Bua tshinyi Bantemu ba Yehowa batu benza Didia dia Mukalenge dishilangane ne dia bitendelelu bikuabu?

Tudi tuetu tulamata anu ku tshidi Bible wamba patudi tuenza Didia dia Mukalenge ditu dimanyike kabidi bu ‘Bidia bia Mukalenge,’ Didia dia Mfumu, nansha Tshivulukilu tshia lufu lua Yezu. (1 Kolinto 11:20; Mukanda wa Nzambi) Kadi malongesha ne bilele bidi bitendelelu bikuabu nabi mu bualu bua disekelela dia tshibilu etshi kabiena bipetangana ne Bible to.

Tshipatshila

Didia dia Mukalenge ndilongolola bua kuikala kuvuluka Yezu, kumuleja dianyisha dietu bua muvuaye mudilambule bua bualu buetu. (Matayi 20:28; 1 Kolinto 11:24) Tshibilu etshi katshiena bu nsankalamento (nansha didia dia nkomonyi) anyi tshilele kampanda tshia ekeleziya tshia kuambuluisha muntu bua kumulejabu luse kudi Nzambi anyi kupetaye dibuikidibua dia mibi nansha.a Bible udi utulongesha ne: bua kupeta dibuikidibua dia mibi yetu, ki mbilombibue bua kulonda mukiya kampanda wa tshitendelelu to, kadi bidi bikengela anu kuitabuja Yezu.​—Lomo 3:25; 1 Yone 2:1, 2.

Ndia kuenza misangu bungi kayi?

Yezu yeye mmutume anu dîyi bua bayidi bende bikale benza Didia dia Mukalenge bua kumuvuluka, kadi ki mmuleje misangu bungi busunguluke ya kutshienza to. (Luka 22:19) Bamue badi bela meji ne: ntshia kusekelela ku ngondo yonso, bakuabu pabu badi batshisekelela ku lumingu, ku dituku, misangu ya bungi ku dituku, anyi misangu yonso idi muntu umona ne: mbikumbane bua kutshienzaye.b Kadi malu a kutabalela ngowu aa.

Yezu wakabanjija Didia dia Mukalenge dituku divuabu basekelela Pasaka wa bena Yuda, pashishe kulua kufuaye anu dituku adi. (Matayi 26:1, 2) Kabivua bienzeke nanku ku mpukapuka to. Dîyi dia Nzambi didi dibikila mulambu wa Yezu bu wa muana wa mukoko wa Pasaka. (1 Kolinto 5:7, 8) Bavua basekelela Pasaka musangu anu umuepele ku tshidimu. (Ekesode 12:1-6; Lewitiki 23:5) Bia muomumue, bena Kristo ba kumpala bavua basekelela Tshivulukilu tshia lufu lua Yezu musangu anu umuepele ku tshidimu.c Ngenzelu wa mu Bible au ke udi Bantemu ba Yehowa pabu balonda.

Dituku ne dîba

Mushindu wa kusekelela Tshivulukilu uvua Yezu mushiye au kawena utuleja anu bungi bua misangu ya kutshienza to, udi utuleja kabidi dituku ne dîba dia kutshienza. Wakabanga kutshisekelela panyima pa dibuela dia dîba mu dia 14 ngondo wa Nisana mu 33 K.Y. bilondeshile mbadilu wa matuku wa patshivuabu bafunda Bible, wa batuadijila ku dibala dia ngondo too ne ku dibala dia ngondo mukuabu. (Matayi 26:18-20, 26) Dituku adi nditutshidi batungunuke ne kusekelela Tshivulukilu tshidimu tshionso, tuidikija ngenzelu wa bena Kristo ba kumpala.d

Nansha muvua dia 14 Nisana wa mu 33 P.Y. dikale mu Ditanu, mufikilu wa dituku adi udi mua kukumbana nansha dituku dikuabu dia mu lumingu ku tshidimu ne ku tshidimu. Tudi tumanya dituku didi dikumbanangana ne dia 14 Nisana ku tshidimu tshionso patudi tulonda mbadilu wa matuku muvuabu baabala tshikondo tshia Yezu pamutu pa kulonda mbadilu wa matuku wa bena Yuda ba lelu.e

Diampa ne mvinyo

Yezu wakangata diampa kadiyi diela luevene (buanga bua mampa) ne mvinyo mukunze bivua bishale ku biakudia bia Pasaka bua kuenza nabi tshibilu tshipiatshipia tshia Tshivulukilu. (Matayi 26:26-28) Tuetu petu tudi tulonda tshilejilu tshiende, tuenza Tshivulukilu ne diampa kadiyi diela luevene nansha bilengejilu bikuabu to, ne mvinyo mukunze kayi muela kantu kakuabu, udi kayi anu mayi patupu a tumuma tua mvinyo anyi mvinyo (maluvu) mushemeja ne nsukadi, mukolesha, anyi muela bilengejilu nansha.

