PA BULOBA bujima bantu ba bibidilu ne ba mu bitendelelu bionso batu basambila. Batu basambila pa nkayabu anyi mu tshibungi. Badi baya mu bitanda, mu ntempelo, mu nsunagoga, ku moske nansha mu miaba ya tshijila. Bua kusambila, badi mua kuenza mudimu ne tapi miadija, lunzadi, nkata mifunda masambila, mpingu, mikanda ya masambila anyi masambila mafunda pa tubaya tulembeleja ku bintu.

Bantu mbashilangane ne bintu bikuabu bionso bidi ne muoyo pa buloba bualu bobu batu basambila. Kudi malu a bungi a bantu adi mafuanangane ne a nyama. Nyama itu dijinga ne biakudia, lupepela ne mâyi anu bu tuetu. Tudi tuledibua, tukola ne tufua anu mutubi bua nyama. (Muambi 3:19) Kadi anu bantu ke batu basambila. Bua tshinyi?

Tudi mua kuandamuna bipepele ne: bualu tudi nadi dijinga. Disambila didi nangananga mushindu udi bantu bakeba diambuluisha kudi tshintu kampanda tshidibu bela meji ne: ntshia tshijila, tshinsantu ne tshia tshiendelele. Mukanda wa Nzambi udi wamba ne: mbatufuke ne dijinga dia kuenza nunku. (Muambi 3:11, NW) Umue musangu Yezu Kristo wakamba ne: ‘Ba diakalenga mbadi bamanye mudibu ne dijinga dia kumanya malu a Nzambi.’​—Matayo 5:3, NW.

‘Dijinga dia kumanya malu a Nzambi’ ke didi disaka bantu bua kuibaka nzubu ya masambila minene ne milengeja bimpe ne kupitshishamu mêba mapite bungi bua kusambila. Bamue bantu batu bakeba kudimanyina Nzambi nkayabu anyi bakeba muntu mukuabu bua abambuluishe. Nansha nanku, kuenaku umona pebe ne: bantu kabena ne bukole bua kuambuluisha bakuabu mudibi bikengela menemene anyi? Tudi bena butekete, tudi ne muoyo wa tshitupa tshîpi ne katutu tumona malu atshilualua to. Anu muntu wa meji ne bukole bia bungi udi ne muoyo mule kutupita ke udi mua kutuambuluisha. Kadi malu a Nzambi adi atusaka bua kusambila mmalu kayi?

Tshilejilu, bikadiku bikufikile bua kukeba tshia kuenza, kupeta meji anyi mandamuna a nkonko idi bantu kabayi mua kuandamuna anyi? Ukadiku mujinge bua bakukoleshe ku muoyo paudi mufuishe, bakuleje tshia kuenza paudi ujinga kuangata dipangadika dinene, anyi bakubuikidile paudi muenza bualu bubi budi bukutonda bikole anyi?

Bilondeshile Mukanda wa Nzambi, aa ke malu adi atusaka bua kusambila. Bible ke mukanda udi mua kutuambuluisha mu bualu ebu. Udi ne miyuki ya masambila menza kudi balume ne bakaji bavua balamate Nzambi. Bavua basambila Nzambi bua abakoleshe, abaleje tshia kuenza, ababuikidile ne abandamune nkonko ivua mibapite mutu.​—Musambu 23:3; 71:21; Danyele 9:4, 5, 19; Habakuka 1:3.

Nansha muvua masambila au mashilangane, avua mafuanangane ku tshintu tshimue. Bonso bavua baenza bavua bamanye malu avua akengela kuenza bua Nzambi kubatelejaye, pabi malu aa ke adi bantu lelu kabayi bamanye anyi kabatshiyi bangata ne mushinga. Bavua bamanye muntu uvuabu ne bua kusambila.

NZAMBI utuku uteleja masambila onso nansha muntu musambile nzambi mukuabu anyi? Ke mutu bantu bela meji. Lungenyi elu ndufumine kudi bantu badi basue kusangisha bitendelelu bionso pamue bua Nzambi abianyishe nansha mudibi bishilangane. Nansha mudi lungenyi elu lua dishima, bidiku mua kuenzeka nanku anyi?

