3. Bua tshinyi bantu bimpe batu bakenga?
Bua tshinyi lukonko elu ludi ne mushinga?
Bitu bimueneka bibi patu bantu bimpe bakenga. Bamue badi bamona ne: kabiena bikengela kudienzeja bua kuikala muntu muimpe to, bualu neukenge anu kukenga.
Anji elabi meji
Bamue bantu batu bitaba ne: bantu batu bafua, baledibua tshiakabidi. Batu bamba ne: aba bavua benze malu mimpe badi baledibua tshiakabidi mu nsombelu muimpe, padi eku bavua benze malu mabi baledibua tshiakabidi muaba udibu bakenga bua kashidi. Bilondeshile malu aa, nansha muntu muimpe udi mua kukenga bikalaye uvua muenze malu mabi “ku kale.” Kadi . . .
Makenga a nunku adi ambuluisha ku tshinyi, bikala muntu udibu bamba mudiye muledibue tshiakabidi kayi nansha mua kuvuluka malu avuaye muenze ku kale?
Bikalabi ne: netusame, netupete njiwu bua malu atuvua benze ku kale, bua tshinyi lelu tudi tudienzeja bikole bua kuikala ne makanda a mubidi mimpe ne kuepuka njiwu?
BUA KUMANYA MALU MAKUABU
Tangila filme wa Nzambi mmulekele makenga bua tshinyi? udi mu site wa jw.org.
Tshidi Bible wamba
Makenga ki ndinyoka dia kudi Nzambi to.
Kadi a bungi a kudiwu atu misangu mivule akuata muntu ku mpukampuka padiye muaba mubi ne pa dîba dibi.
“Bena lubilu lukole kabatu misangu yonso bapatuka ba kumpala, anyi bena bukole batshimuna mvita to, anyi bena meji kabatu ne biakudia misangu yonso to, anyi bena lungenyi kabatu ne biuma misangu yonso to, peshi badi ne dimanya kabatu misangu yonso bapeta diakalenga to, bualu tshikondo ne malu adi kaayi matekemena bidi bibafikila buonso buabu.”—MUAMBI 9:11.
Dipanga bupuangane dietu ditu padi dienza bua tuikale tukenga.
Misangu ya bungi, bantu batu batela muaku “mpekatu” bua kuakula bua bualu kampanda bubi budi muntu wenza. Kadi Bible pende utu utela muaku au bua kuleja nsombelu udi nende bantu bonso, bimpe ne babi.
“Mvua muledibue ne tshibawu tshia tshilema, muena mpekatu katshia ku tshikondo tshivua mamu wanyi mungimite.”—MISAMBU 51:5, Dimanyisha.
Mpekatu mmunyange nsombelu wa bantu bikole.
Mmunyange malanda etu ne mufuki wetu, mmuenze kabidi bua katuikadi mu ditalala ne bifukibua bikuabu bia Nzambi to. Mmufikishe ku makenga a bungi adi akuata muntu pa nkayende ne bantu bonso mu kabujima.
“Pandi njinga kuenza bualu buimpe, bualu bubi budi nanyi.”—LOMO 7:21.
“Bifukibua bionso bidi bitungunuka ne kutua mikemu popamue ne kukenga popamue too ne mpindieu.”—LOMO 8:22.