Bisangilu bidi ‘bisakangana ku dinanga ne ku bienzedi bimpe’

MUNKATSHI mua bidimu nkama ne nkama, batendeledi ba Yehowa batu badisangisha mu mushindu mulongolola. Ku kale mu Isalele, bantu balume bonso bavua baya ku Yelushalema bua kubuela mu bibilu binene bisatu. (Dut. 16:16) Mu bidimu lukama bia kumpala, bena Kristo bavua badisangisha pa tshibidilu, misangu ya bungi mu nzubu wa muntu. (Filem. 1, 2) Lelu eu, tutu tuenza bisangilu, mpuilu, ne mpungilu. Bua tshinyi batendeledi ba Nzambi batu badisangisha pamue? Bualu didisangisha edi didi nangananga tshitupa tshinene tshia ntendelelu wetu.​—Mis. 95:6; Kolos. 3:16.

² Bisangilu bitu kabidi biambuluisha bantu batu babuelamu. Bua Tshibilu tshionso tshia Bitanda tshia muanda mutekete, bakambila bena Isalele ne: “Usangishe bantu kaba kamue, balume, bakaji, bana, ne muntu udi musombe buenyi mu bimenga biebe, bua bateleje, balonge ne batshine Yehowa Nzambi wenu ne badimuke bua kutumikila mêyi onso a Mikenji eyi.” (Dut. 31:12) Bidi bimueneka patoke ne: tutu tudisangisha nangananga bua ‘kulongeshibua kudi Yehowa.’ (Yesh. 54:13) Bisangilu bidi kabidi bitupetesha mpunga wa kumanyangana ne bakuabu, kukankamijibua ne kukoleshibua kudibu.

BISANGILU BIA TSHISUMBU

³ Bayidi bavua badisangishe panyima pa Pentekoste wa mu 33 P.Y. bakadifila ku malongesha a bapostolo, ne “ku dituku ne ku dituku, bavua batungunuka ne kuya ku ntempelo ne tshipatshila tshimue.” (Bien. 2:42, 46) Panyima pa matuku, pavua bena Kristo badisangisha bua kutendelela, bavua babala mikanda mifundisha ku bukole bua nyuma wa Nzambi, bu mudi ivua bapostolo ne bayidi bakuabu bena Kristo bafunde. (1 Kol. 1:1, 2; Kolos. 4:16; 1 Tes. 1:1; Yak. 1:1) Bavua basambila kabidi pavuabu badisangisha. (Bien. 4:24-29; 20:36) Misangu mikuabu bavua balonda malu avua bamisionere bamone mu mudimu wabu. (Bien. 11:5-18; 14:27, 28) Bavua bakonkonona malongesha a nshindamenu ne dikumbana dia milayi ya mu Bible. Bavua balongesha malu avua atangila nsombelu muimpe udi bena Kristo ne bua kuikala nende ne a dilamata Nzambi. Bavua bakankamija bantu bonso bua kuikala bamanyishi ba lumu luimpe ba tshisumi.​—Lomo 10:9, 10; 1 Kol. 11:23-26; 15:58; Ef. 5:1-33.

⁴ Matuku etu aa, bisangilu bia bena Kristo bidi bienzeka anu muvuabi bienzeka mu tshikondo tshia bapostolo. Tudi tulonda mubelu udi mu Ebelu 10:24, 25 wa ne: “Tuelelanganayi kabidi meji . . . , katuyi tulekela kudisangisha kuetu pamue, bu mudi tshilele tshia bakuabu, kadi tuikale tukankamijangana, ne tuenze nunku nangananga bu munudi numona dituku dienda disemena pabuipi.” Mu matuku makole a ku nshikidilu aa, tudi dijinga ne dikankamija ditudi tupeta patudi tudisangisha bua tuetu kushala bashindame mu nyuma ne kulama muoyo wetu mutoke. (Lomo 1:11, 12) Tuetu bena Kristo tudi munkatshi mua bantu ba tshipungu tshibi tshidi tshikonyangale etshi. Tudi balekele malu adi kaayi a Nzambi ne majinga a panu. (Filip. 2:15, 16; Tito 2:12-14) Bushuwa, kakuena muaba nansha umue udi mutambe buimpe bu mudi wa kuikala munkatshi mua bantu ba Yehowa to! (Mis. 84:10) Kakuena tshintu tshidi mua kuambuluisha bantu bikole kupita kulonga Dîyi dia Nzambi ne kudiyukidilangana to. Tumonayi bisangilu bishilashilangane bidibu balongolole bua kutuambuluisha.

