Nuenu bakaji, bua tshinyi mbimpe nukokele bumfumu?
‘Mutu wa mukaji yonso udi mulume.’—1 KOL. 11:3.
1, 2. (a) Mupostolo Paulo wakafunda tshinyi bua tshidi Yehowa mulongolole bua bumfumu ne dikokela? (b) Nkonko kayi ituandamuna mu tshiena-bualu etshi?
YEHOWA mmuteke malu malondangane anu muakaamba mupostolo Paulo pakafundaye ne: ‘Mutu wa mulume yonso udi Kristo, ne mutu wa Kristo udi Nzambi.’ (1 Kol. 11:3) Tshiena-bualu tshishale tshivua tshileje ne: Yezu uvua umona kukokela Mfumuende Yehowa Nzambi bu butumbi ne bualu bua disanka, kulejatshi kabidi ne: Kristo ke mutu wa balume bena Kristo. Kristo uvua muntu muimpe, muena lutulu, luse ne kavua ukeba anu malu avua amusankisha yeye to. Ke mudi bantu balume ne bua kuenzela bakuabu malu mu tshisumbu, kadi batamba kuenzela bakaji babu nanku.
2 Kadi tuambe tshinyi bua bantu bakaji? Nnganyi udi ku mutu kuabu? Paulo wakafunda ne: ‘Mutu wa mukaji yonso udi mulume.’ Mmushindu kayi udi bantu bakaji ne bua kumona budi Bible wamba ebu? Dîyi edi didiku ne mushinga nansha padi mulume kayi muena Kristo netu anyi? Kukokela bumfumu bua mulume kudiku kumvuija ne: mukaji udi ne bua kushala mupuwe dîba dia kuangata mapangadika mu dîku anyi? Mukaji udi mua kuditumbishisha mushindu kayi?
“Nemmufukile mukuatshishi”
3, 4. Bua tshinyi mushindu udi Nzambi mulongolole bumfumu mu dîku udi ne dikuatshisha?
3 Nzambi ke wakalongolola bua kuikale bumfumu mu dîku. Pakafukibua Adama, Yehowa wakalua kuamba ne: ‘Ki mbimpe bua mulume ashale nkayende nansha; nemmufukile mukuatshishi bu mudiye.’ Panyima pa difukibua dia Eva, Adama wakasanka bikole menemene bua muvuaye mupete muinende anyi mumuambuluishi, e kuambaye ne: ‘Eu udi mufuba wa mifuba yanyi ne musunyi wa misunyi yanyi.’ (Gen. 2:18-24) Adama ne Eva bavua ne diakalenga dia dikema kumpala kuabu dia kulua baledi ba bantu bavua kabayi ne bubi bavua mua kuikalaku anu ne muoyo kashidi ne disanka mu mparadizu pa buloba apa.
4 Bua buntomboji bua baledi betu ba ntuadijilu, nsombelu muimpe mupuangane uvuaku mu budimi bua Edene wakanyanguka. (Bala Lomo 5:12.) Kadi Nzambi utshivua anu wangata mulume bu mutu wa mukaji. Padi mulume ukokesha bimpe ne mukaji ukokela bilenga, bidi biambuluisha dibaka diabu, dituta diakalengele. Nebikale anu bu muvua Yezu mumvue pavuaye ukokela pende Yehowa udi Mutu wende. Kumpala kua Yezu kuluaye muntu pa buloba, uvua usanka ‘kumpala kua [Yehowa] matuku onso.’ (Nsu. 8:30) Bua bubi butukadi nabu, balume kabena kabidi ne mushindu wa kuikala bamfumu anyi mitu mimpe to, ne kakuena mukaji udi pende bua kukokela anu mudibi bikengela nansha. Kadi padi mulume ne mukaji batungunuka ne kudienzeja bua kuenza tshidi tshitambe buimpe, dîba adi dibaka diabu didi dibapetesha disanka divulavulayi.
5. Bena dibaka badi ne bua kuikala bavuluka mubelu udi mu Lomo 12:10 bua tshinyi?
5 Tshidi ne mushinga bua dibaka kuendadi bimpe ntshia kutumikila mubelu wa mu Bible eu udibu bapesha bena Kristo bonso: ‘Mu dinanga dia bana benu ba mu Kristo nunangangane muntu ne muntu; mu buneme muntu ne muntu ateke mukuabu kumpala.’ (Lomo 12:10) Kabidi, mulume ne mukaji bonso babidi badi ne bua kudienzeja bikole bua ‘kulejangana kalolo, kuikalangana ne mitshima ya luse, kulekelelangana malu mabi abu.’—Ef. 4:32.
