BANTU bavule batu bakuata mudimu wa kufunda bintu bia bungi patubu babapesha muyuki wa kuenza, kutuadijila ku mêyi a mbangilu too ne ku a ndekelu. Nenku batu dijinga ne mabeji a bungi. Bitu kabidi bibangata mêba a bungi.

Ke muutu pebe wenza anyi? Tukuleje mushindu mupepele anyi? Wewe mulonge mua kuenza plan wa muyuki, kuakujinga bua kufunda kabidi ka-tshintu konso to. Neupete dîba dia bungi dia kuambulula muyuki webe. Newenze miyuki yebe kakuyi lutatu; bantu nebakuteleje bimpe ne nebibasake bua kutumikila biudi ubalongesha.

Tshidibi, miyuki ya patoke batu bayifila yoyi ne plan mumana kulongolola. Kadi bua ya bungi yashadi eyi, kakutu plan mulongolola to. Nanku badi mua kukupesha anu mutu wa bualu patupu. Peshi badi mua kukulomba bua kubala mu mukanda kampanda ne kuenza muyuki bilondeshile ngenyi idi mu tshitupa atshi. Imue misangu mene badi mua kukupesha amu mamanyisha makese tshianana. Miyuki yonso ya nunku, idi ikengela kudienzela plan.

Plan udi mu dibeji dia 41, ntshilejilu patupu tshiudi mua kulonda. Malu manene adi abangila ku dia bakaji menemene mu maleta a ku tshiamu. Muinshi mua bualu bunene buonso mudi malu a kuenza nawu mudimu bua kubushindika. Makuabu malu a kuenza nawu mudimu adi muinshi mua aa, kadi masemeja kakese ku dia balume. Tangila plan eu bimpe. Udi mumone mudi malu manene abidi aa mikale umvuangana ne mutu wa bualu anyi? Malu makuabu adi alonda kaena anu malenga patupu, kadi adi ashindika kabidi malu manene adi ku mutu kuawu.

Tshia kumanya ntshia se: plan webe kakuikala anu bu wa tshilejilu eu menemene to. Kadi wewe mulonde mibelu itudi bafile, kuakupitshisha dîba divule musombe anu bua kulongolola muyuki webe to. Tangila tshia kuenza:

Konkonona, usungule, ne ulongolole

Bidi bikengela kuikala ne mutu wa bualu. Mutu wa bualu kawena anu tshiena-bualu tshidi katshiyi tshisunguluke, tshidi muntu mua kuamba pamu’apa anu mu muaku umue patupu to. Ndungenyi lunene luudi musue kufila; udi uleja luseke luudi musue kushindamena mu muyuki webe. Bikalabu bakupe mutu wa bualu, ukonkonone bimpe miaku minene idimu yonso. Bikalawu muangatshila mu mukanda kampanda, ubale mukanda au eku muikale ne mutu webe wa bualu mu lungenyi. Pikalabu bakupe anu tshiena-bualu, udikebele mutu wa bualu. Kadi mbimpe kuanji kuenza makebulula. Wewe ne meji a kumanya, neupete ngenyi mikuabu milenga.

Paudi wenda wenza malu onso aa, wikale udiebeja ne: ‘Bua tshinyi bantu bikala mua kunteleja badi ne tshia kumanya bualu ebu? Tshindi nkeba ntshinyi?’ Kukeba bua kuamba malu malenga nkuimpe, kadi bidi bikengela nangananga kuenza tshintu tshiambuluisha badi bakuteleja. Padi malu ebe akumbana, uafunde. Paudi udilongolola, kupu muoyo tshiudi wipatshila etshi to.

Bua kuenza makebulula mimpe, anji manya tshiudi wipatshila ne keba mutu wa bualu udi umvuangana natshi (anyi tangila mudi mutu wa bualu udibu bakupeshe umvuangana ne tshipatshila tshiebe). Keba malu adi mua kuambuluisha bantu bikole. Pamutu pa kuimanyina pa malu a pa mutu pa mutu, keba malu adi mua kulongesha ne kuambuluisha bantu. Kadi wamanya kulu kuenza makebulula kupitshisha! Pa tshibidilu, neupete malu mapite pa audi nawu dijinga; usungule amue.

Keba malu manene akuambuluisha bua kuenza muyuki ne kukumbaja tshipatshila tshiebe. Wowu aa ke awashindamena mu muyuki webe ne neikale bu malu manene adi enza plan webe. Kadi malu manene aa adi ne bua kuikala bungi kayi? Bua muyuki wa tshitupa, abidi mmakumbane; bua muyuki wa dîba dijima atanu mene mmakumbane. Padi malu manene mikale makese, bantu badi baakuata.