TSHISANGILU TSHIA KU NDEKELU KUA LUMINGU

⁵ Tshitupa tshia kumpala tshia tshisangilu tshia ku ndekelu kua lumingu mmuyuki wa malu a mu Bible utubu benza nangananga bua bantu bonso. Mu bantu batu bateleja muyuki eu, mudi mua kuikala badi balue bua musangu wa kumpala. Muyuki eu udi pawu wambuluisha bikole bua kukumbaja majinga a mu nyuma a bapiabapia ne a bamanyisha ba mu tshisumbu.​—Bien. 18:4; 19:9, 10.

⁶ Kristo Yezu ne bapostolo bende ne bayidi bakuabu bavua benza bisangilu bifuanangane ne bitudi tuenza lelu eu mu bisumbu bia bantu ba Yehowa. Kakuyi mpata, Yezu uvua ngamba-malu wa katshia ne katshia. Bakamba bua bualu buende ne: “Katshia muntu nansha umue katu muanji kuakula mushindu eu to.” (Yone 7:46) Yezu uvua wakula ne bukokeshi ne ukemesha bantu bavua bamuteleja. (Mat. 7:28, 29) Bantu bavua batumikila malu avuaye ulongesha bavua bapeta masanka a bungi. (Mat. 13:16, 17) Bapostolo bakalonda dikasa diende. Mu Bienzedi 2:14-36 mudi muyuki wa tshikuma uvua Petelo muenze dituku dia Pentekoste wa tshidimu tshia 33 P.Y. Muyuki eu wakambuluisha bantu binunu ne binunu bua kutumikila bivuabu bumvue. Pashishe, muyuki wakenza Paulo ku Atena wakambuluisha kabidi bantu bakuabu bua kulua bena kuitabuja.​—Bien. 17:22-34.

⁷ Bia muomumue lelu eu, miyuki ya patoke itubu benza lumingu luonso mu bisumbu ne itubu benza mu mpuilu ne mu mpungilu itu yambuluisha bantu binunu ne binunu. Miyuki eyi idi ituambuluisha bua kushala balamate malongesha a bena Kristo ne kuenza mudimu wa Bukalenge katuyi tutenkakana. Patudi tubikila bantu badi banyisha bulelela ne bakuabu kabidi, tudi tubambuluisha bua kumanya malongesha manene a mu Bible.

⁸ Miyuki ya patoke itubu benza itu ne biena-bualu bishilashilangane. Tshilejilu, kudi miyuki itu yakula bua malongesha a nshindamenu ne milayi ya buprofete ya mu Bible, mikuabu yakula bua mêyi manene a mu Bible ne mibelu ya nsombelu mulenga wa mu dîku, nsombelu wa bena mu mabaka, ntatu ya bansonga ne bikadilu bia buena Kristo. Mikuabu payi itu yakula bua bulenga bua bufuki bua Yehowa. Minga yoyi itu mishindamene pa bilejilu bia ditabuja, bia dikima ne bia muoyo mutoke bivua nabi batendeledi ba Nzambi ba kale, ne ifila malongesha bua matuku etu aa.

⁹ Tuetu basue bua miyuki eyi itukuatshishe, tudi ne bua kuteya ntema ya bungi, kukeba mvese idi ngamba-malu ufila ne kulondesha padiye uyibala ne uyumvuija. (Luka 8:18) Tuetu tukonkonona malu adibu balongesha, netuikale badisuike bua kualamata ne kuatumikila.​—1 Tes. 5:21.