Padi umue wenu kayi muena Kristo
6, 7. Nku tshinyi kudi mukaji muena Kristo udi ukokela bayende udi kayi muena Kristo mufuane kumufikisha?
6 Muena dibaka nebe yeye kayi Ntemu wa Yehowa, newenze tshinyi? Nangananga balume ke batu kabayi bena Kristo. Pikalabi nanku, mukaji udi mua kumuenzela malu mushindu kayi? Bible udi wamba ne: ‘Nuenu bakaji, nukokele babayenu; nunku bikala bakuabu kabayi bitabuja dîyi dia Nzambi, nebapetshibue mu bualu bua Nzambi kabayi ne dîyi dia Nzambi, ku bienzedi bia bakaji babu: patangilabu bienzedi bienu bilengele bidi ne ditshina.’—1 Pet. 3:1, 2.
7 Dîyi dia Nzambi didi diambila mukaji musela bua kuikala ne muoyo wa kukokela bayende udi kayi muena Kristo. Tshikadilu tshiende tshimpe tshidi mua kufikisha bayende ku dijinga kumanya tshidi tshimusaka bua kuikala ne bikadilu bimpe bia nunku. Dîba adi mulume eu mmufuane kukonkonona malongesha atu mukajende ulonda, pashishe kufikaye pamuapa ne ku diditabila yeye muine bulelela.
8, 9. Ntshinyi tshidi mukaji muena Kristo mua kuenza padi bayende udi kayi muena Kristo kayi ukudimuka bua bikadilu biende bimpe?
8 Kadi mulume eu yeye kayi mukudimuke, tshia kuenza ntshinyi? Mukanda wa Nzambi udi ukankamija mukaji muena kuitabuja bua kuleja anu ngikadilu ya buena Kristo bikondo bionso, nansha biobi bikole mushindu kayi. Tshilejilu, mbatufundile mu 1 Kolinto 13:4 ne: Dinanga ‘didi dikenga musangu mule.’ Nunku mukaji muena Kristo neatambe kuenza bimpe pa kutungunuka ‘mu kudipuekesha kuonso, mu kalolo, mu lutulu’ ne mu kufuilangana luse bua dinanga mu nsombelu au. (Ef. 4:2) Mudi bukole budi Nzambi wenza nabu malu anyi nyuma muimpe utuambuluisha, kudi mushindu wa kushala anu mu ngikadilu ya buena Kristo nansha padi nsombelu utantamana.
9 Mupostolo Paulo wakafunda ne: ‘Ndi mumanye mua kuenza malu onso mu Mukalenge udi unkolesha.’ (Filip. 4:13) Nyuma wa Nzambi udi wambuluisha mulume ne mukaji bena Kristo bua kuenza malu a bungi avuabu kabayi mua kuenza bu bobu kabayi nende nansha. Tshilejilu, umue wabu yeye ukengesha mukuabu, mukuabu au pende mmufuane kujinga bua kumupingajila bubi ku bubi. Kadi, Bible udi wambila bena Kristo bonso ne: ‘Kualukijidi muntu bubi ku bubi buende. Bualu bua bakafunda ne: Busombuedi mbuanyi, meme nemfute; mmudi muamba Mukalenge.’ (Lomo 12:17-19) Kabidi badi batubela mu 1 Tesalonike 5:15 ne: ‘Numone ne: muntu kapingajidi mukuabu bubi ku bubi buende; kadi misangu yonso nulondelangane malu adi mimpe muntu ne muntu, ne kudi bonso.’ Malu adi mua kutukolela au tudi mua kuenza bipepele anu bua diambuluisha dia nyuma wa Yehowa. Nanku mbimpe tuetu kulomba Nzambi nyuma wende muimpe bua tuetu kuenza bitudi katuyi mua kuenza!
10. Ntshinyi tshivua Yezu wenza pavuabu bamuamba anyi bamuenzela malu mabi?
10 Tshivua Yezu wenzela bavua bamuamba anyi bamuenzela malu mabi ntshishale tshilejilu tshimpe kutudi. 1 Petelo 2:23 udi wamba ne: ‘Pakamupendabu, yeye kakabapenda kabidi; pakakengaye, yeye kakabakanyina, kadi wakadifila mu bianza bia udi ulumbulula biakane.’ Mbatukankamije bua kulonda tshilejilu tshiende tshimpe. Kukuatshi tshiji bua bienzedi bibi bia bakuabu nansha. Anu mudibu badimuije bena Kristo bonso, wikale ‘ne mutshima wa luse ne mutshima mupuekele; kushintakaji bubi ku bubi anyi tshipendu ku tshipendu’ to.—1 Pet. 3:8, 9.
