Bujitu bua dikala muyidi wa Kristo

Yezu uvua mufile malongesha a mushinga pavuabu badia kua mfumu wa Bafalese. Pavua Yezu wenda uya mutangile ku Yelushalema, musumba wa bantu ba bungi wakaya nende. Bua tshinyi? Mbasuaku bushuwa kuikala bayidi bende balelela nansha biobi mua kubalomba tshinyi anyi?

Padibu benda baya mu njila, Yezu udi ubambila bualu kampanda budi pamuapa mua kutonda bamue. Udi wamba ne: “Muntu yeye mulue kundi, kayi ukina tatuende ne mamuende ne mukajende ne bana bende ne bana babu ba balume ne bana babu ba bakaji, eyowa, nansha ne muoyo wende mene, kena mua kuikala muyidi wanyi to.” (Luka 14:26) Mêyi ende aa adi umvuija tshinyi?

Yezu kena usua kuamba ne: bantu bonso badi balua bayidi bende badi ne bua kukina balela babu mu ngumvuilu wa buntu to. Kadi udi usua kuleja ne: badi ne bua kubakina mu mushindu wa kubenga kubananga kupita mudibu banange Yezu, kabena ne bua kuikala bu muntu wa mu tshilejilu tshia Yezu tshia didia dia dilolo uvua mubenge dibikila dia mushinga bualu uvua ufuma ku disela to. (Luka 14:20) Badi bamba muvua Yakoba nkambua wa bena Yuda “mukine” Lea ne munange Lakele, mbuena kuamba ne: uvua munange Lakele bikole kupita Lea.​—Genese 29:31; tangila dimanyisha.

Mona ne: Yezu udi wamba ne: muyidi udi ne bua kukina too ne “muoyo wende,” anyi anyima wende. Mmumue ne: muyidi mulelela udi ne bua kunanga Yezu bikole kupita mudiye munange muoyo wende, kuitaba nansha bua kuwujimija biobi bikengela kuenza nanku. Bulelela, kuikala muyidi wa Kristo ki mbualu bua bilele to. Katuena ne bua kulua bayidi ba Kristo katuyi badilongolole bimpe to.

Kuikala muyidi kudi mua kutukebela ntatu ne dikengeshibua, bualu Yezu wakamba ne: “Muntu yonso udi kayi wambula mutshi wende wa makenga, undonda, kena mua kuikala muyidi wanyi to.” (Luka 14:27) Eyowa, muyidi mulelela wa Yezu udi ne bua kuitaba bua kuambula bujitu bua dikengeshibua anu muvua Yezu muenze. Yezu wakamba mene ne: uvua ne bua kufua mu bianza bia baluishi bende.

Nunku musumba wa bantu bavua baya ne Yezu bavua ne bua kudikonkonona bimpe bua kumanya tshivua kuikala muyidi wa Kristo kulomba. Yezu wakashindika bualu ebu wamba ne: “Tshilejilu, nnganyi wa kunudi udi musue kuibaka tshibumba kayi wanji kusomba, ubadika bungi bua makuta adiye ne bua kutula bua kumona ni udi ne bintu bikumbane bua kutshijikija? Tshianana, udi mua kuibaka tshishimikidi tshiatshi, kadi kayi ukokesha bua kutshijikija.” (Luka 14:28, 29) Nunku, kumpala kua kulua bayidi ba Yezu, bantu bavua nende mu luendu batangile mu Yelushalema aba bavua ne bua kuangata dipangadika dikole edi bua kuambula bujitu ebu bimpe. Wakashindika lungenyi alu ne tshilejilu tshikuabu etshi:

“Mmukalenge kayi udi uya kuela mukalenge mukuabu mvita, kayi wanji kusomba, ukeba lungenyi bua kumona ni udi mua kukokesha ne basalayi binunu 10 bua kuimanangana ne eu udi ulua kumuluisha ne basalayi binunu 20? Mu bulelela, bikalaye kayi mua kuenza nunku, dîba adi, patshidi mukuabu au kule, udi utuma kasumbu ka baleji mpala bua kukeba ditalala.” Bua kushindika lungenyi luende, Yezu udi wamba ne: “Bia muomumue, nuikale bamanye ne: muntu yonso wa munkatshi muenu udi kayi ushiya bintu biende bionso, kena mua kuikala muyidi wanyi to.”​—Luka 14:31-33.

Bushuwa, Yezu kena anu wakula bua musumba wa bantu uvua umulonda to. Bantu bonso bavua bumvua lumu lua Kristo bavua ne bua kuitaba bua kuenza tshidiye muambe etshi. Bidi bisua kuleja ne: bobu basue kuikala bayidi bende, bavua ne bua kuikala pabuipi bua kujimija tshionso tshivuabu natshi, mmumue ne: bintu bidibu nabi too ne muoyo wabu. Ebu mbualu bua kuelela meji ne kusambidila.

Mpindieu Yezu udi wambulula bualu buvuaye muambe mu Muyuki wende wa pa Mukuna pavuaye muambile bayidi bende ne: bavua “mukele wa buloba.” (Matayi 5:13) Uvua pamuapa usua kuamba ne: anu mutu mukele wetu eu ulama bintu, bayidi bende badi pabu balama bantu pa kubakuba ku dinyanguka dia mu nyuma ne mu bikadilu. Nunku bu muvuaye ku ndekelu kua mudimu wende wa diyisha, wakamba ne: “Mu kuamba kuimpe, mukele mmuimpe. Kadi mukele wowu mujimije bukole buawu, nebawutuishe ne tshinyi?” (Luka 14:34) Bateleji bende bavua bamanye ne: mukele kampanda wa tshikondo atshi uvua mubi, bualu uvua musambakaja ne bintu kampanda bia buloba nunku uvua ne mushinga mukese.

Nunku Yezu udi uleja ne: nansha bantu bakadi bayidi bende kukadi bidimu bia bungi kabena ne bua kutekesha dipangadika diabu to. Biobi bienzeke nanku, kabakuikala ne mushinga anu bu mukele uvua mujimije bukole buawu. Bantu ba mu buloba ebu badi mene mua kubaseka. Kupita apu, kabakuikala bakumbane ku mêsu kua Nzambi, ne nebapendeshishe too ne dîna diende. Yezu wakaleja mudibi ne mushinga bua kuepuka bualu ebu padiye wamba ne: “Muntu udi ne matshi a kumvua, umvue.”​—Luka 14:35.