Wewe mumane kupeta mutu wa bualu ne malu manene, longolola mpindieu malu audi mupete mu makebulula ebe. Keba adi umvuangana buludiludi ne malu manene. Sungula tu-malu tudi tuvuija malu aa bu mapiamapia. Paudi usungula mvese bua kumvuija ne kujadika malu manene, ukebe ngenyi idimu idi mua kueleshisha bantu meji. Uteke tshintu tshionso muinshi mua bualu bunene buatshi. Padi bualu kampanda kabuyi buakanyine malu manene onso, ubumbushe (nansha buobu buikale buimpe) anyi ubufunde kaba kampanda bua kulua kuenza nabu mudimu mukuabu musangu. Lama anu malu adi amueneka mimpe menemene. Wewe ne malu a bungi a kuamba, newakule lubilu lubilu anyi pamutu pamutu ne kuakubuela mu buondoke bua malu to. Mbimpe kuikala ne malu makese ambuluisha bantu ne kuamba malu aa bilenga. Kupitshishi dîba to.

Mpindieu biwikala kuvua muanji kuateka malondangane bimpe, uateke malondangane. Ke muakenza Luka umue wa ku bakafunda Evanjeliyo. Kunyima kua yeye mumane kupeta malu mavule avua umvuangana ne tshiena-bualu tshiende, wakaafunda ‘muvuawu malondangane.’ (Luka 1:3, MMM) Teka malu aa bilondeshile bidimu ne matuku a ngondo anyi mudiwu alondangana, peshi kuteka bualu ne tshipeta tshiabu, anyi tshilumbu ne mua kutshijikija. Wenza nanku, utangila mushindu udi mutambe buimpe udi mua kukuambuluisha bua kukumbaja tshipatshila tshiebe. Kumbuka mu tshiputuku ku lungenyi lumue kuya ku lukuabu nkubi. Ndaku bitekete bua bantu bakulonde bimpe, ela tshilamba pankatshi pa ngenyi ibidi bua kuyilamakaja. Malu audi wamba adi ne bua kusaka bantu ku diangata mapangadika a meji. Paudi ulongolola malu, wela meji muikalawu mua kumvuika ku matshi a bantu. Nebumvue mudi ngenyi ilondangana anyi? Nebibasake bua kuenza tshiudi musue ne benze anyi?

Pashishe keba mbuelelu udi ujula bantu mioyo kuulu ne ubapesha dijinga dia kukutelejabu ne ntema yonso, ne udi ubaleja ne: biudi musue kubambila nebibambuluishe. Mbimpe kufunda mêyi ebe makese a mbangilu aa. Bua kujikija, ukebe nkomenu udi usaka bantu ku dienza malu audi musue ne: benze.

Wewe muenze plan webe kumpala kua dîba, neupete mushindu wa kumuakaja bimpe. Neushindike imue ngenyi ne bungi bua bintu anyi bantu, ne mufuanu, peshi ne muanda kampanda uvua muenzeke. Malu adi enzeka peshi atu bantu ba muaba unudi au bamanye adi mua kuambuluisha badi bakuteleja bua kumona mua kutumikila biudi ubambila. Paudi utangilulula muyuki webe, udi mua kupeta malu adi mua kuambuluisha bantu bimpe. Bua kupeta malu mimpe a kuela mu muyuki, bidi bikengela kuukonkonona ne kuwakaja.

Bua bamue bantu, kufunda malu mavule nkuimpe; bua bakuabu, makese tshianana mmabakumbane. Kadi wewe wenza plan ne malu manene makese tshianana, umbusha onso adi kaayi akuatshisha malu manene ebe aa, ne uteka ngenyi milondangane bimpe, nanku neumone se: kunyima kua matuku makese, kuakuikala kabidi ufunda malu a bungi to. Kuakujimija dîba dia bungi nansha! Miyuki yebe neyikale mimpe. Nebikale tshijadiki tshia se: Kalasa ka Mudimu wa Nzambi kadi kakuambuluisha.

MUDIMU wonso udibu batupesha mu kalasa aka udi utuambuluisha bua kukola ne kuya kumpala mu nyuma. Wewe udifila ne muoyo mujima, neudimone nkayebe kabidi ne bantu bakuabu nebamone ne: udi wenda ukola mu malu a mu nyuma. (1 Tim. 4:15) Kalasa nekakuambuluishe bua kukolesha lungenyi biakane menemene.

Udi umvua buôwa mua kupita kumpala bua kuakula anyi? Ke mudi kabidi bakuabu badiumvua nansha kunyima kua bamane kuenza ndambu wa matuku mu kalasa aka. Kadi kudi malu adi mua kukuambuluisha bua kupeta dikima dia kuakula kumpala kua bantu. Tshilejilu, paudi ku nzubu, ikala ubala ne dîyi dikole. Ikala wandamuna mu bisangilu padibu bela nkonko. Biwikala muambi wa lumu luimpe, ikala uyisha bikole. Tshikuabu tshintu: Longolola midimu yebe kumpala kua dîba; uyambulule ne dîyi dikole. Kupu muoyo ne: newakule kumpala kua bantu badi bakunange. Sambila musangu wonso kumpala kua kupita kumpala. Yehowa utu usanka bua kufila nyuma wende kudi basadidi bende badi bamulombaye.​—Luka 11:13; Filip. 4:6, 7.

