Bible udiku utungunuka ne kushintulula nsombelu webe anyi?
“Nushintuluke, nukudimune meji enu.”—LOMO 12:2.
1-3. a) Mmashintuluka kayi adi pamuapa mua kutukolela bua kuenza panyima pa batismo wetu? b) Biobi bitukolele bua kuenza malubuluka mu mushindu utuvua batekemene, nnkonko kayi itudi mua kudiela? (Tangila bimfuanyi bia ntuadijilu wa tshiena-bualu.)
MUNKATSHI mua bidimu bia bungi, Kevin uvua unaya manaya a mfranga, unua makanya, ukuatshika maluvu bikole ne unua diamba.[1] (Tangila note ku ndekelu.) Pashishe wakalonga malu a Yehowa ne kujingaye bua kulua mulunda wende. Kadi bua kulua mulunda wa Nzambi, uvua ne bua kushintulula nsombelu wende bikole. Wakafika ku dishintuluka ku diambuluisha dia Yehowa ne dia bukole bua Bible, Dîyi diende.—Ebelu 4:12.
2 Kevin mumane kutambula, uvua anu ne bua kutungunuka ne kushintulula bumuntu buende bua kulua muena Kristo muimpe. (Efeso 4:31, 32) Tshilejilu, uvua ukuata tshiji lukasa. Biakamukemesha bikole pakamonaye ne: bivua bimukolele bua kumanya mua kukanda tshiji tshiende. Kevin wakamona ne: kumanya mua kukanda tshiji tshiende kuvua kukole menemene kupita kulekela malu mabi avuaye wenza kumpala kua kutambula. Kadi wakafika ku dishintuluka pavuaye mulombe Yehowa diambuluisha ne mulonge Bible bikole.
3 Kumpala kua tuetu kutambula, ba bungi ba kutudi bavua ne bua kuenza mashintuluka manene mu nsombelu wabu bua kuikala ne nsombelu udi mu diumvuangana ne tshidi Bible wamba. Kadi nansha mpindieu, tudi tumona ne: kudi mashintuluka makese atudi ne bua kuenza mu nsombelu wetu bua kuidikija Nzambi ne Kristo. (Efeso 5:1, 2; 1 Petelo 2:21) Tshilejilu, tudi mua kumona ne: tudi tudiabakena bikole, tutshina bantu, tuakula bibi bua bantu bakuabu misangu ya bungi anyi bikale ne butekete bukuabu. Imue misangu tudi mua kuikala badienzeje munkatshi mua bidimu bia bungi bua kushintuluka, kadi tutshidi tutungunuka ne kuenza bilema bia muomumue. Nunku tudi mua kudiebeja ne: ‘Bua tshinyi mbikole menemene bua meme kuenza mashintuluka makese aa? Ntshinyi tshindi ne bua kuenza bua kutumikila tshidi Bible wamba bua kutungunuka ne kuakaja bumuntu buanyi?’
UDI MUA KUSANKISHA YEHOWA
4. Bua tshinyi mbikole bua tuetu kusankisha Yehowa mu bualu buonso butudi tuenza?
4 Tudi banange Yehowa ne basue kumusankisha ne muoyo wetu mujima. Kadi bia dibungama, katuena mua kumusankisha misangu yonso to, bualu tudi bapange bupuangane. Tutu misangu ya bungi tudiumvua bu mupostolo Paulo wakamba ne: “Dijinga didiku, kadi tshiena ne bukole bua kuenza tshidi tshimpe.”—Lomo 7:18; Yakobo 3:2.
5. a) Mmashintuluka kayi atuvua benze kumpala kua kutambula? b) Mmatekete kayi atudi pamuapa tutungunuka ne kuluisha?
5 Kumpala kua tuetu kubuela mu tshisumbu tshia bena Kristo, tuvua ne bua kulekela kuenza malu adi Yehowa mukine. (1 Kolinto 6:9, 10) Kadi tutshidi anu bapange bupuangane. (Kolosayi 3:9, 10) Nunku tudi tutungunuka ne kuenza bilema nansha tuetu batambule kukadi bidimu bia bungi. Ku musangu ne ku musangu, tudi mua kuikala ne majinga mabi ne meji mabi anyi bidi mua kutukolela bua kumbusha butekete kampanda butudi nabu. Tudi mua kuikala tuluangana ne butekete bumue bumue abu munkatshi mua bidimu bia bungi.