Bible udi wamba ne: pa tshibidilu, bantu kabatu basambila nzambi mulelela to. Patshivuabu bafunda Bible, bantu bavua ne tshibidilu tshia kusambila mpingu. Kadi Nzambi uvua ubadimuija njila ne njila bua kutshilekelabu. Tshilejilu, Musambu wa 115:4-6 udi wamba bua mpingu ne: ‘Idi ne matshi, kadi kayena yumvua.’ Tshilumbu ntshitoke. Bua tshinyi kusambila nzambi udi kayi mua kututeleja?

Mu Bible mudi muyuki muimpe udi umvuija patoke tshilumbu etshi. Eliya muprofete wa Nzambi wakambila baprofete ba Bâla bua kusambilabu nzambi wabu, pashishe uvua pende ne bua kusambila wende Nzambi. Wakamba ne: Nzambi uvua ne bua kuandamuna ke uvua mulelela. Baprofete ba Bâla kuitababu, kusambilabu bikole bela ne mbila, kadi Bâla kakabandamuna. Bible udi wamba ne: ‘Kadi kakuakadi dîyi, nansha muntu wakitaba.’ (1 Bakelenge 18:29) Kadi pavua Eliya musambile, ntshinyi tshiakenzeka?

Eliya mumane kusambila, Nzambi kuandamuna diakamue, kutumaye kapia kafumina mu diulu bua kuosha mulambu uvua Eliya muteke. Dishilangana divua ku tshinyi? Kuvua bualu bunene buvuaye muenze mu diende disambila budi mu 1 Bakelenge 18:36, 37. Uvua mudienze mu tshikoso bualu divua anu ne miaku mitue ku 30 patupu mu muakulu wa tshiena Ebelu. Mu mêyi makese avuaye muambe au, wakatela dîna dia Nzambi, Yehowa misangu isatu.

Bâla, dîna didi diumvuija “muena” tshintu anyi “mfumu,” uvua nzambi wa bena Kanâna, muaba uvuabu babikila nzambi ya bungi ku dîna dia Bâla. Kadi dîna Yehowa didi anu diende nkayende mu diulu ne pa buloba. Nzambi eu ke wakambila bena Isalele ne: ‘Meme ndi Yehowa, adi ndîna dianyi; tshiena mpa mukuabu butumbi buanyi’​—Yeshaya 42:8.

Disambila dia Eliya ne masambila a baprofete ba Bâla, avuaku maye muaba umue anyi? Ntendelelu wa Bâla uvua unyanga bantu ne buendende ne ubasaka bua kulambula too ne bantu nabu. Kadi wa Yehowa uvua wambika bena Isalele lumu ne uvua ubepula ku bibidilu bibi bia mushindu eu. Elabi meji: Udi ne mulunda webe utubu banemeka bikole ne ukeba kumufundila mukanda, neuutume mu dîna dia muntu mukuabu utu wenza malu atu mulunda webe au kayi musue anyi? Nansha kakese.

Wewe usambila Yehowa, udi ulomba Mufuki ne Tatuende wa bantu.a Muprofete Yeshayi wakamba mu disambila ne: “Wewe, Yehowa, udi Tatu wetu.” (Yeshaya 63:16) Yeye ke uvua Yezu wamba pakambilaye bayidi bende ne: “Ndi nya kulu kudi Tatu wanyi ne Tatu wenu, kudi Nzambi wanyi ne Nzambi wenu.” (Yone 20:17) Yehowa ke Tatuende wa Yezu. Yeye ke Nzambi uvua Yezu usambila ne uvuaye mulongeshe bayidi bende bua kusambilabu.​—Matayo 6:9.

Bible udiku wamba ne: tudi mua kusambila Yezu, Mariya, bansantu anyi banjelu anyi? Tòo, anu Yehowa. Bua tshinyi? Bua malu abidi aa: Bua kumpala, kusambila ntshitupa tshia ntendelelu. Bible udi wamba ne: tudi ne bua kutendelela anu Yehowa. (Ekesode 20:5) Buibidi: Bible udi wamba mudi Yehowa muikale ‘mumvu wa milombu.’ (Musambu 65:2) Nansha mutu Yehowa upesha bantu midimu, katu muanji kupesha muntu mukuabu bukenji bua kuteleja masambila to. Yeye ke udi mulaye bua kuditelejila masambila etu.