Bikale bashala anu bapuwe anyi?
11. Mmudimu kayi munene wa lumu wenzabu ne kudi bamue bakaji bena Kristo?
11 Kukokela mulume kudi kumvuija ne: mu dibaka mukaji ikale anu mupuwe kayi wela dîyi mu malu a mu dîku anyi mu malu makuabu anyi? Nansha kakese. Yehowa mmupeshe bakaji ne balume kabidi midimu mimpe ya bungi ya lumu. Anji elabi meji a lumu lua dikema ludi bantu 144 000 nalu lua kuikala bakalenge ne bakuidi mu diulu balombola kudi Kristo pakokeshaye buloba ebu! Mu bantu abu mudi kabidi bantu bakaji. (Gal. 3:26-29) Kakuyi mpata, Yehowa mmupe bantu bakaji mudimu munene wenzabu mu bulongolodi buende bua malu.
12, 13. Fila tshilejilu tshidi tshileja ne: bakaji bavua pabu bamanyishe malu bu baprofete.
12 Tshilejilu, kale patshivuabu bafunda Bible, bakaji bavua pabu baprofete. Yoele 2:28, 29 wakadianjila kuamba ne: ‘Nengitshikijile bantu bonso nyuma wanyi; bana benu ba balume ne bana benu ba bakaji nebambe malu adi kaayi manji kulua. Nengitshikijile nyuma wanyi kabidi pambidi pa bapika balume ne bapika bakaji mu matuku au.’
13 Mu bayidi ba Yezu batue ku 120 bavua badisangishile mu nzubu wa kulu ku Yelushalema dituku dia Pentekoste wa mu 33 muvua ne balume ne bakaji kabidi. Nzambi wakitshikija nyuma wende pambidi pa tshisumbu tshijima tshia bayidi abu. Ke pavua Petelo muakule dîba adi mutele mêyi akamba muprofete Yoele, yeye kuleja muvuawu makumbanyine balume ne bakaji abu muomumue. Petelo wakamba ne: ‘Ebu mbualu buakambabu kudi muprofete Yoele ne: Nzambi udi wamba ne: palua matuku a ku nshikidilu, nengitshikijile bantu bonso nyuma wanyi, bana benu balume ne bana benu bakaji nebambe malu adi kaayi manji kulua; ê, palua matuku au nengitshikijile bapika banyi balume ne bapika banyi bakaji nyuma wanyi, nebambe malu adi kaayi manji kulua.’—Bien. 2:16-18.
14. Mmalu kayi akakumbaja bantu bakaji mu mudimu wa ditantshisha buena Kristo bua ku ntuadijilu?
14 Bantu bakaji bavua pabu bambuluishe bikole bua kutantshisha buena Kristo mu bidimu lukama bia kumpala. Bavua bayisha bantu bakuabu bua Bukalenge bua Nzambi ne benza malu avua uvuangana ne bivuabu bayisha. (Luka 8:1-3) Tshilejilu, mupostolo Paulo wakabikila Foibe bu muanetu ‘uvua ukuatshila tshisumbu tshia bena ditaba bavua’ ku Kenekelea ‘mudimu.’ Pavua Paulo utumina benzejanganyi nende ba mudimu mioyo, wakatela bakaji ba lulamatu ndambu, kutela ne ‘Tufaina ne Tufoso, bavua benza mudimu wa Mukalenge.’ Wakatela kabidi ‘Pêsi, munanga, wakenzela Mukalenge mudimu wa bungi.’—Lomo 16:1, 12, MMV.
15. Mmalu kayi adi bantu bakaji bakumbaja mu mudimu wa ditantshisha buena Kristo matuku etu aa?
15 Bikondo bietu ebi, tshitupa tshinene tshia bantu bapite pa miliyo 7 badi bayisha lumu luimpe lua Bukalenge bua Nzambi pa buloba bujima ntshia bantu bakaji ba milongo yonso. (Mat. 24:14) Ba bungi ba kudibu mbampanda-njila, bamisionere, ne bena ku Betele. Davidi wakimba pende musambu wamba ne: ‘Mukalenge udi wamba dîyi diende, bakaji badi bambila bantu lumu elu badi tshisumbu tshinene.’ (Mus. 68:11) Mêyi aa mmalue kukumbana bimpe be! Mudimu udi bantu bakaji benza wa kuyisha lumu luimpe ne kuenza disua dia Yehowa, yeye udi uwangata ne mushinga. Padiye ulomba bakaji bena Kristo bua kukokela, kena wamba bua bashale bakokela kabayi bakula to.