6, 7. a) Ntshinyi tshidi tshituambuluisha bua kuikala balunda ba Yehowa nansha mutudi bena mibi? b) Bua tshinyi katuena ne bua kulekela kulomba Yehowa bua atufuile luse?
6 Nansha mutudi bapange bupuangane, tudi anu mua kutungunuka ne kuikala balunda ba Yehowa ne kumuenzela mudimu. Ikala uvuluka misangu yonso mushindu uuvua mulue mulunda wa Yehowa. Yeye ke uvua mumone malu mimpe munda muebe ne musue bua umumanye. (Yone 6:44) Nzambi uvua kabidi mumanye ne: udi muena mibi, udi ne matekete ne uvua ne bua kutungunuka ne kuenza bilema. Kadi Yehowa wakitaba anu bua ulue mulunda wende.
7 Yehowa uvua mutunange bikole, ke bualu kayi wakatupesha dipa dia mushinga mukole. Wakatuma Muanende Yezu pa buloba bua afile muoyo wende bu tshia kupikula natshi mibi yetu. (Yone 3:16) Patudi tuenza tshilema kampanda, tudi mua kulomba Yehowa bua atufile luse. Ku diambuluisha dia mulambu wa tshia kupikula natshi, tudi bajadike ne: Nzambi neatufile luse ne netuikale anu balunda bende. (Lomo 7:24, 25; 1 Yone 2:1, 2) Tuvuluka ne: Yezu uvua mufue bua benji ba malu mabi badi banyingalala. Nansha tuetu tumona ne: tshitudi benze ntshibi menemene, katuena ne bua kulekela kulomba Yehowa bua atufuile luse to. Tuetu balekele kumulomba luse, nebikale anu bu tudi tubenga bua kuowa mâyi ku bianza pabi bikale ne manyanu. Tudi ne disanka dia bungi bua mudi Yehowa muenze bua tulue balunda bende nansha mutudi bena mibi.—Bala 1 Timote 1:15.
Tuetu basue kusemena pabuipi ne Yehowa, tudi ne bua kutungunuka ne kudienzeja bua kumuidikija yeye ne Muanende
8. Bua tshinyi katuena ne bua kupepeja matekete etu?
8 Bulelela, katuena ne bua kupepeja matekete atudi nawu anyi kutungunuka ne kudibingisha bua matekete au to. Yehowa mmutuleje mushindu udi bantu badiye musue kudia nabu bulunda ne bua kuikala. (Musambu 15:1-5) Nunku tuetu basue kusemena pabuipi nende, tudi ne bua kutungunuka ne kudienzeja bua kumuidikija yeye ne Muanende. Tudi kabidi ne bua kudienzeja bua kukandamena majinga etu mabi anyi mene kumbusha amue a kudiwu. Nansha tuetu batambule kukadi bidimu bia bungi, tudi ne bua kutungunuka ne kuakaja bumuntu buetu.—2 Kolinto 13:11.
9. Mmunyi mutudi bamanye ne: tudi mua kutungunuka ne kuvuala bumuntu bupiabupia?
9 Mupostolo Paulo wakambila bena Kristo ne: “Nudi ne bua kumbusha bumuntu bua kale, budi bupetangana ne bikadilu bienu bia kale ne budi bunyanguka bilondeshile majinga abu adi ashimangana. Nudi ne bua kutungunuka ne kuvuijibua bapiabapia mu bukole budi bulombola meji enu, ne nudi ne bua kuvuala bumuntu bupiabupia buvua bufukibue bilondeshile disua dia Nzambi mu buakane ne lulamatu bia bushuwa.” (Efeso 4:22-24) Bualu ebu budi buleja ne: tudi ne bua kutungunuka ne kuenza madikolela bua kushintuluka ne “kuvuala bumuntu bupiabupia.” Nunku nansha tuetu tuenzela Yehowa mudimu kukadi bidimu bia bungi, tudi misangu yonso mua kulonga malu a bungi pa bidi bitangila ngikadilu yende. Bible udi mua kutuambuluisha bua kutungunuka ne kushintulula bumuntu buetu bua kumuidikija.
BUA TSHINYI MBIKOLE MENEMENE?
