Bantemu ba Yehowa badi bungi kayi pa buloba bujima?

Mmushindu kayi uutu ubala bungi bua Bantemu ba Yehowa?

Anu Bantemu ba Yehowa batu bayisha lumu luimpe lua Bukalenge ngondo yonso ke batutu tubala. (Matayi 24:14) Mu bobu emu mudi bambi ba lumu luimpe bakadi babatijibue ne badi kabayi banji kubatijibua.

Muntu udi ne bua kufila makuta bua kumubalabu bu Ntemu anyi?

Tòo. Makuta adi afidibua kaena afidibua bua muntu kubadibuaye bu Ntemu wa Yehowa anyi bua kupetaye midimu kampanda mu bulongolodi buetu to. (Bienzedi 8:18-20) Bushuwa, bantu badi bafila mapa mine au kabatu bamanyisha mêna abu to. Ntemu yonso utu ufila dîba diende, makanda ende ne bintu anyi makuta ende bua mudimu wetu wa buloba bujima bilondeshile dijinga diende ne nsombelu wende.​—2 Kolinto 9:7.

Mmushindu kayi uutu umanya bungi bua Bantemu badi bayisha ngondo yonso?

Ntemu yonso utu ufila luapolo luende lua mudimu wa kuyisha mu tshisumbu tshidiye ngondo yonso. Luapolo elu lutu lufidibua ku budisuile.

Batu basangisha luapolo ya bisumbu bionso bayitumina Betele udi ubitangila. Betele utu utuma bungi busanga bua luapolo ayi bua ditunga dijima anyi teritware ku biro bietu binene bia buloba bujima.

Ku ndekelu kua tshidimu tshionso tshia mudimu,a batu bajadika bungi bua Bantemu mu ditunga ne ditunga munda mua tshidimu atshi tshijima. Batu batutakaja nomba yonso ayi pamue bua kupeta bungi bua Bantemu pa buloba bujima. Luapolo mikuabu yonso ya mu ditunga ne ditunga idi mu tshitupa tshia “Pa buloba bujima” mu site wetu. Luapolo eyi itu itukankamija anu bu muvua luapolo ya muomumue mikankamije bena Kristo ba kumpala.​—Bienzedi 2:41; 4:4; 15:3.

Utu ubala bantu batu badisangisha netu badi kabayi bayisha anyi?

Nansha mutudi katuyi tubabala mu bungi bua Bantemu, tutu tubakidila mu bisumbu bietu. Ba bungi ba kudibu batu babuela mu Tshivulukilu tshia lufu lua Kristo, nunku tutu tumanyaku bungi buabu ku dishilangana ditu dimueneka pankatshi pa bantu badi babuele mu tshibilu etshi ne bungi bua Bantemu. Mu 2015, bantu bavua babuele mu Tshivulukilu bavua 19 862 783.

Bantu ba bungi batu kabayi babuela mu bisangilu tutu ne tshibidilu tshia kubalongeshila Bible ku mbanza yabu. Mu tshidimu tshia 2015, bua bungi bua malonga a Bible atuvua balombole, bivua bienze bu ne: ku ngondo yonso tuvua tulombola malonga 9 708 968. Tuvua tulonga ne bamue bantu mu tshisumbu pamue dîba dimue.

Bua tshinyi bungi bua Bantemu bunudi nuenu babadike mbushadile ku budi mbulamatadi nabu?

Biro bia mbulamatadi bia dibadika bantu batu ne tshibidilu tshia kuebeja bantu bua babambile tshitendelelu tshidibu. Tshilejilu, bena mu biro bia mbulamatadi bia dibadika bantu bia mu États-unis badi bamba ne: pavuabu bela nkonko, “bavua bakeba bua kumanya bikala bantu bavua bandamuna bavua ba mu tshitendelele kampanda,” ne bungi buvuabu bapeta buvua bulondesha “mandamuna a bantu kabuyi ne bijadiki bilelela to.” Kadi tuetu tudi tubala anu Bantemu ba Yehowa badi bayisha bantu ne bafila luapolo luabu lua mudimu. Katuena tubala aba badi bamba anu ne: mBantemu to.