Bantu bakaji babidi bavua bakule
16, 17. Nku tshinyi kudi tshilejilu tshia Sala tshileja ne: bakaji kabena anu ne bua kushala bapuwe mu dibaka?
16 Bikale Yehowa upesha bantu bakaji midimu ya bungi ya lumu, balume kabenaku ne bua kuanji kuyukila ne bakaji babu kumpala kua kuenza bualu kampanda bunene anyi? Bobu benza nanku, badi baleja mudibu ne meji. Mukanda wa Nzambi udi utela bikondo bishilashilangane bivua bantu bakaji bakule ne benze malu babayabu kabayi nansha babambile bua kuenza nanku. Tumonayi bilejilu bibidi ebi.
17 Sala mukaji wa Abalahama uvua amu umuambila bua kuipata mukajende muibidi ne muanende bua muvuabu kabayi ne kanemu. Kadi “bualu ebu buakadi bujitu bukole kudi Abalahama,” tshibi buvua busankisha Nzambi. Yehowa wakambila Abalahama ne: ‘Bualu ebu kabuikadi bujitu ku mêsu kuebe, bualu bua nsongalume ne bua mupika webe; witabuje mêyi onso akukuambila Sala, umvua dîyi diende.’ (Gen. 21:8-12) Abalahama wakatumikila Yehowa, kutelejaye Sala ne kumukumbajilaye dilomba diende.
18. Mbualu kayi buvua Abigayila muenze?
18 Elabi kabidi meji bua Abigayila mukaji wa Nabala. Davidi wakenza matuku pabuipi ne bimuna bia Nabala pavuaye unyema Shaula mukalenge uvua ne mukawu. Pamutu pa kudiangatshila tshintu nansha tshimue tshia ku bintu bivule bia muntu mubanji au, Davidi ne bantu bende bakamulaminabi. Kadi Nabala “wakadi muena lukinu, wakadi ne bienzedi bibi,” ne yeye ‘wakatandisha’ bantu ba Davidi. Nabala uvua ‘muntu mulembakane,’ kabidi ‘bupote buvua nende.’ Pavua bantu ba Davidi balombe Nabala biakudia ne kanemu konso, Nabala wakabenga. Abigayila wakenza tshinyi pavuaye mumvue bualu abu? Abigayila ‘wakaya lubilu, wakangata mitanda ya bidia nkama ibidi ne milondo ya mvinyo ibidi ne mikoko itanu yakadi milamba ne bipiminu bia blé mikanga bitanu ne bisumbu bia tumuma tukese tûme lukama lumue ne bisumbu bia mfigi nkama ibidi,’ kubipeshaye Davidi ne bantu bende kayi nansha muambile bayende. Abigayila uvua muenze bimpe anyi? Bible udi wamba ne: “Yehowa wakakuma Nabala, yeye wakafua.” Davidi wakalua kusela Abigayila.—1 Sam. 25:3, 14-19, 23-25, 38-42.
‘Mukaji udi mutumbishibue’
19, 20. Tshidi mua kuvuija mukaji mukumbane kutumbishibua menemene ntshinyi?
19 Bible udi wela mukaji udi wenza malu mudi Yehowa musue kalumbandi. Mukanda wa Nsumuinu udi utumbisha ‘mukaji wa tshikadilu tshimpe’ wamba ne: ‘Bulengele buende budi butambe mabue a bilenga mushinga mukole. Mutshima wa bayende udi umueyemena, kena ukengela bintu. Yeye udi wenzela bayende malu mimpe, kena umuenzela bualu bubi matuku onso a muoyo wende.’ Kabidi, ‘udi ubulula mukana muende ne meji, diyisha dia luse didi pa ludimi luende. Udi utangila malu adi ba mu nzubu muende benza, katu wadia biakudia bia bufuba. Bana bende badi bajuka, bamuvudijila disanka. Bayende kabidi udi ujuka, udi umutumbisha.’—Nsu. 31:10-12, 26-28.