Nunku, wewe musue bua Nzambi kutelejaye masambila ebe, uvuluke didimuija didi mu Bible edi: ‘Muntu yonso watela dîna dia Yehowa neasungidibue.’ (Yoele 2:32) Bu mudibi nanku, Yehowa udiku uteleja masambila onso tshianana tshianana anyi? Kudiku bualu bukuabu butudi ne bua kumanya bituikale basue bua Yehowa kutelejaye masambila etu anyi?

PATU bantu ba mu bitendelelu bia bungi bakeba kusambila, batu ne tshilele tshia kuimanyina pa mushindu udi muntu mua kuikala, malu ambaye ne enzaye padiye usambila. Kadi Bible udi utuambuluisha bua kubenga kuimanyina pa malu aa ne bua kudiela lukonko lua mushinga elu: “Mmushindu kayi utudi ne bua kusambila?”

Mu Bible mudi bilejilu bia batendeledi ba Nzambi bavua bamulamate, basambila bikale mu mishindu ne miaba mishilangane. Bavua basambila mundamunda anyi ne dîyi dikole bilondeshile nsombelu yabu. Bavua basambila batangile muulu anyi binama panshi. Pavuabu basambila, bavua bamba malu avua afumina mu muoyo wabu pamutu pa kusambila ku diambuluisha dia bimfuanyi, lunzadi, anyi mikanda ya masambila. Tshivua tshienza bua Nzambi kuteleja masambila abu ntshinyi?

Anu mutuvua baleja mu tshiena-bualu tshishale, bavua batuma masambila abu kudi Nzambi umue, Yehowa. Kudi kabidi bualu bukuabu bua mushinga. Mukanda wa 1 Yone 5:14 udi wamba ne: ‘Edi ndikima ditudi nadi kudiye ne: Bituamulomba tshintu tshionso bu mu disua diende, yeye udi utumvuila.’ Nzambi udi uteleja masambila adi umvuangana ne disua diende. Bidi bisua kuimvuija tshinyi?

Bua tuetu kusambila mu diumvuangana ne disua dia Nzambi, mbimpe tuanji kumanya disua adi. Dilonga Bible didi munkatshi mua malu adi atuambuluisha bua kusambila. Bidiku biumvuija ne: Nzambi neabenge kuteleja masambila etu anu bualu katuena bamanye Bible bikole anyi? Tòo, mmusue bua tumanye disua diende, tukebe mua kudiumvua ne tuenze malu adi umvuangana nadi. (Matayo 7:21-23) Tudi ne bua kusambila mu diumvuangane ne malu atudi balonge.

Bukuabu bualu budi butuambuluisha bua kusambila nditabuja. Ditabuja edi didi dikola patudi tulonga malu a Yehowa ne disua diende. Yezu wakamba ne: ‘Binuitabuja, nenuangate bintu bionso binualomba mu kutendelela kuenu.’ (Matayo 21:22) Kuikala ne ditabuja ki nkuikala tshitaba mvinyingu to. Kadi kudi kumvuija kuitaba tshintu kampanda nansha katuyi batshimona eku bikale ne bijadiki bilelela. (Ebelu 11:1) Mu Bible mudi bijadiki bia bungi bidi bileja ne: Yehowa udiku ne tudi mua kumueyemena nansha mutudi katuyi mua kumumona ne mmusue kuandamuna masambila a bantu badi bamulomba ne ditabuja. Tudi kabidi mua kuikala tulomba Yehowa bua atupeshe ditabuja dikole. Mmusue kutupesha bitudi nabi dijinga.​—Luka 17:5; Yakobo 1:17.