Kadi kukebi tshishima nansha. Bua kulua ngamba-malu ne mulongeshi muimpe, bitu bilomba matuku a bungi. (Mika 6:8) Biwikala mulongi mupiamupia, kua kuenza diakamue muyuki mubotakane to. Ikala udibidija ne bualu bumue ku bumue bua ku mibelu ya bungamba-malu idi mu mukanda eu. Wewe mudibidije ne bilejilu bidibu bafilemu, mbimpe; bualu nebikuambuluishe bua kumanya malu adi atangila ngikadilu udibu bakulombe kumpala kua wewe kupita ku tshiakuidi. Ku kakese ku kakese, neumanye mua kuenza miyuki bimpe.

Mua kulongolola dibala

Kubala kumpala kua bantu kudi kulomba makuabu malu pa kumusha kumanya kubala anu miaku ne kabidi bidi bikengela nangananga kumvua tshiena-bualu bimpe. Padibu bakupesha mudimu eu, bala diakamue malu onso ne keba bua kuumvua. Keba bua kumvua tshiambilu tshionso ne tshikoso tshionso bua upete lungenyi luatshi bimpe. Paudi kuyi mumanye mua kubala muaku, udi mua kuebeja muntu udi mumanye muakulu bimpe (anyi kuutangila mu nkonga-miaku). Umanye malu audi ubala bilenga. Bana badi mua kubambuluisha kudi baledi babu.

Mbakulombe bua kubala Bible peshi Tshibumba tshia Nsentedi anyi? Pikalaku bande ya bisanji idi ne biudi ubala abi mu muakulu wenu, udi mua kuyiteleja ne kumvua mudibu bashindumuna miaku, bashindika malu, ne babandisha ne bapuekesha dîyi. Mpindieu utete kubala pebe mushindu au.

Paudi utuadija kulongolola mudimu, wikale muanji kubala bimpe dilongesha didi ne ngikadilu wa bungamba-malu udibu bakulombe. Udi mene mua kubala kabidi dilongesha edi kunyima kua wewe mumane kubala kubalulula mudimu udibu bakupeshe ne dîyi dikole. Uditatshishe muebe muonso bua kukumbaja ngikadilu eu.

Nebikuambuluishe mu buambi. Misangu mivule mu mudimu wetu wa budimi, bitu bikengela ne: tubale. Mbimpe kubala bilenga, bualu Dîyi dia Nzambi didi ne bukole bua kushintulula bikadilu bia bantu. (Eb. 4:12) Kuakumanya mua kubala bimpe menemene anu panyima pa dienza patupu mudimu wa kumpala anyi muibidi mu kalasa to. Tangila mene tshiakafundila mupostolo Paulo mukulu ukavua muenze bidimu bivule mu Buena-Kristo: ‘Unanukile kubala kumpala kua bantu bonso.’​—1 Tim. 4:13, MMV.

Tshiena-bualu ne kadre

Tshia kuenza ntshinyi biakupeshabu mudimu mu kalasa muikale ukulomba kusungula kadre kampanda?

Kudi malu manene asatu a kumanya: (1) tshiena-bualu, (2) kadre ne muntu unuenza nende mudimu, ne (3) ngikadilu wa bungamba-malu udibu bakulomba.

Keba malu a kubueja mu tshiena-bualu tshiebe. Kadi kumpala kua kuya kule, anji ela meji bimpe bua kadre anyi nsombelu unuenzela mudimu ne muntu mene uwikala ne bua kuwenza nende, bualu bintu ebi bidi bienda pamue ne tshiena-bualu ne mushindu unuikala ne bua kutshienza. Kadi nkadre kayi ka kuangata? Tshilejilu: kuyisha muntu uudi mumanye peshi uudi kuyi mumanye; udi mua kuikala muntu mukole anyi muana kuudi; meji adiye nawu bua tshiena-bualu tshiebe; malu akadiye mua kuikala mumanye pa tshiena-bualu atshi; tshiudi wipatshila ne muyuki webe. Malu aa neakuambuluishe bua kupeta kadre kakanyine bua mudimu webe eu.

Neupetele malu a tshiena-bualu tshiebe penyi? Bala malu adi mu mukanda eu mu tshiena-bualu tshia ne: “Mua kukebulula malu,” mu dibeji dia 33 too ne mu dia 38, ne ubale kabidi mikanda idibu balejamu ya kukebela malu yudi mua kuikala nayi. Neupete malu a bungi. Ubale bia bungi bua kumanya bimpe malu adiku. Paudi ubala malu aa, kupu muoyo bua kadre kaudi musungule ne muntu unuenza nende mudimu to. Keba malu adi makumbanyine mudimu webe.

Kumpala kua kufunda malu onso audi musungule, wanji kubala ngikadilu udibu bakulombe mu kalasa. Bumue bua ku malu adibu bakupeshile mudimu eu mbua kukolesha ngikadilu wa bungamba-malu au.