¹⁰ Kuoku kuikala bangamba-malu, kakuyi mpata tshisumbu netshikale ne muyuki wa patoke lumingu luonso. Misangu ya bungi badi mua kubikila bangamba-malu ba mu bisumbu bidi pabuipi bua muyuki kawupangiki to. Bikala bangamba-malu bakese, bidi bikengela kulongolola malu bua miyuki eyi ikale yenzeka misangu yonso padiku mushindu.

¹¹ Tshitupa tshibidi tshia tshisangilu tshia ku ndekelu kua lumingu ndilonga dia Tshibumba tshia Nsentedi. Batu bakonkononamu biena-bualu bitubu bapatula mu Tshibumba tshia Nsentedi tshia kulonga; babikonkonona mu nkonko ne mandamuna. Yehowa udi ufila biakudia bia mu nyuma mu tshikondo tshiakanyine ku diambuluisha dia tshibejibeji etshi.

¹² Biena-bualu bia kulonga bitu misangu ya bungi biakula bua mushindu wa kutumikila mêyi manene a mu Bible mu nsombelu wa ku dituku ne ku dituku. Bitu biambuluisha bena Kristo bua kubenga “nyuma wa pa buloba” ne bikadilu bibi. (1 Kol. 2:12) Ku diambuluisha dia Tshibumba tshia Nsentedi, tudi tupeta butoke pa malongesha a nshindamenu ne mêyi a buprofete bidi mu Bible, bienza bua bantu bonso bikale ne ngumvuilu muimpe wa bulelela ne bashale mu njila wa bantu bakane. (Mis. 97:11; Nsu. 4:18) Kubuela mu dilonga dia Tshibumba tshia Nsentedi ne kufilamu mandamuna kudi kutuambuluisha bua kusanka bua ditekemena ditudi nadi dia kupiana buloba bupiabupia bua buakane budi Yehowa mulaye. (Lomo 12:12; 2 Pet. 3:13) Kudisangisha ne bena Kristo netu kudi kutuambuluisha bua kuikala ne dimuma dia nyuma ne kukolesha dijinga dietu dia kuenzela Yehowa mudimu ne tshisumi. (Gal. 5:22, 23) Kudi kabidi kutukolesha bua kutantamena ntatu ne kuikala ne “tshishimikidi tshimpe bua matuku atshilualua,” bua tumone “mua kukuata muoyo wa bushuwa bikole.”​—1 Tim. 6:19; 1 Pet. 1:6, 7.

¹³ Ntshinyi tshitudi mua kuenza bua biakudia bia mu nyuma ebi bituambuluishe menemene? Mbimpe tulongolole dilonga kumpala kua dîba, pa nkayetu anyi mu dîku, tukebe mvese idibu bafile; ne patudi mu dilonga dia Tshibumba tshia Nsentedi tuandamune mu mêyi etu. Kuenza nunku kudi kubueja bulelela mu muoyo wetu, ne mandamuna etu neambuluishe bakuabu. Padi bakuabu bafila mandamuna mu dilonga dia lumingu luonso, tuetu tubateleja ne ntema yonso nebituambuluishe bikole.

TSHISANGILU TSHIA MUNKATSHI MUA LUMINGU

¹⁴ Lumingu luonso bena mu tshisumbu batu badisangisha ku Nzubu wa Bukalenge bua kuenza tshisangilu tshidibu babikila ne: Tshisangilu tshia Nsombelu ne mudimu wetu wa buena Kristo. Tshisangilu etshi tshidi ne bitupa bisatu bidi bituambuluisha bua kuikala bena mudimu ba Nzambi “bakumbane menemene.” (2 Kol. 3:5, 6) Badi bapatula programe watshi ne malu adimu ngondo yonso mu Mabeji a Tshisangilu tshia Nsombelu ne mudimu wetu wa buena Kristo. Mu mabeji aa mudi kabidi mishindu ya mua kuyukila ne bantu mu buambi.

