Tudi bantu ba Yehowa

1. Bua tshinyi Yehowa mmukumbane bua kuikala muena bionso? (Tangila tshimfuanyi tshia ntuadijilu tshia tshiena-bualu.)

BINTU bionso mbia Yehowa! Yeye ke muena “diulu, nansha diulu dia mu diulu, ne buloba ne bionso bidipu.” (Dut. 10:14; Buak. 4:11) Nunku, bantu bonso mba Yehowa bualu yeye ke udi mubafuke. (Mis. 100:3) Kadi katshia Yehowa wafuka bantu, mmusungule bamue bua bikale bantu bende mu mushindu wa pa buawu.

2. Mbantu kayi badi Bible wamba ne: mbantu ba Yehowa ba pa buabu?

² Tshilejilu, Misambu 135 udi wamba bua batendeledi ba lulamatu ba Yehowa ba mu Isalele wa kale ne: bavua “tshisamba tshiende tshia pa buatshi.” (Mis. 135:4) Mukanda wa Hoshea ukavua pawu mumanyishe ne: bantu bavua kabayi bena Isalele bavua ne bua kulua bantu ba Yehowa. (Hosh. 2:23) Mêyi a buprofete a Hoshea aa akakumbana pavua Yehowa musungule bantu bavua kabayi bena Yuda bua balue pabu kukokesha ne Kristo mu diulu. (Bien. 10:45; Lomo 9:23-26) “Tshisamba tshia tshijila” etshi ‘ntshintu tshia pa buatshi’ tshia Yehowa tshidi ne bantu bedibue manyi a nyuma muimpe ne basungula bua kuikala ne muoyo mu diulu. (1 Pet. 2:9, 10) Kadi netuambe tshinyi bua bena Kristo ba lulamatu badi ne ditekemena dia kuikala ne muoyo pa buloba? Yehowa udi kabidi ubabikila ne: “bantu” bende ne “basungula” bende.​—Yesh. 65:22.

3. a) Mbanganyi badi mu malanda mimpe ne Yehowa lelu? b) Netukonkonone tshinyi mu tshiena-bualu etshi?

³ Lelu bena mu “kasumbu kakese ka mikoko,” badi ne ditekemena dia kuya mu diulu, ne bena mu tshisumbu tshia “mikoko mikuabu,” badi ne ditekemena dia kuikala ne muoyo pa buloba, badi benza “tshisumbu tshimue” tshia bantu badi Yehowa munange bikole. (Luka 12:32; Yone 10:16) Bushuwa, tudi basue kuleja Yehowa dianyisha dia bungi bua mudiye mutuanyishile bua kudia nende malanda mimpe nunku. Tshiena-bualu etshi netshituleje mishindu ya bungi itudi mua kuleja Yehowa dianyisha bua mudiye mutupeshe diakalenga dia pa buadi edi.

TUDI TUDILAMBULA KUDI YEHOWA

4. Ngumue mushindu kayi utudi mua kuleja Yehowa dianyisha bua mudiye muenze bua tudie nende malanda? Mmunyi muvua Yezu mumuleje pende dianyisha?

⁴ Tudi tuleja Yehowa dianyisha patudi tudilambula kudiye ne muoyo mujima. Patudi tubatijibua mu mâyi, tudi tuitabuja ne tuleja bantu bonso ne: tudi bantu ba Yehowa ne tudi basue kumukokela. (Eb. 12:9) Ke tshiakenza Yezu pakabatijibuaye, wakambila Yehowa ne: “Kuenza disua diebe, Nzambi wanyi, ke dijinga dianyi.” (Mis. 40:7, 8, dim.) Yezu wakadifila bua kuenza disua dia Yehowa nansha muvuaye muledibue mu tshisamba tshikavua tshidilambule kudi Nzambi.

5, 6. a) Mmunyi muvua Yehowa mumvue pavua Yezu mubatijibue? b) Fila tshilejilu tshidi tshileja ne: Yehowa udi usanka patudi tudilambula kudiye nansha mudiye muena bionso.