Wewe muenze mudimu mu dîba dikukosela, neupete mushindu wa kukoma muyuki webe bimpe, bualu nebakumanyishe pikala minite yebe mijike. (Kadi mu buambi dîba kaditu menemene ne bualu to.) Nenku paudi ulongolola mudimu webe, kupu dîba didibu bakufundile muoyo to; tshibi udienzeje bikole bua kulongesha bimpe.

Mibelu bua kadre ka kuangata. Bala mu dibeji dia 82, ne sungula kadre kadi kakanyine mudimu webe wa buambi ne kadi kapetangana ne tshiena-bualu tshiudi natshi. Nansha wewe mumane kuenzenza midimu mu kalasa, bala anu kubala malu aa, neuyishe bantu bimpe bitambe.

Pikala mutangidi wa kalasa mukupeshe kadre, kubengi to. Mu nsombelu mivule, kadre katu katangila nangananga diyisha dia bantu. Biwikala kuyi muanji kuyisha mu kadre ka buena kadiye mukulombe aku, keba bantu bakadi bayishe nanku bua bakuambuluishe. Pikalaku mushindu, dianjila kuteta kudienzela tshiena-bualu tshiebe mu kadre kafuanangana ne kawenza mu kalasa. Ke mushindu wakuambuluisha kalasa ka mudimu nanku.

Bua mudimu muenza bu muyuki

Biwikala muntu mulume, nebakulombe bua kuenza tu-miyuki mu tshisumbu. Paudi ulongolola tu-miyuki etu, malu manene a kulonda ng’a mushindu umue ne atudi baleje mu miyuki ya bantu bayikila. Dishilangana dinene didiku mbantu baudi wewe uyikila nabu ne mushindu wa kuenza muyuki.

Bua muyuki webe kuambuluishawu bantu bonso, udilongolole bimpe. Ba bungi badi mu bisangilu mbamanye malongesha a nshindamenu a mu Bible. Badi mene mua kuikala bamanye tshiena-bualu tshiebe biakane. Ukebe malu akadibu bamanye pa tshiena-bualu etshi. Ukebe mushindu uditshi mua kubambuluisha. Udiebeje ne: ‘Mmunyi mundi mua kuenza bua tshiena-bualu etshi kunsaka ne kusakatshi bantu bua kuanyisha Yehowa bikole ne kumuangata bu muntu mulelela? Ntshinyi tshidimu tshidi tshituleja tshintu tshidi Nzambi musue anyi kayi musue? Mmunyi mudi tshiena-bualu etshi mua kutuambuluisha bua kuangata mapangadika majalame nansha mudi bantu badi balonda nkuka ya mibidi yabu bikale batunyunguluke?’ (Ef. 2:3) Bua kukumbaja tshidi nkonko eyi ilomba, bidi bikengela kukebulula malu. Paudi ubala Bible, kubadi anu miaku tshianana to. Elangana nabu meji pa mvese, ne ubaleje mudiye utufikisha ku nkomenu kampanda. (Bien. 17:2, 3) Kukebi bua kuamba malu mavule mapite to. Enza bua bantu kuikalabu bavuluka anu kuvuluka muyuki webe kakuyi lutatu.

Kudilongolola kudi kumvuija kabidi, kuakaja bimpe bimpe mushindu uwenza muyuki webe. Kulenguludi bualu ebu to. Ambulula muyuki webe misangu ne misangu ne dîyi dikole. Neuye kumpala biwikala uditatshisha bua kulonga ne kutumikila mibelu ya bungamba-malu. Nansha wewe mumanye kuenza miyuki, ikala udilongolola biakane bua kumona mua kuakula ne muoyo mujima. Paudi wenza muyuki wonso wa mu kalasa, wikala uvuluka ne: Yehowa mmukupe mukana bua kumutumbisha.​—Mus. 150:6.

PROGRAME wa Kalasa ka Mudimu wa Nzambi mmuenza bua kuambuluisha bena tshisumbu bonso. Manga malu a mushinga adi mu bisangilu bikuabu, mu mpuilu ne mu mpungilu. Buobu bakupeshe mudimu mu bisangilu ebi, mbakupe bujitu bunene. Mupostolo Paulo wakambila Timote (uvua mukulu) bua kuikala misangu yonso mudimuke mu dilongesha diende. (1 Tim. 4:16) Dîba didi bantu bateka bua kulua mu bisangilu bia bena Kristo didi ne mushinga bualu malu adibu balongeshamu adi abafikisha ku dikala ne malanda mimpe ne Nzambi. Banga mene batu baluamu batu batata bikole bua kumufika. Nanku kulongesha mu bisangilu bia mushindu eu mbujitu bunene be! Tuenze tshinyi?