Mu bitendelelu bikuabu batu bangata bobu mampa mela luevene anyi levire, kadi luevene mu Bible si lutu misangu ya bungi tshilejilu tshia bubi ne dinyanguka. (Luka 12:1; 1 Kolinto 5:6-8; Galatiya 5:7-9) Nunku, anu diampa didi kadiyi diela luevena anyi bilengejilu bikuabu ke didi mua kuikala tshifuanyikijilu tshikumbane tshia mubidi ukena bubi wa Kristo. (1 Petelo 2:22) Tshilele tshikuabu tshidi katshiyi tshia mu Bible ntshia kuangata mâyi patupu a tumuma tua mvinyo kaayi manji kukola pa muaba wa mvinyo. Bitendelelu bikuabu bidi bienza nanku anu bualu mbikandike dinua dia maluvu didi Bible kayi ulongesha to.​—1 Timote 5:23.

Mbilejilu, kadi ki mmubidi ne mashi bilelela to

Diampa kadiyi diela luevena ne mvinyo mukunze bidibu bia mu Tshivulukilu mbilejilu, nansha bimanyinu anyi bimfuanyi, bia mubidi ne mashi bia Kristo. Kabitu bishintuluka anyi bisambakana mu tshishima ne mubidi ne mashi bilelela bia Yezu bu mutu bakuabu bamba to. Mona malu a mu Bible adi atujadikila lungenyi elu.

• Bu Yezu mutumine bayidi bende dîyi dia kunua mashi ende, mmumue ne: uvua ubambila bua kushipa mukenji wa Nzambi udi ukandika didia ne dinua dia mashi. (Genese 9:4; Bienzedi 15:28, 29) Kadi kabivua mua kuikala nanku to, bualu Yezu kavua mua kulongeshangana bua kushipa mukenji wa Nzambi udi uleja mudi mashi mikale tshintu tshia tshijila nansha.​—Yone 8:28, 29.

• Bu bapostolo bamane kunua mashi malelela a Yezu nanku, Yezu kavua mua kulua kuamba ne: mashi anyi “adi ne bua kuedibua panshi” to; mêyi ende aa avua aleja ne: mulambu wa mashi ende mbualu buvua bulua kuenzeka pashishe.​—Matayi 26:28.

• Mulambu wa Yezu wakafidibua anu “musangu umue bua kashidi.” (Ebelu 9:25, 26) Kadi bu diampa ne mvinyo bishintuluke bilue mubidi ne mashi mu Didia dia Mukalenge, mmumue ne: badi babidia si bavua mua kuikala anu bu badi bafilulula mulambu au njila ne njila.

• Yezu wakamba ne: “Tungunukayi ne kuenza nunku bua kumvuluka,” kadi ki nne: ‘bua kumfila bu mulambu’ to.​—1 Kolinto 11:24.

Bena dilongesha dia diampa ne mvinyo biandamuka mubidi ne mashi bilelela bia Yezu badi bimanyina pa ngakuilu wa mu mvese kampanda ya mu Bible. Tshilejilu, mu nkudimuinu ya bungi ya Bible, mbenze bu ne: Yezu uvua wamba bua mvinyo ne: “[Lupanza] elu ludi mashi anyi.” (Matayi 26:28) Pawu mêyi a Yezu au badi mua kuakudimuna kabidi ne: “Etshi tshidi tshiumvuija mashi anyi,” “Etshi tshidi tshileja mashi anyi,” peshi “Etshi ntshimfuanyi tshia mashi anyi.”f Anu bu pa tshibidilu, Yezu uvua ulongesha mu bilejilu anyi mifuanu.​—Matayi 13:34, 35.

Badi badia ne banua mbanganyi?

Patutu tuetu Bantemu ba Yehowa tusekelela Didia dia Mukalenge, anu bantu bakese menemene ke batu badia diampa, banua ne mvinyo. Mbua tshinyi?

Mashi a Yezu akaya panshi mmabanjije “tshipungidi tshipiatshipia” tshivua tshipingane pa muaba wa tshipungidi tshivua Yehowa mudie ne tshisamba tshia kale tshia Isalele. (Ebelu 8:10-13) Badi mu tshipugidi tshipiatshipia etshi ke badi badia diampa, banua ne mvinyo bia mu Tshivulukilu. Katshiena tshikongoloja bena Kristo bonso to; tshidi tshitangila anu “bantu badibu babikile” dibikila dia pa buadi kudi Nzambi. (Ebelu 9:15; Luka 22:20) Bobu aba nebakokeshe mu diulu ne Kristo, kabidi Bible udi uleja ne: anu bantu 144 000 ke badibu bapeshe diakalenga adi.​—Luka 22:28-30; Buakabuluibua 5:9, 10; 14:1, 3.

Padi “kasumbu kakese ka mikoko” kabikidibua bua kukokesha ne Kristo, tshibungi tshia ba kutudi ntshitekemene bua kuikala mu “musumba munene wa bantu” bapeta muoyo wa kashidi pa buloba. (Luka 12:32; Buakabuluibua 7:9, 10) Nansha mudi badi batekemena muoyo wa pa buloba kabayi badia anyi banua bintu bia Tshivulukilu, badi anu babuelamu bonso bua kuleja dianyisha diabu bua mulambu uvua Yezu mufile bua bualu buetu bonso.​—1 Yone 2:2.