi! Dîyi dia Yehowa ndilue tshintu tshidibu bapetula;+
Kabena bapetela disanka mu diodi.
11 Nunku ndi muwule tente ne tshiji tshikole tshia Yehowa,
Ne ndi mutshioke ne ditshilama.”+
“Tshitshikijila muana udi mu njila,+
Tshitshikijila bisumbu bia bansongalume badi badisangishe pamue.
12 Nzubu yabu nebayipeshe bantu bakuabu,
Pamue ne madimi abu ne bakaji babu.+
Bualu nengolole tshianza tshianyi bua kuluisha bantu badi basombele mu buloba,” ke mudi Yehowa wamba.
13 “Bualu kubangila ku udi mutambe bukese too ne ku udi mutambe bunene, muntu yonso udi upetela bintu ku mashimi;+
Kubangila ku muprofete too ne ku muakuidi, muntu yonso udi wibila.+
14 Badi bateta kuondopa ditshibuka dia bantu banyi pa mutu pa mutu, bamba ne:
‘Ditalala didiku! Ditalala didiku!’
Padiku kakuyi ditalala.+
15 Badiku bumvua bundu bua malu mabi adibu benze anyi?
Kabena bumvua bundu nansha bukese!
Kabena nansha bamanye mua kudiumvua bapuekeshibue milongo to!+
Nunku nebakuluke munkatshi mua badi bakuluke.
Pandi mbatumina dinyoka nebalenduke,” ke mudi Yehowa wamba.
16 Mona tshidi Yehowa wamba:
“Imanayi mu masangu a njila, numone.
Kadi badi bamba ne: “Katuakuendelamu to.”+
Kadi bobu bakamba ne: “Katuakuteya ntema to.”+
18 “Nunku telejayi, nuenu bisamba!
Ne manyayi, nuenu tshisumbu tshia bantu,
Bualu buabafikila.
19 Teleja, wewe buloba!
Ndi ntumina bantu aba dikenga+
Bu mamuma a meji abu adibu baluke,
Bualu kabavua bateye ntema ku mêyi anyi
Ne bavua babenge mukenji wanyi.”*
20 “Bidiku bingambila bualu panudi nulua ne budimbu bua mupuya muimpe bua ku Sheba
Ne disele dia mupuya muimpe* dia mu buloba bua kule anyi?
Milambu yenu ya kuosha mijima ki mmianyishibue,
Ne milambu yenu kayena insankisha.”+
21 Nunku mona tshidi Yehowa wamba:
“Mona ndi ntekela bantu aba bilenduishi,
Ne nebalendukaku,
Batatu pamue ne bana babu,
Muena mutumba ne muinende,
Ne buonso buabu nebabutuke.”+
22 Mona tshidi Yehowa wamba:
“Monayi! Tshisamba tshidi tshifumina ku buloba bua ku nord,
Ne tshisamba tshinene netshibishibue ku bitupa bia buloba bia kule menemene.+
23 Nebakuate buta bua mikete ne difuma dikese.
Badi ne tshikisu ne kabakuikala ne luse.
Dîyi diabu nedikungule bu mbuu,
Ne badi bendela pa tubalu.+
Badi badilonga mu mulongo wa mvita bu muluanganyi wa mvita udi ukuluisha wewe, muana wa bakaji wa Siona.”
24 Tudi bumvue lumu lua bualu ebu.
25 Kanupatuki bua kuya mu budimi,
Ne kanuendedi mu njila,
Bualu muena lukuna udi ne muele wa mvita;
Buôwa budiku nseke yonso.
26 Wewe muana wa bakaji wa bantu banyi,
Vuala tshilamba tshikayabale+ ne bunguluka mu butu.
Dila bu udi udila muana mulela umue ne kabobo ka muadi wa kanyinganyinga,+
Bualu mubutudi neatutulukile mu mupodi wa dîsu.+
27 “Ndi mukuvuije wewe* mutetshi wa biamu munkatshi mua bantu banyi,
Muntu udi ukebulula bikole;
Wewe udi ne bua kuteya ntema ne kukonkonona njila wabu.
Badi bu tshiamu tshia mitaku ne tshiamu tshifiike;
Buonso buabu mbanyanguke.
29 Mibanza mmipie.
Tshiamu tshia plomb tshidi tshipatukila mu kapia kayi.
30 Tshiamu tshia arjan tshidibu babenge ke muababikilabu kudi bantu bushuwa,
Bualu Yehowa mmubabenge.”+