10. a) Ntshinyi tshitudi ne bua kuenza bua kutungunuka ne kuenza mashintuluka ku diambuluisha dia Bible? b) Nnkonko kayi itudi ne bua kudiela?
10 Tuetu bonso tudi basue kutumikila tshidi Bible wamba. Kadi tudi ne bua kudienzeja bikole tuetu basue kutungunuka ne kushintuluka. Bua tshinyi tudi ne bua kuenza madikolela a mushindu eu? Yehowa kenaku mua kuenza bua bikale bipepete bua tuetu kuenza malu mimpe anyi?
11-13. Bua tshinyi Yehowa mmutekemene bua tudienzeje bikole bua kutantamena matekete etu?
11 Patudi tuela meji bua tshibuashibuashi ne bionso bidimu, tudi tumona kakuyi mpata ne: Yehowa udi ne bukole bua kuenza bualu kayi buonso. Tshilejilu, mmufuke dîba didi ne bukole bua bungi. Ku kasunsa kuonso, dîba ditu difila butoke ne luya bipite bungi. Kadi, bua muoyo kuikalawu pa buloba, buloba budi dijinga ne luya lukese ne butoke bukese. (Musambu 74:16; Yeshaya 40:26) Yehowa udi upesha kabidi batendeledi bende ba pa buloba bukole padibu nabu dijinga. (Yeshaya 40:29) Bidi bimueneka ne: Yehowa yeye musue, udi mua kuenza bua bikale bipepele menemene bua tuetu kutshimuna matekete etu ne kulekela majinga mabi. Kadi bua tshinyi kena wenza nanku?
12 Yehowa mmutufuke ne budikadidi bua kudisunguila malu. Mmulekele bua tudisunguile bua kumutumikila anyi kubenga kumutumikila. Patudi tusungula bua kumutumikila ne tudienzeja bua kuenza disua diende, tudi tuleja ne: tudi bamunange ne tudi basue kumusankisha. Bilondeshile Satana, Yehowa kena ne bukenji bua kukokesha to. Kadi patudi tutumikila Yehowa, tudi tuleja ne: tudi basue bua ikale Mukokeshi wetu. Tudi ne bua kuikala bajadike ne: Tatu wetu wa dinanga udi wangata madikolela onso atudi tuenza bua kumutumikila ne mushinga. (Yobo 2:3-5; Nsumuinu 27:11) Patudi tudienzeja bua kukandamena matekete etu nansha padibi bikole, tudi tuleja mutudi ne lulamatu kudi Yehowa ne basue bua ikale Mukokeshi wetu.
13 Yehowa udi utuambila ne: tudi ne bua kudienzeja bikole bua kuidikija ngikadilu yende. (Kolosayi 3:12; bala 2 Petelo 1:5-7.) Mmutekemene kabidi bua tudienzeje bua kukanda meji etu ne mutudi tudiumvua. (Lomo 8:5; 12:9) Misangu yonso itudi tudienzeja bua kushintuluka mu nsombelu wetu ne tupatula bipeta bimpe, tudi tumvua disanka dia bungi.
ENZA BUA DÎYI DIA NZAMBI DITUNGUNUKE NE KUKUSHINTULULA
14, 15. Ntshinyi tshitudi mua kuenza bua kupeta ngikadilu idi Yehowa munange? (Tangila kazubu ka ne: “Bible ne disambila mbishintulule nsombelu wabu.”)
14 Ntshinyi tshitudi ne bua kuenza bua kuikala ne ngikadilu idi Yehowa munange? Pamutu pa tuetu kudisunguila tshitudi basue kushintulula mu nsombelu wetu, tudi ne bua kulekela Nzambi utulombola. Lomo 12:2 udi wamba ne: “Lekelayi kuidikija malu a mu ndongoluelu wa malu eu, kadi nushintuluke, nukudimune meji enu bua nudijadikile nuenu nkayenu disua dia Nzambi didi dimpe, didi dianyishibue ne didi dipuangane.” Nunku bua kumanya tshidi Yehowa musue, tudi ne bua kueyemena diambuluisha didiye mutulongoluele. Tudi ne bua kubala Bibe dituku dionso, kuelangana meji pa bitudi tubala ne kulomba Yehowa bua atupeshe nyuma wende muimpe. (Luka 11:13; Galatiya 5:22, 23) Mu mishindu eyi, Yehowa udi mua kutuambuluisha bua kumanya tshidi tshimusankisha, ne tudi mua kulonga mua kuela meji mudiye wela meji. Dîba adi, malu atudi tuela meji, atudi tuamba ne tuenza neasankishe Yehowa bikole, ne netumanye mua kukandamena matekete atudi nawu. Kadi nansha nanku, netutungunuke anu ne kualuisha.—Nsumuinu 4:23.