Kudi bukuabu bualu budi butuambuluisha bua kusambila. Yezu wakamba ne: ‘Kakuena muntu udi ulua kudi Tatu, kayi muanji kulua kundi diambedi.’ (Yone 14:6) Yezu ke njila udi utufikisha kudi Tatu wetu Yehowa. Ke bualu kayi wakambila bayidi bende bua kusambila mu dîna diende. (Yone 14:13; 15:16) Bualu ebu kabuena bumvuija ne: tudi ne bua kusambila Yezu to. Kadi tudi tusambila mu dîna dia Yezu bamanye ne: yeye ke udi mutuambuluishe bua kusemena kudi Tatu wetu muakane ne munsantu.

Umue musangu bayidi bakambila Yezu ne: ‘Mukalenge, utuyishe bietu mua kutendelela Nzambi.’ (Luka 11:1) Kabavua balomba bua abalongeshe malu a nshindamenu adi atuambuluisha bua kusambila atukadi batela to. Bavua bajinga kumanya malu a kuamba mu disambila. Bavua basua kuamba ne: ‘Tudi ne bua kusambila bua malu kayi?’

BATU bamba bua disambila dia tshilejilu dia Yezu ditubu imue misangu babikila ne: Disambila dia Tatu wetu ne: ndisambila ditu bena Kristo ba pa buloba bujima batamba kuambulula. Nansha bikale nanku anyi kabiyi nanku, bantu ba bungi kabatu anu badiumvua to. Bantu miliyo ya bungi batu bambulula disambila edi dituku dionso bu nyunyi wa nkusu. Kadi Yezu kavua musue bua tuikale tudiambulula mu mushindu eu to. Bua tshinyi tudi tuamba nanku?

Kumpala kua kuakulaye bua disambila adi, wakamba ne: ‘Panuatendelela Nzambi, kanuikadi nuambulula anu malu amue amue.’ (Matayo 6:7, NW) Yezu uvuaku udikondakaja nkayende pa kulongesha kabidi bantu disambila dia kukuata ku muoyo ne kuambulula anyi? Kabiena nanku to. Kadi uvua ulongesha malu atudi mua kulomba mu disambila ne uvua utuleja patoke malu manene a kuvuluka patudi tusambila. Tukonkononayi bimpe tshivuaye muambe. Disambila adi didi mu mukanda wa Matayo 6:9-13.

‘Tatu wetu udi mu diulu, banemeke dîna diebe.’

Yezu uvua uvuluija bayidi bende ne: badi ne bua kutuma masambila abu onso kudi Tatuende Yehowa. Kadi udiku mumanye bua tshinyi dîna dia Nzambi didi ne mushinga ne bua tshinyi bidi bikengela bua badinemeke anyi baditumbishe anyi?

Bavua bapendeshe dîna dinsantu dia Nzambi ne malu a dishima anu katshia mu budimi bua Edene. Satana muena lukuna wa Nzambi wakamba mudi Yehowa muena dishima, Mukokeshi mudinangi udi kayi mukumbane bua kukokesha bifukibua biende. (Genese 3:1-6) Bantu ba bungi bakitaba tshia Satana, kutuadijabu kulongesha ne: Nzambi katu utshiukangana, mmuena tshikisu ne utu ulaminangana munda ne bamba ne: ki nyeye udi mufuke bintu bionso to. Bakuabu mbatuadija bobu kuluisha dîna diende dia Yehowa, badiumbusha mu nkudimuinu yabu ya Bible ne bakandika bantu bua kubenga nansha kuditela.

Bible udi wamba ne: Nzambi neadibingishe ku malu onso aa. (Yehezekele 39:7) Pashishe, neatukumbajile majinga etu ne kujikija ntatu yetu yonso. Mmushindu kayi? Mêyi a mu disambila dia Yezu adi alonda aa adi andamuna.

‘Bukalenge buebe bulue.’

Lelu balongeshi ba mu bitendelelu batu ne tshibuejakaji tshia bungi bua Bukalenge bua Nzambi. Anu muvua bayidi ba Yezu bamanye, baprofete ba Nzambi bavua bamanyishe ne: Masiya, musungidi uvua Nzambi musungule ke uvua ne bua kukokesha mu Bukalenge bua Nzambi ne kushintulula malu pa buloba. (Yeshaya 9:6, 7; Danyele 2:44) Bukalenge ebu nebuvuije dîna dia Nzambi dinsantu bua kuela mashimi a Satana patoke, bumutshimuna ne bubutula midimu yende. Nebujikije mvita, masama, nzala nansha lufu kabidi. (Musambu 46:9; 72:12-16; Yeshaya 25:8; 33:24) Paudi usambila bua Bukalenge bua Nzambi kuluabu, udi usambila bua malu onso adi Nzambi mulaye kukumbanawu.