⁵ Mmunyi muvua Yehowa mumvue pavua Yezu mubatijibue? Bible udi wamba ne: “Yezu mumane kubatijibua, wakajuka diakamue mu mâyi; ne monayi! diulu diakabululuka, yeye kumona nyuma wa Nzambi upueka bu nyunyi wa nkutshi, ulua pambidi pende. Monayi! Dîyi diakafuma kabidi mu diulu diamba ne: ‘Eu udi Muananyi, munanga, undi muanyishe.’” (Mat. 3:16, 17) Nansha mukavua Yezu mu malanda makole ne Tatu wende wa mu diulu, Yehowa wakasanka bua kumona muvua Muanende ne dijinga dia kuenza anu disua diende. Bia muomumue, patudi tudilambula kudi Yehowa, udi usanka ne neatubeneshe.​—Mis. 149:4.

⁶ Tshilejilu, fuanyikijabi ne: tatu kampanda mmukune matala mu budimi. Dimue dituku, muanende wa bakaji udi upuola ditala ne udipesha tatuende bu dipa. Ditala adi kadivua konso eku dia tatuende anyi? Mmunyi mudi muana au mua kuangata tshintu tshia tatuende ne kumupeshatshi bu dipa? Tatu muimpe kakudiela nansha nkonko eyi to. Kadi neitabe dipa adi ne disanka bualu didi dileja mudi muanende mumunange. Neanyishe bikole ditala dimue didi muanende mumupeshe adi kupita matala makuabu onso adi mu budimi. Yehowa udi usanka bikole patudi tudilambula anu kudiye ne muoyo mujima.​—Ekes. 34:14.

7. Mmunyi muvua Malaki muleje mudi Yehowa udiumvua bua bantu bamuenzela ku budisuile?

⁷ Bala Malaki 3:16. Biwikala kuyi muanji kudilambula ne kubatijibua, konkonona mushinga wa dienza malu aa. Mbushuwa se: ukavua muntu wa Yehowa katshia anu ku dituku diwakimitshibua. Elabi meji bungi bua disanka dikala nadi Yehowa pawadilambula kudiye bua kuenza disua diende, uleja muudi witaba bumfumu buende. (Nsu. 23:15) Yehowa pende udi wanyisha bantu badi bamuenzela mudimu ku budisuile, ne udi ufunda mêna abu mu “mukanda [wende] wa tshivulukilu.”

8, 9. Ntshinyi tshidi Yehowa ulomba bantu badiye mufunde mêna mu “mukanda [wende] wa tshivulukilu”?

⁸ Bua Yehowa kufunda dîna dietu mu “mukanda [wende] wa tshivulukilu,” kudi amue malu atudi ne bua kuenza. Malaki uvua muleje bimpe ne: tudi ne bua ‘kutshina Yehowa ne kuelangana meji a dîna diende.’ Tuetu batendelele muntu mukuabu anyi tshintu tshikuabu pamutu pa kutendelela Yehowa, Yehowa neakupule dîna dietu mu mukanda wende wa muoyo.​—Ekes. 32:33; Mis. 69:28.

⁹ Nunku, didilambula dietu kudi Yehowa kadiena anu diumvuija patupu kumulaya bua kuenza disua diende ne kubatijibua mu mâyi to. Aa mmalu atudi tuenza musangu umue kujika, kadi kushala ku luseke lua Yehowa bu bantu bende kudi kulomba kutungunuka ne kumutumikila too ne mutuafua, mmumue ne: mpindieu ne mu matuku atshilualua.​—1 Pet. 4:1, 2.

TUDI TUBENGA MAJINGA A PA BULOBA

10. Ndishilangana kayi didi ne bua kumueneka patoke pankatshi pa bantu badi benzela Yehowa mudimu ne badi kabayi bamuenzelawu?

¹⁰ Mu tshiena-bualu tshishale tuvua bakonkonone muyuki wa mu Bible wa Kayina, wa Solomo, ne wa bena Isalele. Buonso buabu bavua bamba muvuabu batendelela Yehowa, kadi mu bulelela, kabavua bamulamate anu yeye to. Bilejilu ebi bidi bileja patoke ne: bantu ba Yehowa ba bushuwa badi ne bua kulamata ku buakane ne muoyo mujima ne kukina malu mabi. (Lomo 12:9) Mbikumbane nanku bualu Malaki mumane kuakula bua “mukanda wa tshivulukilu,” Yehowa wakalua kuakula bua “dishilangana pankatshi pa muntu muakane ne muntu mubi, pankatshi pa muntu udi wenzela Nzambi mudimu ne udi kayi umuenzela mudimu.”​—Mal. 3:18.