Malu manene a mu dibala dia Bible

Mudimu wa mu kalasa eu mmuashila pa dibala dia Bible dia ku lumingu luonso. Bidi bikengela kushindika bua kuleja mushindu udi malu adimu atutangila lelu. Tshilejilu, mu Nehemiya 8:8, tudi tusangana Ezela ne bena diende babala Dîyi dia Nzambi kumpala kua bantu, badiumvuija, ne ‘badijinguluila bantu’ bua buobu kudiumvua biakane. Udi pebe ne bua kulonda tshilejilu tshiabu paudi wenza malu manene a mu Bible.

Mmunyi muudi mua kulongolola mudimu webe eu? Pikalaku mushindu, ubale nshapita idibu bakupeshe lumingu lumue anyi ya bungi kumpala. Ela meji bua malu adi tshisumbu tshienu tshikale nawu dijinga. Sambila. Mpindieu kebamu mibelu, bilejilu, anyi mikenji idi yakula bua majinga a tshisumbu tshienu au.

Bidi bikengela kukebulula malu. Udi mua kupeta malu aa mu ka-ditadi ka CD-ROM Watchtower Library, mu mukanda wa Index des publications de la Société Watch Tower ne mu indekse utu mu nimero wa ndekelu wa tshidimu wa Tshibumba tshia Nsentedi. Paudi ubala mikanda idi yakula pa mvese ayi, neupete ngenyi mikuabu mimpe. Tshilejilu: muakabanga bualu, diumvuija dikumbana dia mulayi, mushindu udibu bakonkonone ngikadilu ya Yehowa mu mvese mikuabu, ne diumvuija dia mikenji yende. Kuakudi bua malu mapitepite bungi to. Sungula anu mvese mikese tshianana. Kuangata mvese mikese kadi kuyenza bilenga, nkuimpe.

Badi mua kukulomba kabidi bua kuebeja bantu malu mimpe adibu bapete mu dibala diabu dia Bible dia ku lumingu. Mmalu kayi adibu bapete abambuluisha mu dilonga diabu ne dia dîku peshi mu buambi anyi mu nsombelu wabu? Nngikadilu kayi ivua Yehowa muleje mu malanda ende ne muntu anyi ne matunga majima? Mmalu kayi adi makoleshe ditabuja diabu ne mabafikishe ku dianyisha Yehowa? Kukebi malu makodiakane ne tualu tua muinshi mua mâyi to. Shindamena pa diumvuija ne dikuatshisha didi nadi malu kampanda masungula.

Muyuki wa ndongeshilu

Udi mua kuikala muashila pa biena-bualu bia mu Tshibumba tshia Nsentedi anyi Réveillez-vous! peshi mukanda mukuabu. Misangu mivule kakutu mushindu wa kuamba malu onso a mu biena-bualu ebi mu dîba dikukosela to. Kadi tuenze tshinyi? Mulongeshi katu wamba malu anu bua kuamba to. Mutangidi udi ne bua kuikala “mumanye mua kulongesha.”​—1 Tim. 3:2, MMM.

Anji bala tshiena-bualu. Keba mvese. Ela meji. Udilongolole nenku kumpala kua dîba. Wavuluka ne: bana betu mbabale pabu imue misangu tshiena-bualu atshi. Nenku, mudimu webe kawena amu wa kuamba mu tshikepeshilu peshi kubumbakaja malu to, kadi nangananga ng’wa kuleja mushindu wa kuatumikila. Enza mudimu ne malu makanyine bua tshisumbu kupetatshi dikuatshisha.

Bisumbu bidi anu bu bana: muana yonso utu ne buende bumuntu, tshisumbu tshionso tshitu ne atshi malu. Muledi muimpe katu wambuluila muanende mibelu patupu anu bu musambu to, utu umuelesha meji. Kêna upua muoyo bumuntu ne malu adi atatshisha muanende to. Bia muomumue, aba badi balongesha mu tshisumbu badi ne bua kumanya ne kuakula pa majinga a tshisumbu. Kadi mbimpe patudi tufila bilejilu, kubifila ne lungenyi luonso bua kubenga kubungamija muntu. Leja bantu masanka akadibu bapete padibu benda mu njila ya Yehowa, ne leja kabidi mibelu idi Mifundu ifila bua kujikija ntatu idibu nayi.

Dilongesha dimpe ditu dilenga bantu ku muoyo. Bua kufika ku dienza nunku, enza bua bantu banyishe malu audi ubambila. Bidi bilomba kunanga bantu baudi ulongesha bikole. Balami ba mu nyuma badi ne bua kumanya mikoko. Buobu kabayi bapua muoyo ntatu idi nayi bantu, nebabakankamije, nebabumvuile, nebabaleje dinanga ne nebaditeke pa muaba wabu padibu babalongesha.

Balongeshi bimpe mbamanye ne: muyuki udi ne tshipatshila kampanda tshisunguluke. Bantu badi ne tshia kumona patoke malu manene ne kuavuluka, kuvuluka kabidi ne ngenyi idi mua kubambuluisha.