‘Benze pa buloba muudi musue bu mudibu benza mu diulu.’

Mêyi a Yezu aa adi aleja ne: disua dia Nzambi nedienzeke pa buloba anu bu mudidi dienzeka mu diulu, muaba udi Nzambi musombe. Disua dia Nzambi ditshitu anu dienzeka mu diulu muvua Yezu muele Satana ne bena diende mvita ne mubimanshe pa buloba. (Buakabuluibua 12:9-12) Anu bu bitupa bibidi bia kumpala, tshitupa tshisatu tshia disambila dia tshilejilu etshi tshidi tshituambuluisha bua kuimanyina pa malu a mushinga wa bungi, mbuena kuamba ne: anu pa disua dia Nzambi. Disua diende ke ditu anu dituadila bifukibua bionso masanka a bungi. Ke bua tshinyi nansha Yezu uvua muntu muakane wakambila Tatuende ne: ‘Bualu buenjibue bu muudi musue, kabuenjibu bu mundi musue.’​—Luka 22:42.

‘Utupe tshitupa tshia bidia bietu bia buatshia-buatshia lelu.’

Pashishe Yezu wakaleja ne: tudi kabidi mua kusambila bua malu atudi nawu dijinga. Ki mbibi bua kulomba Nzambi bintu bitudi nabi dijinga bua kudiambuluisha to. Patudi tuenza nanku, tudi tuvuluka ne: Yehowa ‘utu upa bantu bonso muoyo ne mupuya ne bintu bionso.’ (Bienzedi 17:25) Bible udi wamba ne: Yehowa udi Tatu wa dinanga utu musue kupesha bana bende bidibu nabi dijinga. Anu bu muledi muimpe, kena musue bua tumulombe bintu bidi kabiyi mua kutuambuluisha to.

“Utulekelele mabanza a malu mabi etu.”

Udiku bushuwa ne dibanza dia malu mabi kudi Nzambi anyi? Udiku ujinga bua akufuile luse anyi? Lelu bantu ba bungi ki mbamanye tshidi bubi bumvuija ne malu adibu bukebesha to. Kadi Bible udi wamba ne: bubi ke budi bukebeshe ntatu yonso itudi nayi eyi, bualu bobu ke budi bukebele bantu lufu. Bu mutudi baledibue mu bubi, tutu tuenza malu mabi pa tshibidilu. Nunku anu Nzambi yeye mutufuile luse ke tuetu kupeta muoyo wa tshiendelele matuku atshilualua. (Lomo 3:23; 5:12; 6:23) Patudi tumanya ne: Yehowa ‘udi muimpe ne mutshima wende udi musue kubuikidila bantu mibi yabu,’ tudi tupeta disulakana.​—Musambu 86:5.

‘Utusungile kudi mubi.’

Udiku umona ne: bidi bikengela menemene bua Nzambi akulame ne lukasa luonso anyi? Bantu ba bungi kabatu bitaba ne: Satana muntu mubi au utuku to. Kadi Yezu wakamba ne: Satana utuku, kumubikilaye kabidi ne: “Mukokeshi wa buloba ebu.” (Yone 12:31; 16:11) Satana mmunyangakaje malu pa buloba ebu budiye ukokesha, mmudisuike bua kukunyanga ne wewe, bua kushadi mulame malanda ebe ne Tatu webe Yehowa. (1 Petelo 5:8) Kadi Yehowa udi ne bukole bupite bua Satana ne mmusue kulama badi bamunange.

Tshikepeshilu tshia malu manene a mu disambila dia tshilejilu dia Yezu ki ntshileje malu onso atudi mua kulomba mu disambila to. Umanye ne: 1 Yone 5:14 udi wamba bua Nzambi ne: ‘Bituamulomba tshintu tshionso bu mu disua diende, yeye udi utumvuila.’ Nunku, kuedi meji ne: tumalu tuudi natu katuena ne mushinga bua kutuambila Nzambi to.​—1 Petelo 5:7.