Sangisha biena-bualu bia mu mikanda yetu anyi mvese ya mu Bible biakuambuluisha bua kuluisha matekete ebe, ne bibalulula misangu ne misangu (Tangila tshikoso tshia 15)
15 Pa kumbusha kubala Bible dituku dionso, tudi ne bua kumulonga ku diambuluisha dia mikanda yetu bu mudi Tshibumba tshia Nsentedi ne Réveillez-vous! Biena-bualu bia bungi bia mu bibejibeji ebi bidi bitulongesha mutudi mua kuidikija ngikadilu ya Yehowa ne kuluisha matekete atudi nawu. Tudi mua kupeta biena-bualu kampanda anyi mvese bidi mua kutuambuluisha bikole. Tudi mua kusangisha mvese eyi ne biena-bualu ebi bua kubibalulula ku musangu ne ku musangu.
16. Bua tshinyi katuena ne bua kuteketa mu maboko tuetu katuyi bakumbane bua kuenza mashintuluka ne lukasa?
16 Bidi biangata dîba dia bungi bua kulonga mua kuidikija ngikadilu ya Yehowa. Wewe mumone ne: kuena muanji kuenza mashintuluka a bungi bu muuvua musue, ikala ne lutulu. Ku ntuadijilu, udi mua kujinga bua kudienzeja bua kuenza tshidi Bible wamba. Kadi paudi wela meji ne wenza malu mu mushindu udi Yehowa musue, nebilue bipepele bua wewe kuela meji mu mushindu udi Nzambi wela meji ne kuenza malu makane.—Musambu 37:31; Nsumuinu 23:12; Galatiya 5:16, 17.
ELA MEJI BUA MALU MIMPE ATUAPETA MU MATUKU ATSHILUALUA
17. Tuetu ne lulamatu kudi Yehowa, mmalu kayi mimpe atudi ne bua kutekemena matuku atshilualua?
17 Tudi bindile ne muoyo kuulu kuulu tshikondo tshituikala bapuangane ne tuenzela Yehowa mudimu bua kashidi. Tshikondo atshi, katuakuikala dijinga ne kuluisha butekete nansha bumue to, ne nebikale bipepele bua tuetu kuidikija Yehowa. Kadi nansha mpindieu tudi bakumbane bua kutendelela Yehowa bualu mmutupeshe dipa dia mulambu wa tshia kupikula natshi. Nansha mutudi bapange bupuangane, tudi mua kumusankisha tuetu batungunuke ne kudienzeja bua kushintuluka ne batumikile malu adiye utulongesha mu Bible.
18, 19. Ntshinyi tshidi tshitujadikila ne: Bible udi ne bukole bua kutungunuka ne kushintulula nsombelu wetu?
18 Kevin wakenza muende muonso bua kumanya mua kukanda tshiji tshiende. Wakelangana meji pa malu avuaye ubala mu Bible ne kudienzeja bua kushintulula nsombelu wende. Wakatumikila kabidi mibelu ivua bena Kristo nende bamupeshe. Nansha muvuabi biangate Kevin ndambu wa bidimu bua kushintuluka, wakalua musadidi wa mudimu mu kupita kua matuku ne udi mukulu kukadi bidimu 20. Kadi nansha mpindieu, mmumanye ne: udi ne bua kutungunuka ne kuluisha matekete ende.
19 Anu bu Kevin, tudi mua kutungunuka ne kuakaja bumuntu buetu. Tuetu benze nunku, netutungunuke ne kusemena pabuipi ne Yehowa. (Musambu 25:14) Patudi tuenza muetu muonso bua kushintuluka bua kusankisha Yehowa, neatuambuluishe bua kupatula bipeta bimpe. Tudi mua kuikala bajadike ne: tudi mua kutungunuka ne kushintuluka mu nsombelu wetu ku diambuluisha dia Bible.—Musambu 34:8.
^ [1] (tshikoso tshia 1) Tudi bashintulule dîna.