20 Ntshinyi tshidi mua kuvuija mukaji muakanyine menemene kutumbishibua? Nsumuinu 31:30 udi wamba ne: ‘Bulengele budi budinga, mpala mulengele udi patupu, kadi mukaji udi unemeka Yehowa neatumbishibue.’ Mu dinemeka anyi ditshina dia Yehowa mudi kabidi dibanza dia kukokela ne budisuile buonso ku mushindu udi Yehowa muteke bumfumu bulondangane. Tuambe ne: ‘Mutu wa mukaji yonso udi mulume’ anu mudi ‘mutu wa mulume yonso muikale Kristo,’ ne ‘mutu wa Kristo muikale Nzambi.’—1 Kol. 11:3.
Nuleje dianyisha bua bidi Nzambi munupe
21, 22. (a) Mmalu kayi adi bena Kristo badi baselangane ne bua kulejila Nzambi dianyisha bua dibaka? (b) Bua tshinyi tudi ne bua kunemeka mudi Yehowa muteke bukokeshi ne bumfumu bulondangane? (Tangila kazubu kadi mu dibeji dia 17.)
21 Bena Kristo badi baselangane badi ne malu mapite bungi a kulejila Nzambi dianyisha. Badi mua kuenda tshia pamue mu buobumue bu bena dibaka badi baselangane ne disanka. Badi nangananga mua kuela Nzambi tuasakidila bua mudiye mubape disanka dia kuikala baselangane, bualu didi dibapetesha mushindu wa kulua tshintu tshimue ne kuenda ne Yehowa Nzambi wabu. (Luta 1:9; Mika 6:8) Yeye wakafuka dibaka mmumanye bimpe menemene tshidi tshikengela bua mulume ne mukaji kuikalabu ne disanka. Nuikale nuenza anu tshidi disua dia Nzambi, nunku ‘disanka dia Yehowa nedikale bukole buenu’ nansha lelu eu udiku ntatu mikole panuapa.—Neh. 8:10.
22 Mulume muena Kristo udi munange mukajende bu mudiye mudinange yeye muine udi umulombola ne luse ne kanemu. Mukajende udi unemeka Nzambi mmukumbanyine kunangibua bulelela, bualu udi umukuatshisha ne umunemeka bikole. Tshia mushinga menemene ntshia muikala dibaka diabu dia tshitembu ditumbisha Yehowa Nzambi wetu udi mukumbane kuangata butumbi buonso.
Udi muvuluke anyi?
• Mmushindu kayi udi Yehowa mulongolole malu a bumfumu ne dikokela?
• Mulume ne mukajende badi ne bua kunemekangana bua tshinyi?
• Mmunyi mudi mukaji muena Kristo mua kuenzela bayende udi kayi muena Kristo malu?
• Bua tshinyi balume badi ne bua kuyukila ne bakaji babu kumpala kua kuenza bualu kampanda bunene?
[Kazubu mu dibeji 17]
Bua tshinyi kunemeka bukokeshi?
Yehowa mmulongolole bua kuikale bumfumu ne bukokeshi munkatshi mua bifukibua biende bidi ne meji. Mmuenze nanku bua diakalenga dia banjelu ba mu diulu ne bantu ba pa buloba. Bidi bibapetesha mushindu wa kuenza malu bimpe ne bukokeshi bua kudisunguila malu ne wa kutumbisha Nzambi pa kumuenzela mudimu mu buobumue ne diumvuangana.—Mus. 133:1.
Tshisumbu tshia bena Kristo bela manyi tshidi tshitaba bukokeshi ne bumfumu bua Yezu Kristo. (Ef. 1:22, 23) Pashishe, bua Yezu pende kuleja dikokela ku bukokeshi bua Yehowa, yeye ‘muine kabidi neatekibue muinshi mua Tatu wakateka bintu bionso muinshi muende, bua Nzambi kuikala ku mutu kua bionso ne mu bintu bionso.’ (1 Kol. 15:27, 28) Nanku, mbikumbane bua bonso badi badilambule kudi Nzambi kukokelabu bukokeshi budi Nzambi mulongolole bua buikale mu tshisumbu ne mu dîku. (1 Kol. 11:3; Eb. 13:17) Patudi tuenza nanku, tudi tudienzela bimpe bualu Yehowa udi utuanyisha, utubenesha kabidi.—Yesh. 48:17.
[Tshimfuanyi mu dibeji 13]
Disambila didi mua kuambuluisha mukaji muena Kristo bua kuikala ne ngikadilu mimpe
[Bimfuanyi mu dibeji 15]
Bidi bakaji benza bua kutantshisha malu a Bukalenge, Yehowa udi ubiangata ne mushinga