Netuambe tshinyi bua dîba ne muaba wa kusambidila? Muaba ne dîba bidiku ne mushinga bua kusambila anyi?

KAKUYI mpata, ukadiku mudimuena mudi bena mu bitendelelu binene batamba kulengeja bitanda biabu, bafundila bantu mêba ne matuku masunguluke adibu ne bua kusambila. Bible udiku uleja miaba ne mêba kampanda atudi ne bua kusambila anyi?

Bible udi uleja bikondo kampanda bisunguluke bitudi mua kusambila. Tshilejilu, kumpala kua Yezu kudiaye ne bayidi bende, wakasakidila Nzambi mu disambila. (Luka 22:17) Pavua bayidi bende badisangishe bua kutendelela, bakasambila kabidi pamue. Bakatungunuka ne tshilele etshi tshivuabu basangane mu nsunagoga ya bena Yuda ne mu ntempelo ya ku Yelushalema. Nzambi uvua musue bua ntempelo ikale ‘nzubu wa tshitendelelu tshia bisamba bionso.’​—Mâko 11:17.

Padi batendeledi ba Nzambi badisangisha ne basambila pamue, Nzambi udi uteleja masambila abu. Disambila didi muntu wenzela tshisumbu tshia bantu badi mu buobumue diodi diumvuangana ne mikenji ya Nzambi, udi uditeleja. Disambila didi nansha mua kumusaka bua kutuenzela bualu buvuaye kayi mua kutuenzela. (Ebelu 13:18, 19) Bantemu ba Yehowa batu ne tshibidilu tshia kusambila mu bisangilu biabu. Tudi tukubikila ne disanka dionso bua ulue ku Nzubu wa Bukalenge udi pabuipi nebe bua ulue kudiumvuila masambila au.

Kadi Bible katu utuelela mikenji ya muaba ne dîba ditudi ne bua kusambila to. Udi ne bilejilu bia batendeledi ba Nzambi bikala basambila mêba ne miaba mishilashilangane. Yezu wakamba ne: ‘Pawatendelela Nzambi, ubuele mu kazubu kebe ka tshisokomenu, winjile tshiibi, utendelele Tatu webe, udi biende mu tshisokomenu, ne Tatu webe udi umona mu musokoko neakupe.’​—Matayo 6:6.

Bualu ebu kabuenaku bukusankisha anyi? Bulelela, udi mua kuyukila ne Mukalenge wa diulu ne buloba dîba dionso, nansha pa nkayebe mushindike ne: neakuteleje. Ke bualu kayi tudi tumvua bua tshinyi Yezu uvua ne tshibidilu tshia kuya pa nkayende bua kusambila. Umue musangu wakasambila Nzambi butuku bujima, umulomba bua amuambuluishe bua kuangataye dipangadika dia mushinga mukole.​—Luka 6:12, 13.

Mu Bible mudi bilejilu bia balume ne bakaji bavua basambila kumpala kua kuangata mapangadika manene anyi pavuabu ne ntatu ivua ibakuatshisha buôwa. Imue misangu bavua basambila ne dîyi dikole anyi mundamunda, basambila mu tshibungi anyi muntu pa nkayende. Tshidi ne mushinga ntshia ne: bavua basambila. Nzambi udi kabidi ulomba batendeledi bende bua ‘bikale batendelelatendelele.’ (1 Tesalonike 5:17) Mmusue kuikala uteleja masambila a badi benza malu adiye musue. Bualu ebu kabuenaku buleja mudi Yehowa mutunange anyi?

Bulelela, lelu mu buloba ebu budi buule tente ne malu mabi, bantu ba bungi batu badiebeja bua kumanya mushinga udi nawu disambila. Udi mua kudiebeja ne: ‘Disambila didiku mua kungambuluisha anyi?’

DISAMBILA didiku mua kutuambuluisha anyi? Bible udi wandamuna ne: eyowa. Masambila avua batendeledi ba Nzambi bavua bamulamate benza avua mabambuluishe bikole. (Luka 22:40; Yakobo 5:13) Disambila didi bulelela mua kutuambuluisha bua kukumbaja dijinga dietu dia kudia malanda ne Nzambi, kuikala ne meji ne makanda a mubidi mimpe. Mushindu kayi?