¹⁵ Tshitupa tshia kumpala tshia tshisangilu etshi badi batshibikila ne: Biuma bia mu Dîyi dia Nzambi; tshidi tshituambuluisha bua kumanya tshidi miyuki ya mu Bible yakuila ne muaba uvua malu menzekele, ne mua kupatulamu malongesha. Tshidi ne muyuki, dibala, ne diyukidilangana dimanyine pa dibala dia Bible dia lumingu luonso. Mu mabeji au mudi bimfuanyi ne malu a kuelela meji bidi biambuluisha bua kumvua miyuki eyi bimpe. Dikonkonona Bible bikole mushindu eu didi dituambuluisha mu nsombelu wetu ne mu dilongesha dietu bua ‘tuikale bakumbane menemene, bikale ne bionso bidi bikengedibua bua mudimu wonso muimpe.’​—2 Tim. 3:16, 17.

¹⁶ Tshitupa tshibidi tshia tshisangilu etshi badi batshibikila ne: Difila bikole ku mudimu wa buambi. Ntshienza bua kupesha bantu bonso mpunga wa kudibidija bua mudimu wa buambi ne kuakaja mushindu wabu wa kuyisha ne kulongesha. Pa kumbusha midimu idi balongi benza, kudi kabidi filme ya mua kuyukila ne bantu ya kumona ne kuakuila. Tshitupa tshia tshisangilu etshi tshidi tshituambuluisha bua kupeta “ludimi lua bantu balongesha” bua ‘kumanya mua kuandamuna muntu udi mutshioke ne dîyi diakane.’​—Yesh. 50:4.

¹⁷ Tshitupa tshisatu badi batshibikila ne: Tuikalayi ne nsombelu wa buena Kristo. Tshiotshi tshidi tshileja mua kutumikila mêyi manene a mu Bible ku dituku ne ku dituku. (Mis. 119:105) Tshitupa tshinene tshia mu tshitupa tshia Tuikalayi ne nsombelu wa buena Kristo ke Dilonga dia Bible dia tshisumbu. Ditu dienzeka mu nkonko ne mandamuna anu bu dilonga dia Tshibumba tshia Nsentedi.

¹⁸ Ngondo yonso padi Mabeji a Tshisangilu tshia Nsombelu ne mudimu wetu afika, mutangidi wa malu a kasumbu ka bakulu anyi mukulu udi umuambuluisha udi ukonkonona malu adimu ne ntema, ne wenza programe. Lumingu luonso, mukulu udi mulongeshi mukumbane udi kasumbu ka bakulu kasungule ke udi ulombola tshisangilu etshi. Mulombodi wa tshisangilu udi ne bua kuenza bua tshisangilu tshituadije pa dîba ne tshijike kabidi pa dîba, ne mbimpe ele balongi kalumbandi ne abapeshe mibelu.

¹⁹ Patudi tulongolola Tshisangilu tshia Nsombelu ne mudimu wetu pa tshibidilu, tubuelamu ne tufila mandamuna, tudi tupeta dimanya dia mu Mifundu, tumvua mêyi manene a mu Bible, tuyisha lumu luimpe ne dishindika, ne tupiluka mu divuija bantu bayidi. Midimu mimpe idibu benzamu ne didisangisha ne bana betu badi ne musangelu bidi biambuluisha kabidi bantu badi babuelamu badi kabayi banji kubatijibua. Bua kutuambuluisha bua kudilongolola ku tshisangilu etshi ne bikuabu, tudi mua kuenza makebulula mu mikanda idi mu Watchtower Library, JW Library^®, TSHIBUTSHILU TSHIA MIKANDA TSHIA KU ENTERNETE^™ (tshiotshi tshikale mu muakulu wenu), ne tshilaminu tshia mikanda tshia ku Nzubu wa Bukalenge. Mu tshilaminu tshia mikanda etshi mutu mikanda ya Bantemu ba Yehowa, Index des publications des Témoins de Jéhovah ne Mukanda wa makebulula wa Bantemu ba Yehowa, kabidi ne Bible ya nkudimuinu mishilashilangane, mukanda wa concordance, diksionere, ne mikanda mikuabu idi ne malu adi mua kukuambuluisha. Muntu yonso udi mua kubala mikanda eyi kumpala kua bisangilu anyi panyima pabi.

