Nsongalume umona mudi bantu babuela mu Nzubu wa Bukalenge

NKONKO IDI BANSONGA BADIELA

Bua tshinyi mbimpe kubuela mu bisangilu ku Nzubu wa Bukalenge?

Misangu ibidi lumingu luonso, Bantemu ba Yehowa batu benza bisangilu miaba itubu batendelela, idibu babikila ne: Nzubu ya Bukalenge. Tshitu tshienzekaku ntshinyi? Kubuela mu bisangilu abi kudi mua kukuambuluisha mushindu kayi?

Tshitu tshienzeka ku Nzubu wa Bukalenge ntshinyi?

Nzubu wa Bukalenge mmuaba udi bantu baya bua kulonga mua kuteka malu adi Bible ulongesha mu tshienzedi. Bisangilu bidibu benza muntu amu bidi mua kukuambuluisha bua:

kulonga bulelela budi butangila Nzambi.
kujingulula tshidi malu adi enzeka lelu umvuija.
kulua muntu wa nsongo menemene.
kupeta balunda bimpe menemene.

Utu mumanye anyi? Muaba utu Bantemu ba Yehowa benzela bisangilu batu bawubikila ne: Nzubu wa Bukalenge bualu batu batamba kuakulamu bua Bukalenge bua Nzambi.—Matayi 6:9, 10; 24:14; Luka 4:43.

Bua tshinyi mbimpe kubuela mu bisangilu?

Malu adibu balongeshamu neakuambuluishe. Mêyi manene a mu Bible adibu balongesha mu bisangilu bia Bantemu ba Yehowa neakuambuluishe bua ‘kupeta meji.’ (Nsumuinu 4:5) Mmumue ne: Bible udi mua kukuambuluisha bua kuikala kuangata mapangadika mimpe. Udi mua kukuambuluisha kabidi bua kuandamuna nkonko minene itu bantu batamba kudiela, bu mudi:

Mona bimue biena-bualu bia miyuki itutu tuenza mu bisangilu bia ku ndekelu kua lumingu:

Bua tshinyi kuitaba bua Bible akulombole?
Nkuepi kutudi mua kupetela diambuluisha mu tshikondo tshia dikenga?
Tshidi Bukalenge bua Nzambi butuenzela lelu

“Mulongi wetu mukuabu wakalua mu bisangilu dituku kampanda. Wakasomba pamue ne dîku dietu, tuetu kumupesha pende mikanda ya kulonda nayi bisangilu. Pashishe wakalua kungambila ne: mandamuna avua bantu bafila mu bitupa bia diyukidilangana ne bateleji avua mamukemeshe bikole. Kuambaye kabidi ne: mu tshiabu tshitendelelu kabatu bobu ne mikanda ya kulonga nayi bu tuetu to.”—Brenda.

Utu mumanye anyi? Kabatu balomba makuta bua kubuela mu Nzubu wa Bukalenge to, ne muomu muine kabatu basangamu makuta to.

Bantu bakuabu badi babuelamu nebakukankamije. Bible udi wamba ne: bumue bua ku malu atudi ne bua kubuelela mu bisangilu mbua “tuikale tukankamijangana.” (Ebelu 10:24, 25) Lelu udi bantu ba bungi bela meji anu buabu bobu eu, bidi bienza bimpe bua kudisangisha pamue ne bantu badi bateka disua dia Nzambi ne diakalenga dia bakuabu kumpala kua diabu.

“Ku dilolo meme mumane kuenza mudimu mêba a bungi, ntu imue misangu mbanga kubungama ne ndiumvua mutshioke, kadi bantu bantu mpeta ku Nzubu wa Bukelenge batu benza bua ndiumvue bimpe menemene. Pantu mfuma mu bisangilu, ntu ngumvua disanka ne ndiumvua mudiakaje bua kutuadija dituku didi dilonda.”—Elisa.

Utu mumanye anyi? Kudi bisumbu bia Bantemu ba Yehowa bipite pa 120 000 pa buloba bujima, bidisangishila miaba ya kutendelela mipite pa 60 000. Tshidimu tshionso, batu bibaka Nzubu ya Bukalenge mitue ku 1 500 bualu bungi bua bantu badi babuela mu bisangilu budi anu buenda buvula.a

Tshidi bena mulongo nebe bamba

“Pantshivua mu tulasa tua bikadilu, mvua ndua ne mulongi wetu mukuabu mu bisangilu amue matuku, ne wakakema pakamonaye bakulumpe ne bana balonga bonso Bible pamue. Matuku mashale aa mfumuanyi wa mudimu wakabuelamu pende, biakamukemesha pakamonaye ne: tutu tutamba kubalamu mvese ya mu Bible. Dianyisha divuaye nadi bua bisangilu diakavudija dianyi panyi!”—Jessica.

“Bisangilu bitu bimpetesha disulakana ku malu a buatshia buila atu antonda ne ansamisha mutu. Tudi tulongamu mua kuikala ne nsombelu wa nsongo, mua kuikala bantu ba nsongo, ne malu makuabu a bungi. Pantu ngumbuka ku Nzubu wa Bukalenge, ntu ndiumvua mukankamijibue ne musulakane.”—Timothy.

“Muntu mukuabu umvua mubikile mu bisangilu wakalua kungambila ne: ‘Mvua mubuelamu anu bua kupeta pa kubipishila malongesha enu. Kadi ngalu kumona ne: etu malongesha ke mabi!’ Musangelu wa Bantemu ba Yehowa wakamusankisha kabidi bikole, kuambaye ne: ‘Nansha mumvua mulue bua musangu wa kumpala, nuakangakidila anu bu ne: tukavua bamanyangane nenu kuonso eku!’”—Jacob.

“Kuvua matuku amvua ndiambila ne: ‘Lelu padi anu bisangilu bijika ndi mpingana kumbelu musangu umue.’ Kadi meji au avua umbuka patutshivua anu mu bisangilu. Patu bisangilu bijika, ntu nyukila ne bantu ne tshitu nansha mvuluka meji amvua nawu a kupingana kumbelu musangu umue to. Bu kabuyi bua bisangilu, tshivua mua kupeta balunda bimpe bandi nabu lelu aba to.”—Madison.

a Bua kumanya muaba udibu benzela bisangilu, ndaku mu dibeji didibu bafunde ne: “Bisangilu bia tshisumbu bia Bantemu ba Yehowa,” utute pa “Keba adrese udi pabuipi nebe.”