Yehezekele

25 Dîyi dia Yehowa diakalua kabidi kundi, diamba ne: 2 “Muana wa muntu, tangija mpala webe kudi bena Amona+ ne amba mêyi a buprofete a bualu buabafikila.+ 3 Udi ne bua kuamba bua bualu bua bena Amona ne: ‘Umvuayi dîyi dia Mukalenge Mutambe Bunene Yehowa. Monayi tshidi Mukalenge Mutambe Bunene Yehowa wamba: “Bu munuvua bambe ne: ‘Woloo!’ bua muaba wanyi munsantu pavuabu bawunyange, ne bua buloba bua Isalele pavuabu babushiye munda mutupu, ne bua ba mu nzubu wa Yuda pavuabu babakuate baye nabu ku babende, 4 nunku ndi nkufila kudi bantu ba ku Est bua wikale tshintu tshiabu. Bobu nebase bitudilu biabu* munda muebe ne nebase ntenta yabu munkatshi muebe. Nebadie mamuma ebe, ne nebanue mabele ebe. 5 Nemvuije Laba+ mpata wa kudiila wa tumelu, ne buloba bua bena Amona muaba wa kuikishila wa mikoko; nunku nenufike ku dimanya ne: meme ndi Yehowa.”’”

6 “Bualu mona tshidi Mukalenge Mutambe Bunene Yehowa wamba: ‘Bu muuvua mutute bianza biebe+ ne mukume makasa ebe panshi, ne wewe* kusanka bua buloba bua Isalele ne kapeja kakole nunku,+ 7 nanku nenkoluele tshianza tshianyi bua kukufila kudi bisamba bu tshintu tshia kupawula. Nenkumbushe munkatshi mua bukua bantu ne nenkubutule munkatshi mua matunga.+ Nenkubutule, nunku wewe neufike ku dimanya ne: meme ndi Yehowa.’

8 “Mona tshidi Mukalenge Mutambe Bunene Yehowa wamba: ‘Bu mudi Moaba+ ne Seî+ bambe ne: “Monayi! Nzubu wa Yuda udi bu bisamba bikuabu bionso ebi,” 9 ndi nshiya luseke lua* Moaba lua bimenga bidi ku mukalu wende, bulengele bua* buloba buende, Bete-yishimota, Bâla-meona, too ne ku Kiyatayima,+ patoke. 10 Nendufile pamue ne bena Amona kudi bantu ba ku Est+ bu tshintu tshiabu, bua kabavuluki kabidi bena Amona munkatshi mua bisamba.+ 11 Nenkumbaje dilumbuluisha mu Moaba,+ nunku nebafike ku dimanya ne: meme ndi Yehowa.’

12 “Mona tshidi Mukalenge Mutambe Bunene Yehowa wamba: ‘Edome mmuenzele nzubu wa Yuda malu bua kudisombuela ne mmupie tshibawu tshinene padiye mudisombuele kudibu;+ 13 nunku mona tshidi Mukalenge Mutambe Bunene Yehowa wamba: “Nengoluele kabidi Edome tshianza tshianyi bua kumuluisha, nengumbushe kudiye muntu ne tshimuna, ne nemmushiye munda mutupu.+ Nebakuluke ku muele wa mvita kumbukila ku Temana too ne ku Dedana.+ 14 ‘Nendisombuele kudi Edome ku tshianza tshia bantu banyi bena Isalele.+ Bobu nebafikishe tshiji tshianyi ne tshiji tshianyi tshikole mu Edome, bua bafike ku diumvua disombuela dianyi,’+ ke mudi Mukalenge Mutambe Bunene Yehowa wamba.”’

15 “Mona tshidi Mukalenge Mutambe Bunene Yehowa wamba: ‘Bua buluishi buabu budi kabuyi bujika, bena Peleshete mbakebe bua kudisombuela ne kubutula ne meji mabi.*+ 16 Nunku mona tshidi Mukalenge Mutambe Bunene Yehowa wamba: “Mona, ndi ngoluela bena Peleshete+ tshianza tshianyi bua kubaluisha, ne nengumbushe bena Kelete+ ne nembutule bashadile badi basombele ku muelelu kua mbuu.+ 17 Nengenze bienzedi binene bia disombuela kudibu ne manyoka a tshiji tshikole, nunku nebafike ku dimanya ne: meme ndi Yehowa pangadisombuela kudibu.”’”