BISANGILU BIA MUDIMU WA BUAMBI

²⁰ Munkatshi mua lumingu anyi ku ndekelu kualu, tusumbu tua bamanyishi tutu tudisangisha mu mêba mashilashilangane bua minite mikese bua kupatuka mu buambi. Pa tshibidilu batu badisangishila ku nzubu ya bantu anyi miaba mikuabu idi miakanyine. Batu kabidi mua kudisangishila ku Nzubu wa Bukalenge. Tusumbu tuotu tuenza ne bantu bakese badi badisangishila miaba ya bungi mu teritware, bidi mua kuambuluisha bamanyishi bua kuya mu tshisangilu tshia mudimu wa buambi ne mu teritware bipepele. Badi mua kuabanya bamanyishi ne lukasa ne kubatuma mu teritware kabayi bajingakana. Mutangidi wa kasumbu ka mudimu wa buambi udi kabidi ne mushindu wa kutabalela bena mu kasumbu kende bikole. Nansha mudibi biambuluisha padi kasumbu ne kasumbu kadisangishile waku muaba, amue malu adi mua kuenza bua tusumbu tua bungi tudisangishile kaba kamue. Tshilejilu, kuoku kuikale anu bamanyishi bakese badi bayisha munkatshi mua lumingu, bidi mua kuikala bimpe bua kusangisha tusumbu kaba kamue, anyi kuenza bua bamanyishi bonso badisangishile ku Nzubu wa Bukalenge anyi muaba mukuabu udi mukumbane. Padibu benza nunku, mumanyishi yonso neapete muntu wa kuyisha nende. Bidi mua kuikala kabidi bimpe bua tshisumbu tshidisangishile ku Nzubu wa Bukalenge matuku a dikisha. Peshi tshisumbu tshidi mua kusungula bua kuenza tshisangilu tshia mudimu wa buambi bua tusumbu tuonso panyima pa dilonga dia Tshibumba tshia Nsentedi.

²¹ Padi kasumbu ne kasumbu kadisangishila waku muaba, mutangidi wa kasumbu ka buambi ke udi ulombola tshisangilu tshia mudimu wa buambi. Misangu mikuabu, mutangidi wa kasumbu ka buambi udi mua kulomba muanetu udi umuambuluisha anyi muanetu mukuabu udi mukumbane bua kulombola bisangilu ebi. Mulombodi udi ne bua kudilongolola bua kufila ngenyi mimpe idi mua kuambuluisha bamanyishi mu mudimu wa buambi. Udi wabanya bamanyishi ne ubapesha muaba wa kuyishila, ne muena mu kasumbu umue udi wenza disambila. Pashishe bena mu kasumbu nebaye diakamue mu teritware. Bisangilu ebi bidi bienza minite itanu anyi muanda mutekete, kadi badi ne bua kubipidija biobi bienzeka panyima pa tshisangilu tshia tshisumbu. Mulombodi udi ne bua kukankamija bamanyishi, kubapesha mibelu mimpe ne buludiki. Bamanyishi bapiabapia anyi bakuabu badi mua kuikala dijinga ne diambuluisha badi mua kupatuka ne bamanyishi bapiluke bua babalongeshe.

MUA KUENZA BISANGILU MU BISUMBU BIPIABIPIA ANYI BIDI NE BANTU BAKESE

²² Padi bayidi bavulangana, bisumbu bidi pabi bivula. Pa tshidibilu mutangidi wa tshijengu ke utu uwuja dilomba bua kuenza tshisumbu tshipiatshipia. Kadi misangu mikuabu, bidi mua kuikala bimpe bua tusumbu tudi ne bantu bakese tudisangishe ne tshisumbu tshidi pabuipi menemene.