Tshisangilu tshia Mudimu

Paudi wenzela muyuki pa tshiena-bualu tshia mu Mudimu wetu wa Bukalenge, malu adi mukuabu mushindu. Emu kuena usungula to, kadi badi bakulomba bua ulongeshe malu bimpe anu mudiwu mafunda. Ambuluisha bantu bua bele meji bua mvese idi ishindika mibelu iudi ufila. (Tito 1:9) Pa tshibidilu, kakutu mushindu wa kukumbaja ngenyi mikuabu to, bualu dîba ditu dikosa.

Kudi kabidi miyuki idi kayiyi mu Mudimu wa Bukalenge to. Bidi mua kuikala tshiena-bualu tshia mu Tshibumba tshia Nsentedi, anyi badi mua kukupesha amu ngenyi mikese tshianana. Bu muudi mulongeshi, wewe ke udi ne tshilumbu tshia kuakaja malu bilondeshile majinga a tshisumbu. Udi mua kuela mufuanu ta tshilejilu anyi kulonda bualu buakanyine buvua buenzeke, kadi buikale buipi. Uvuluke ne: tshiudi natshi ntshia kuambuluisha bantu bua kuenzabu mudimu udi Dîyi dia Nzambi dibalomba bua kuenza ne disanka dionso.​—Bien. 20:20, 21.

Paudi udilongolola, kupu muoyo bua malu adi nawu bena mu tshisumbu to. Ubele kalumbadi bua malu adibu benza. Kadi mmunyi mudi ditumikila mibelu iudi ubapesha mua kubambuluisha bua kuenza mudimu wa budimi bimpe ne disanka?

Bidi bikengela kuenza dinaya dia tshilejilu peshi kuela bantu nkonko anyi? Ubilongolole bimpe kumpala kua dîba. Kulomba muntu mukuabu bua adilongolole bua manaya aa ki nkuimpe to. Wenze muebe muonso bua kuambulula midimu eyi kumpala kua dituku dia bisangilu. Wikale mujadike ne: bidi bishindika malu audi ulongesha.

Mpuilu ne mpungilu

Bana betu ba balume badi baleja ngikadilu milenga ne badi balua balongeshi ne bangamba-malu ba tshishiki batu babapesha imue misangu miyuki mu mpuilu anyi mu mpungilu. Nndongoluelu ya kulongesha bantu ba Nzambi ya pa buayi. Badi mua kukupesha: muyuki mufunda wonso, muyuki wa plan, malu a kulonda bua drama, anyi tshikoso tshia malu a kulonda. Paudi upeta mudimu wa nunku mu mpuilu, uulonge bimpe bimpe. Uubale too ne pawaumvua bimpe.

Badi ne muyuki mufunda wonso badi ne bua kubala muaku ku muaku. Kabena bashintulula kantu nansha kamue to. Batu baubala bua kumona malu manene ne kumona mudibu baalabaja. Batu babala babalulula ne dîyi dikole too ne padibu bafika ku dibala bu badi bela muyuki, babala ne bukole, ne musangelu, ne muoyo mujima, ne dituishibua, ne mupimbu ne dîyi bunene bukumbane padibu kumpala kua bantu bavule bu mu mpuilu.

Badi ne muyuki wa plan badi ne bua kulongolola malu bilondeshile malu adi mu plan. Pa mutu pa kubala plan anyi kufunda malu onso a kuamba, bidi bikengela kuakula malu adi afumina mu mutshima, kuamba kabidi mu mutu kuyi uabala. Kupitshishi dîba didibu bakukosele bua wamona mua kumvuija bualu bunene buonso bimpe, ukuata mudimu ne ngenyi ne mvese ya mu plan bua kushindika malu manene. Kuena ne bua kuela malu ebe nkayebe ne kushiya adi mu plan to. Dilongesha didi dishindamene pa Dîyi dia Nzambi. Bakulu bena Kristo badi ne bujitu bua ‘kuambila bantu dîyi dia Nzambi.’ (2 Tim. 4:1, 2) Ke bua tshinyi udi ne bua kutabalela mvese idi mu plan webe bikole, kuelesha bantu meji ne kubaleja mua kuyitumikila.

Kuindidi malaba to!

Udi mu tshisumbu mutu bantu benza miyuki misangu ya bungi anyi? Mmunyi muudi mua kuyenza bilenga? Kuindidi bua kuyilongolola anu dituku dia ndekelu to.

Miyuki itu ikuatshisha bantu ng’eyi itubu balongolola kumpala kua dîba. Nenku, ubale mudimu diakamue padibu bakupeshawu. Nebikupeshe mushindu wa kuelelapu meji paudi wenza makuabu malu. Bumue, matuku anyi mbingu kumpala kua kuwenza, udi mua kuteleja bamba malu adi aleja mua kutumikila ngenyi idi mu muyuki webe bimpe menemene. Malu makuabu adi mua kulua kuenzeka adi mua kulua kulengeja muyuki webe bimpe. Nansha mudi kubala ne kuela meji bua mudimu wetu patudi tuupetelaku diakamue mua kutuangata dîba, ndîba dipitshisha bimpe. Mpindieu paudi ulua kuusombela, neumone mushinga wa diubala kumpala kua dîba. Kudilongolola kua nunku kudi kukuambuluisha bua kubenga kupampakana, kukuambuluisha bua kuenza mudimu webe bimpe ne kulenga bantu ku muoyo.