11. Bua tshinyi mbimpe bakuabu bamone mutudi balamate anu Yehowa nkayende?

¹¹ Tumonayi mushindu mukuabu utudi mua kuleja Yehowa dianyisha bua mudiye mutusungule bua tuikale bantu bende. Mbimpe “bantu bonso bamone patoke” mutudi tuya kumpala mu nyuma. (1 Tim. 4:15; Mat. 5:16) Diebeja ne: ‘Bantu bakuabu batuku bamona ne: ndi mulamate Yehowa ne muanyi muonso anyi? Ntuku nkeba mpunga bua kudimanyisha mundi Ntemu wa Yehowa anyi?’ Yehowa neabungame bikole tuetu tumvua bundu bua kuambila bantu bakuabu ne: tudi bantu bende, pende mumane kutusungula bua tuikale bantu bende.​—Mis. 119:46; bala Mâko 8:38.

12, 13. Mmunyi mudi bamue Bantemu ba Yehowa bapangishe bakuabu bua kubatapulula ne bena panu?

¹² Bia dibungama, bamue Bantemu badi bidikija “nyuma wa pa buloba.” Nunku, ki mbashilangane menemene ne bantu badi kabayi batendelela Yehowa to. (1 Kol. 2:12) Nyuma eu udi ukolesha ‘majinga a mubidi wa muntu.’ (Ef. 2:3) Tshilejilu, nansha mukadibu bafile mibelu njila ne njila bua mvuadilu ne didilengeja, bamue bena Kristo batshidi anu basue kuvuala ne kudilengeja kabayi ne bupuekele. Badi bavuala bilamba bibakuate bikole ne bidi bileja mubidi, balua nabi too ne mu masangisha a bena Kristo. Anyi mbasungule mishindu mibi ya dilukisha nsuki ne diyikosesha. (1 Tim. 2:9, 10) Nunku padibu mu bantu, mbikole bua kutapulula bantu ba Yehowa ne ‘balunda ba malu a panu.’​—Yak. 4:4.

¹³ Mu mishindu mikuabu, bamue Bantemu ki mbalekele bibidilu bia bena panu ne muoyo mujima to. Mushindu udibu baja maja ne benza malu mu mafesto ki mmukumbanyine bena Kristo to. Foto yabu idibu bela miaba ya kupetelangana ya ku Enternete ne malu adibu bafundamu, bidi bileja ne: ki mbantu ba mu nyuma to. Pamuapa ki mbabanyoke mu tshisumbu bua mpekatu munene to, kadi badi mua kunyanga bena Kristo nabu badi badienzeja bua kuikala ne bikadilu bimpe munkatshi mua bantu ba Yehowa.​—Bala 1 Petelo 2:11, 12.

14. Mmalu kayi atudi ne bua kuenza bituikala basue kukuba bulunda bua pa buabu butudi badie ne Yehowa?

¹⁴ Tshintu tshionso tshia panu ntshienza bua kutusaka bua tuimanyine pa “majinga a mubidi, majinga a mêsu, ne kuleja bintu bia mu nsombelu ne lutambishi.” (1 Yone 2:16) Kadi bu mutudi bantu ba Yehowa, mbatudimuije bua “kulekela malu adi kaayi a Nzambi ne majinga a panu ne bua kuikala ne meji majalame ne buakane ne dilamata Nzambi munkatshi mua ndongoluelu wa malu udiku eu.” (Tito 2:12) Ngakuilu wetu, mushindu utudi tudia ne tunua, mvuadilu ne didilengeja dietu, ne bikadilu bietu ku mudimu, mu tshikoso, malu onso atudi tuenza adi ne bua kuleja bakuabu ne: tudi balamate anu Yehowa nkayende.​—Bala 1 Kolinto 10:31, 32.

TUDI ‘BANANGANGANE BIKOLE’

15. Bua tshinyi tudi ne bua kuenzela bena Kristo netu malu ne bulenga ne dinanga?

¹⁵ Mushindu utudi tuenzela bena Kristo netu malu udi uleja dianyisha ditudi nadi bua mutudi badie bulunda bua pa buabu ne Yehowa. Bobu pabu mbantu ba Yehowa. Tuetu balame bualu ebu mu lungenyi, netuikale anu tubenzela malu ne bulenga ne dinanga. (1 Tes. 5:15) Yezu wakambila bayidi bende ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”​—Yone 13:35.