²³ Imue misangu kutu bisumbu bitu ne bantu bakese bienza anu ne bana betu ba bakaji nkayabu. Biobi nanku, muanetu wa bakaji udi wenza disambila anyi ulombola bisangilu udi ne bua kubuikila mutu wende bimpe, anu mudi Bible wamba. (1 Kol. 11:3-16) Misangu ya bungi, udi usomba kumpala kua bantu mubatangile. Bana betu ba bakaji kabena benza miyuki mu bisangilu to. Kadi badi babala malu adi bulongolodi buetu bupatule ne baumvuija, anyi badi mua kubienza nansha mu diyukidilangana dia bana betu babidi ba bakaji basombe peshi mu dinaya dia tshilejilu. Biro bia filiale nebilombe umue wa ku bana betu ba bakaji bua kuikalaye ufundilangana ne biro ne bua kutabalela malu a bisangilu. Mu bungi bua matuku, padi bana betu ba balume bafika ku dikumbaja malu malomba, nebangate midimu eyi.

MPUILU YA TSHIJENGU

²⁴ Bisumbu bidi mu tshijengu tshimue bitu bidisangisha bua kuenza mpuilu wa tshijengu wa dituku dimue utu wenzeka misangu ibidi tshidimu tshionso. Mpuilu eyi itu ipetesha muntu yonso disanka ne mushindu wa ‘kunzulula muoyo wende bikole’ kudi bena Kristo bakuabu. (2 Kol. 6:11-13) Bulongolodi bua Yehowa butu bulongolola biena-bualu biangatshila mu Bible, ne bitupa bikuabu bia programe ya mpuilu eyi bua kutuambuluisha mu malu kampanda masunguluke. Mu mpuilu eyi badi benzamu miyuki, manaya a bilejilu, dinayilula malu avua menzeke, didiakuila ne diela bantu nkonko. Malongesha a nunku adi afika pa dîba diawu adi akolesha bantu bonso badi babuelamu. Mu mpuilu eyi, bayidi bapiabapia badi bapeta mushindu wa kubatijibua bua kuleja patoke ne: mbadilambule kudi Yehowa.

MPUNGILU YA REJON

²⁵ Bantemu ba Yehowa batu benza bisangilu bikuabu binene musangu umue ku tshidimu. Pa tshibidilu, mpungilu ya rejon itu yenza matuku asatu ne itu isangisha bisumbu bia mu bijengu bungi kampanda. Filiale idi mikese idi mua kumona ne: mbimpe bua bisumbu bionso bidiyi ilombola bidisangishe kaba kamue. Mu imue miaba badi balongolola mpungilu eyi bilondeshile nsombelu idiku anyi bilondeshile buludiki budi bulongolodi bufila. Ku musangu ne ku musangu batu balongolola mpungilu ya pa buayi anyi ya bantu bafumina mu matunga a bungi; ne Bantemu bavule ba mu matunga mashilashilangane batu babuelamu. Munkatshi mua bidimu, bantu ba bungi mbafike ku diumvua lumu luimpe lua Bukalenge ku diambuluisha dia ngumu mimpe idibu bendeshile bisangilu bia Bantemu ba Yehowa ebi.

²⁶ Mpungilu eyi mbikondo bia disanka bua batendeledi ba Yehowa badi badilambule kudiye bua kumutendelela mu buobumue. Batu bafilamu mumvuija mapiamapia a bulelela. Mu imue mpungilu eyi batu bapatula mikanda mipiamipia bua didilongela ne bua dilonga dia tshisumbu anyi bua kuyisha nayi. Batu kabidi babatizamu bantu. Mpungilu itu ituambuluisha bikole bua kuya kumpala mu nyuma. Idi ileja patoke ne: batendeledi ba Yehowa badi benza dîku dimue dia pa buloba bujima dia bena Kristo badi ne tshimanyinu tshia bayidi ba Yezu Kristo.​—Yone 13:35.

²⁷ Patudi tubuela mu bisangilu bia tshisumbu, mu mpuilu, ne mu mpungilu ya Bantu ba Yehowa, tudi tupeta bukole bua kuenza disua dia Yehowa. Bidi kabidi bitukuba ku ngenyi ya bena panu idi mua kutekesha ditabuja dietu. Bisangilu bionso ebi bidi bipesha Yehowa lumu ne butumbi. (Mis. 35:18; Nsu. 14:28) Tuikalayi tuleja dianyisha bua mudi Yehowa mulongoluele bantu bende bikondo bia kubakolesha mu nyuma mu matuku a ku nshikidilu aa.