Wewe wangata dipa dia kulongesha basadidi ba Yehowa didibu bakupe ne mushinga wa bungi, neutumbishe Nzambi ne newikale bu dibenesha kudi bantu badi bamunange.​—Yesh. 54:13; Lomo 12:6-8.

BISUMBU bia Bantemu ba Yehowa pa kuamba bionso bitu ne muyuki wa patoke muashila pa Mifundu mu programe wabi lumingu luonso. Biwikala udi mukulu anyi musadidi wa mudimu, bantu batu bamona ne: udi ngamba-malu wa tshishiki peshi mulongeshi muimpe anyi? Biwikala ngamba-malu muakane, nebakupe muyuki wa patoke. Kalasa ka Mudimu wa Nzambi kakadi kambuluishe bantu binunu ne binunu bua kumanya mua kuenza miyuki eyi. Kadi biakupeshabu muyuki eu, neutuadijile penyi?

Longa plan

Bala plan udibu bakupeshe ne ela meji bua kumumvua kumpala kua kubanga kukebulula malu. Kuata bimpe tshiena-bualu anyi mutu wa bualu wa muyuki. Tshiwalongesha bantu ntshinyi? Tshiudi ukeba ntshinyi?

Ukuate malu manene bimpe. Ualonge. Mona mudi bualu bunene buonso bumvuangana ne tshiena-bualu. Muinshi mua bualu bunene bonso mudi ngenyi idi ibukuatshisha. Keba mudi malu onso adi mu bualu bunene bumue umvuangana ne a mu budi ku mutu kuabu, mudiwu akubueja mu budi bubulonda, ne mudiwu afikisha ku tshidibu bipatshila mu muyuki. Wewe mumane kumvua tshiena-bualu, tshipatshila tshia muyuki, ne mudi malu manene umvuangana natshi, udi mua kubanga mpindieu kuenza makebulula.

Bangabanga, mbimpe kukosolola muyuki mu bitupa binayi anyi bitanu, bilondeshile bungi bua malu manene. Longolola bualu bunene bumue ku bumue.

Plan udibu bakupeshe udi ukuambuluisha bua kulongolola malu. Kêna ne malu onso to, mmuenze bu mifuba nkayayi. Nanku bidi bikengela kuela misunyi, muoyo anyi mutshima ne mupuya wa muoyo.

Dikuata mudimu ne Mifundu

Yezu ne bayidi bende bavua bashila dilongesha diabu pa Mifundu. (Luka 4:16-21; 24:27; Bien. 17:2, 3) Ubidikije. Mifundu ke idi ne bua kuikala nshindamenu wa muyuki webe. Pamutu pa kumvuija ne kuleja mua kutumikila malu adi mu plan tshianana, keba mudi malu aa mashindamene pa mvese, ne longesha muimanyine pa mvese eyi.

Konkonona mvese yonso udi mu plan. Tangila mvese idi pabuipi nende mu Bible. Imue mvese idi mua kuikala ifila anu ngenyi mimpe tshianana. Kabiena bikengela kubala yonso anyi kuakuila pa yonso to. Sungula idi mua kuambuluisha bantu. Wewe mushindamene pa mvese idi mu plan, imue misangu kabiakukengela kabidi kusakidila yebe mvese to.

Kuenza mudimu ne mvese mivule ki nkudi kuakaja muyuki to, kadi mmushindu uudi ulongesha. Paudi ufila mvese, uleje kafidila kende. Ikala ne dîba dia kuleja mua kukuata nende mudimu. Kubuikidi Bible kunyima kua dibala mvese to. Nanku bantu nebakuidikije, balekela pabu yabu Bible mikangula. Udi mua kuenza tshinyi bua kujula bantu nzala ne kubambuluisha bimpe ne Dîyi dia Nzambi? (Neh. 8:8, 12) Udi mua kufila diumvuija, mufuanu, ne kuleja mushindu wa kutumikila mvese eu.

Diumvuija. Paudi usua kumvuija mvese kampanda, udiebeje ne: ‘Udi usua kuamba tshinyi? Ndi nkuata nende mudimu bua tshinyi? Bantu bandi ndongesha badi mua kuikala badiebeja tshinyi bua mvese eu?’ Udi mua kutangila mvese idi pabuipi nende mu Bible, malu adi mu mukanda muine, malu adi muaba au, miaku kampanda, ne tshivua mufundi wa mukanda ukeba. Bionso ebi bidi bilomba makebulula. Mikanda ya “mupika wa lulamatu ne wa budimu” neyikuambuluishe bikole. (Mat. 24:45-47, NW) Kukebi bua kuangata mvese ne kumvuija malu onso adi amutangila to. Umvuija tshiudi mubadile mvese au ne malu audi ulongesha.