16. Ntshilejilu kayi tshia mu Mikenji ya Mose tshidi tshileja mudi Yehowa udiumvua bua bantu bende?

¹⁶ Bua kumvuija mutudi ne bua kuenzelangana malu mu tshisumbu, tukonkononayi bualu budi bulonda ebu. Bintu bivuabu benza nabi mudimu mu ntempelo wa Yehowa bivua bijidila anyi biteka ku luseke anu bua ntendelelu mukezuke. Mikenji ya Mose ivua mileje ne mu katoba mua kuenza nabi mudimu, muntu uvua wenza nabi mudimu bibi bavua bamushipa. (Nom. 1:50, 51) Bu muvua Yehowa ukuba bintu bia tshianana ebi bivuabu benza nabi mudimu mu ntendelelu wende ne mukawu wonso, kakupanga kukuba batendeledi bende ba lulamatu badi badilambule kudiye badiye musungule bu bantu bende nansha kakese to! Umue musangu uvua Yehowa wakula ne bantu bende, wakabambila ne: “Muntu yonso udi ukulenga udi ulenga kamonyi ka dîsu dianyi.”​—Zek. 2:8.

17. Yehowa udi “uteya ntema ne uteleja” malu kayi?

¹⁷ Malaki uvua muleje ne: Yehowa udi “uteya ntema ne uteleja” padi bantu bende benzelangana malu. (Mal. 3:16) Bushuwa, Yehowa “mmumanye badi bende.” (2 Tim. 2:19) Mmumanye bimpe bualu buonso butudi tuenza ne tuamba. (Eb. 4:13) Patudi katuyi tuenzela bena Kristo netu malu malenga, Yehowa udi “uteya ntema ne uteleja.” Patudi tuakidila benyi, tupeshangana bintu, tufuilangana luse, ne tuenzelangana malu ne bulenga, tuikale bashindike ne: Yehowa udi umona malu onso au kabidi.​—Eb. 13:16; 1 Pet. 4:8, 9.

“YEHOWA KAKUBENGA BANTU BENDE” TO

18. Mmunyi mutudi mua kuleja dianyisha bua diakalenga ditudi nadi dia kuikala bantu ba Yehowa?

¹⁸ Kakuyi mpata, tudi basue kuleja Yehowa dianyisha bua diakalenga ditudi nadi dia kuikala bantu bende. Tudi bamanye ne: patudi badilambule kudiye, bitabe bua kuikala bantu bende, tudi benze bualu bua meji. Nansha mututshidi “munkatshi mua bantu ba tshipungu etshi tshibi tshidi tshikonyangale,” tudi basue bua bantu bamone ne: ‘katuena ne tshintu tshidibu mua kutubanda natshi, . . . tudi tukenka bu miendu panu.’ (Filip. 2:15) Tudi badisuike bua kubenga kuenza bualu buonso budi Yehowa mukine. (Yak. 4:7) Tudi kabidi banange bena Kristo netu ne tubanemeka, bamanye ne: bobu pabu mbantu ba Yehowa.​—Lomo 12:10.

19. Mmunyi mudi Yehowa ufuta bantu bende?

¹⁹ Bible udi ulaya ne: “Yehowa kakubenga bantu bende” to. (Mis. 94:14) Nansha bualu bua mushindu kayi mua kutukuata, kabuakupangisha mulayi eu bua kukumbanawu to. Nansha lufu mene kaluena mua kupangisha Yehowa bua kutunanga to. (Lomo 8:38, 39) “Tuetu ne muoyo, tudi nawu bua Yehowa, ne tuetu bafue, tudi tufua bua Yehowa. Nunku nansha tuetu ne muoyo anyi tuetu bafue, tudi bantu ba Yehowa.” (Lomo 14:8) Tudi bindile ne muoyo kuulu kuulu dituku diabisha Yehowa balunda bende bonso ba lulamatu badi bafue. (Mat. 22:32) Nansha mpindieu, tudi ne mabenesha a bungi. Bible udi wamba ne: “Tshisamba tshia diakalenga ntshidi Nzambi watshi muikale Yehowa, bantu badiye musungule bu tshintu tshiende yeye.”​—Mis. 33:12.