Tshilejilu, fuanyikijabi ne: mbapeshe muanebe tshintu kampanda. Udiku mua kumuambila ne: tshidi ne bualu nkumvua dianyisha bua tshintu atshi anyi? Peshi neumulongeshe bua kulejaye dianyisha bua tshintu atshi? Patutu tupatula malu a mushinga adi mu mutu muetu, tudi tuleja mudiwu atusankisha ne tudi kabidi tuapesha bujitu. Ke mudibi kabidi patudi basue kuyukila ne Nzambi anyi? Eyowa. Tukonkononayi bimue bilejilu.

Disambila dia kuela Nzambi tuasakidila. Patudi tusakidila Tatuetu bua malu mimpe adiye utuenzela, tudi tuleja mudiwu matusankishe. Patudi tuenza nunku, tudi tumvua dianyisha ne disanka dia bungi.​—Filipoi 4:6.

Tshilejilu: Yezu wakaleja Tatuende dianyisha bua mushindu uvuaye muteleje ne muandamune masambila ende.​—Yone 11:41.

Disambila dia kulomba Nzambi luse. Patudi tulomba Nzambi luse bua bubi butudi benze, tudi tubanga kumona malu mutuye uamona, tunyingalala bikole bua mudi bubi abu bunyange malanda etu nende ne tuitaba bunene bua tshilema tshitudi benze. Tudi kabidi tupeta disulakana bua bubi butuvua benze.

Tshilejilu: Davidi wakasambila bua kuleja muvuaye unyingalala ne muoyo mujima.​—Musambu 51.

Disambila dia kulomba Nzambi buludiki ne meji. Kulomba Yehowa buludiki ne meji ende patudi tuangata mapangadika nekutuambuluishe bua kuikala ne budipuekeshi bua bungi. Kudi kutuvuluija ne: katuena mua kudieyemena ne kutuambuluisha bua kueyemene Tatuetu wa mu diulu bikole.​—Nsumuinu 3:5, 6.

Tshilejilu: Solomo wakalomba Yehowa ne budipuekeshi buonso buludiki ne meji bua kulombolaye tshisamba tshia Isalele.​—1 Bakelenge 3:5-12.

Disambila dia kanyinganyinga. Tuetu tukuatshila Nzambi malu adi munda muetu patudi ne kanyinganyinga, netusulakane ne netueyemene Yehowa pamutu pa kudieyemene.​—Musambu 62:8.

Tshilejilu: Mukalenge Asa wakasambila Nzambi pavuaye mutuilangane ne muluishi uvua ne bukole bua bungi.​—2 Kulondolola 14:11.

Kusambidila bawetu badi dijinga ne diambuluisha. Masambila a nunku adi atuambuluisha bua kumvuila bantu luse, kuditeka pa muaba wabu ne kuepuka budinangi.

Tshilejilu: Yezu wakasambila bua bayidi bende.​—Yone 17:9-17.

Disambila dia kutumbisha Nzambi. Kanemu ketu ne dianyisha dietu bua Yehowa bidi bikola patudi tumutumbisha bua midimu ne ngikadilu yende mimpe. Masambila a nunku adi atuambuluisha bua kusemena pabuipi menemene ne Tatuetu Yehowa.

Tshilejilu: Davidi wakatumbisha Nzambi ne muoyo mujima bua bufuki buende.​—Musambu 8.

Disanka dikuabu ditudi tupeta patudi tusambila ‘nditalala dia Nzambi didi ditamba dijingulula dionso dia bantu.’ (Filipoi 4:7) Kupeta ditalala edi ndibenesha dia pa buadi mu buloba ebu budi bantu basumpakana. Didi dituambuluisha kabidi bua kuikala ne makanda a mubidi. (Nsumuinu 14:30) Kadi tudiku mua kudipeta ku bukole buetu nkayetu anyi? Peshi kudi bualu bukuabu bua mushinga?