DIDIA DIA DILOLO DIA MUKALENGE

²⁸ Musangu umue ku tshidimu dituku dia mufikilu wa lufu lua Yezu Kristo, bisumbu bionso bia Bantemu ba Yehowa ba pa buloba bujima bitu bienza Tshivulukilu tshia lufu lua Kristo anyi Didia dia dilolo dia Mukalenge. (1 Kol. 11:20, 23, 24) Etshi ke tshisangilu tshia mushinga mukole tshia ku tshidimu bua bantu ba Yehowa. Badi batulomba bua katupangidi bua kubuela mu Tshivulukilu to.​—Luka 22:19.

²⁹ Dituku dia Tshivulukilu didi dipetangana ne dituku dia Pasaka utu Bible wakuila, didibu baleje mu Mifundu. (Ekes. 12:2, 6; Mat. 26:17, 20, 26) Pasaka uvua tshivulukilu tshia ku tshidimu tshia tshimuangi tshia bena Isalele mu Ejipitu mu tshidimu tshia 1513 K.Y. Tshidimu atshi, Yehowa wakateka dituku dia 14 dia ngondo wabu wa kumpala bua dikale dituku divuabu ne bua kudia muana wa mukoko wa Pasaka ne kumbuka mu bupika mu Ejipitu. (Ekes. 12:1-51) Batu bafika ku dijadika dituku adi padibu babala matuku 13 kubangila ku dituku didi ngondo ubala pabuipi menemene ne tshikondo tshia ekinokse (tshitu butuku ne munya bule bumue) mu muvu wa luya mu Yelushalema. Pa tshibidilu, Tshivulukilu tshitu tshienzeka mu dituku ditu ngondo tshitonga panyima pa ekinokse eu.

³⁰ Mêyi a Yezu muine adi mu Matayi 26:26-28 adi aleja mudi Tshivulukilu ne bua kuenzeka. Ki ntshibilu tshia mvinyo wandamuka mashi ne diampa diandamuka mubidi wa Yezu to, kadi ndidia dia mu tshimfuanyi didibu badia kudi bantu badi babikidibue bua kuya kukokesha ne Yezu Kristo mu Bukalenge buende mu diulu. (Luka 22:28-30) Bena Kristo bakuabu bonso bakadi badilambule ne bawetu badi banyisha bulelela batu babuela mu Didia dia dilolo dia Mukalenge anu bu babandidi patupu. Patubu babuelamu batu baleja dianyisha bua malu mimpe adi Yehowa Nzambi mulongoluele bantu bonso ku butuangaji bua Muanende Yezu Kristo. Matuku makese kumpala kua Tshivulukilu, batu benza muyuki wa patoke wa pa buawu bua kujula bantu nyota ya kubuela mu tshibilu etshi ne kukankamija badi banyisha bulelela bua kulonga Bible.

³¹ Bantemu ba Yehowa batu bindila bua kubuela mu bisangilu ebi ne disanka dionso. Muomu emu, batu ‘belelangana meji bua kusakangana ku dinanga ne ku bienzedi bimpe.’ (Eb. 10:24) Mupika wa lulamatu udi mudimuke utu ulongolola bisangilu ebi bilondeshile majinga etu a mu nyuma. Batu bakankamija Bantemu ba Yehowa bonso ne bantu badi banyisha bulelela bua kubuela mu bisangilu bidi bienzeka pa tshibidilu ebi bua bibambuluishe. Batendeledi ba Nzambi badi bashala mu buobumue padibu baleja dianyisha ne muoyo mujima bua malu adi bulongolodi bua Yehowa bubalongoluele. Bualu bua mushinga menemene budi ne: tudi tutumbisha Yehowa ne tumupesha lumu.​—Mis. 111:1.