Mifuanu. Mudimu wa mifuanu ng’wa kuambuluisha bantu bua bumvue bilenga menemene anyi bua kabapu bualu kampanda muoyo peshi bua kubuvulukabu. Mifuanu idi ifikisha bantu ku diumvua biudi wamba ne kubifuanyikija ne bintu bitubu bamanye. Ke tshiakenza Yezu pakelaye Muyuki wende muende lumu wa pa Mukuna. Kuakulaye bua “nyunyu ya mu diulu,” “bilongo bia mu mpata,” “mushiku wa mbelu mubumbakane,” ‘nzubu pa mutu pa dibue’ ne bikuabu bintu. Biakenza ne: dilongesha diende dikale ditambe bulenga, ditoke tòò, ne kadiyi kupua muoyo.​—Mat., Nshap. 5–7.

Ditumikila. Bantu badi bapeta dimanya patudi tumvuija mvese ne tufila mifuanu, kadi padibu batumikila dimanya edi, bidi bibambuluisha bikole. Nansha mudi muntu ne muntu ne bujitu bua kutumikila malu a mu Bible audi wamba, udi mua kubambuluisha bua kumona tshidibu mua kuenza. Wewe mumane kujadika ne: bantu mbumvue mvese ne mbamone mudiye umvuangana ne biudi wamba, pitshisha dîba ndambu bua kubaleja mudi mvese utangila ditabuja ne ngikadilu wabu. Shindamena pa bipeta bilenga bidibu mua kupeta buobu mua kulekela ngenyi anyi bibidilu bidi bibengangana ne lungenyi lua mvese uudi mubale.

Paudi wela meji pa mushindu wa kubaleja bua kutumikila mvese, kupu muoyo ne: bantu mbashilangane ne badi ne malu mashilangane. Kudi mua kuikala bapiabapia, bansonga, bakulumpe, ne banga badi ne ntatu ya bungi. Muyuki webe wikale wamba malu adi bantu bamona. Mibelu idi yenza anu bu idi itangila anu bantu bakese tshianana ba ku badi bakuteleja ki mmimpe to.

Mapangadika a ngamba-malu

Bakadi bakutekele amue malu. Tshilejilu, malu manene mmamana kukufundila, dîba dia kupitshisha pa bualu bunene buonso ndikukosela. Wewe ke udi mpindieu ne bua kuangata mapangadika adi mashale. Udi mua kupangadija bua kupitshisha dîba dia bungi anyi dikese pa imue ngenyi. Kukebi bua kuenza ngenyi yonso mushindu umue to. Bualu neuye lubilu lubilu ne nebitonde bantu bualu udi ne malu mapite bungi audi ubambila. Ntshinyi tshidi mua kukuleja ne: bidi bikengela kuimanyina apa, anyi kuakula anu kakese anyi mu lupitapita apa? Udiebeje ne: ‘Nngenyi kayi idi mua kungambuluisha bua kupatula lungenyi lunene lua muyuki? Nyepi idi mua kuambuluisha bantu bikole? Meme tshiyi mutele mvese kampanda ne ngenyi idi imutangila, malu nealondangane bimpe anyi?’

Udimuke bua kulu kusakidila ngenyi yebe nkayebe. Ke tshivua Yezu Kristo muana wa Nzambi ulonda pende. Wakamba ne: ‘Miaku indi nnuambila kayena ifuma kundi.’ (Yone 14:10, MMV) Wavuluka ne: bantu batu balua mu bisangilu bua kulonga Bible. Biwikale mulue ngamba-malu wa tshitembu ne bikala bantu banyisha miyuki yebe, mbualu utu utangija lungenyi luabu ku Dîyi dia Nzambi, pamutu pa kuudi wewe.​—Filip. 1:10, 11.

Wewe mumane kukumbaja mumvuija mu plan, dibanza didi dishala mpindieu ndia kuambulula. Bitu bimpe kuambulula ne dîyi dikole. Kadi tshidi ne bualu nkumanya ne: udi ne malu onso mu mutu. Wenze muyuki webe ne mutshima mujima, wenze bua usankishe bantu, ne uwenze ne musangelu. Kumpala kua kuela muyuki, wanji kudiebeja ne: ‘Ndi ngipatshila tshinyi? Malu manene adi amueneka patoke anyi? Mvese ke nshindamenu wa muyuki wanyi anyi? Bualu bunene buonso budi bufikisha ku budi bubulonda kakuyi lutatu anyi? Muyuki undi ngela udi usaka bantu bua kusankidilabu Yehowa ne malu adiye mulongolole anyi? Nkomenu udi umvuangana ne tshiena-bualu, uleja bantu tshia kuenza, ne ubasaka ku ditshienza anyi?’ Diandamuna diebe diodi dikale ne: ‘eyowa,’ mmumue ne: udi mua ‘kupatula lungenyi’ anyi dimanya bua kuambuluisha tshisumbu ne kutumbisha Yehowa.​—Nsu. 15:2.