LUKONKO elu lutu lukoka ntema ya bantu ba bungi ne lubasankisha bikole. Bible udi uleja ne: Nzambi utu wandamuna masambila etu. Tuetu ke badi mua kuenza bua Nzambi kuteleja anyi kubenga kuteleja masambila etu.

Yezu wakela bamfumu ba bitendelelu ba mu matuku ende patoke bualu bavua benza masambila a lubombo, baenza patoke bua kudileja kudi bantu mudibu bakane. Wakamba ne: bantu ba nunku ‘bakumana kuangata difutu diabu,’ mbuena kuamba ne: bantu bakabamona bualu ke tshivuabu batamba kukeba, kadi Nzambi kakabateleja bu muvuabu bajinga to. (Matayo 6:5) Lelu kabidi, bantu ba bungi batu basambila mudibu bobu basue, kadi ki mudi Nzambi musue to. Nzambi katu ubateleja bualu ki mbamanye mibelu ya mu Bible idi yakula bua disambila itudi bamone mu biena-bualu bishale to.

Kadi tuambe bishi buebe wewe? Nzambi udiku mua kuteleja ne kuandamuna masambila ebe anyi? Bua kukuandamunaye, kabiena bikengela bua wikala ne dikoba kampanda, wa mu ditunga kansanga anyi wikale ne nsombelu kankenga to. Bible udi utujadikila ne: ‘Nzambi kena ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35) Mêyi aa adiku akutangila pebe anyi? Wewe utshina Nzambi, udi umunemeka bikole ne ubenga kuenza malu adiye kayi musue. Kuenza malu makane kudi kumvuija kuenza malu adi makane ku mêsu kua Nzambi pamutu pa kuenza tshiudi wewe anyi bantu bakuabu basue. Udiku musue bua Nzambi kutelejaye masambila ebe anyi? Bible udi ukuleja muudi mua kusambila bua Nzambi kukutelejaye.a

Bantu ba bungi batu bajinga bua Nzambi andamune masambila abu mu tshishima. Kadi nansha mu bikondo bia kale, kavua utamba kuandamuna masambila mu bishima to. Imue misangu, pavua Nzambi wenza tshishima kampanda, kuvua kupita nkama ya bidimu bua kushishaye kuenza tshikuabu. Kabidi, Bible udi uleja ne: bishima bivua ne bua kujika panyima pa lufu lua bapostolo. (1 Kolinto 13:8-10) Bidiku biumvuija ne: Nzambi kena wandamuna masambila etu lelu anyi? Tòo! Kadi mona mutu Nzambi wandamuna amue masambila.

Nzambi udi utupesha meji. Yehowa nkayende ke utu ne meji a bungi menemene. Katu ne minu mikole to, kadi bantu badi basue bua abalombole ne bua meji ende ikale abaludika mu nsombelu wabu, udi ubapeshawu tshianana.​—Yakobo 1:5.

Nzambi udi utupesha nyuma wende bua atuambuluishe. Nyuma wa Nzambi mbukole budiye wenza nabu mudimu. Kakuena bukole bukuabu butu bupite ebu to. Budi butuambuluisha bua kutantamena ntatu. Budi butupesha ditalala padi malu matutonde. Budi butuambuluisha bua kupeta imue ngikadilu mimpe. (Galatia 5:22, 23) Yezu wakajadikila bayidi bende ne: Nzambi utu upesha bantu nyuma eu tshianana.​—Luka 11:13.

Nzambi udi upesha bantu badi bamukeba ne muoyo mujima dimanya. (Bienzedi 17:26, 27) Pa buloba, kudi bantu badi bakeba bulelela bua mu Bible ne muoyo mujima. Mbasue kumanya Nzambi, dîna diende, tshidiye mulongolole bua buloba ne bua bantu ne mushindu udibu mua kusemena pabuipi nende. (Yakobo 4:8) Bantemu ba Yehowa batu bapetangana ne bantu ba nunku ne mbasue kubaleja tshidi Bible wamba bua malu aa.

Ke tshiudi pebe muangatshile tshibejibeji etshi anyi? Utuku ujinga bua kumanya Nzambi anyi? Pamuapa eu ke mushindu udiye wandamuna masambila ebe.